ពីនេះ ពីនោះ
អាជីវកម្មវិស័យអប់រំខ្វះគុណភាព ជាគ្រោះថ្នាក់ធំរបស់ប្រទេសជាតិ
× ភ្នំពេញ៖ កម្ពុជាពង្រឹងវិស័យអប់រំល្អ កែប្រែបទដ្ឋានវិន័យក្នុងវិស័យអប់រំល្អ ប៉ុន្តែ រហូតមកដល់ពេលនេះ កម្ពុជានៅមានគ្រឹះស្ថានអប់រំ ថ្នាក់ឧត្ដមសិក្សា ខ្វះគុណភាពច្រើន មិនទាន់ធ្វើការវាយតម្លៃកម្មវិធីសិក្សា ដើម្បីធានាគុណភាពអប់រំនោះឡើយ។ ក្នុងករណីនេះ ប្រើសិនបើជា ការធ្វើអាជីវកម្មលើវិស័យអប់រំដោយខ្វះគុណភាពគឺ ជាគ្រោះថ្នាក់ធំសម្រាប់ប្រទេសជាតិមួយ។
រចនាសម្ព័ន្ធគ្រប់គ្រង សម្ភារសិក្សា និងសមត្ថភាពគ្រូ បរិយាកាសសិក្សា កម្មវិធីសិក្សា គឺជាកត្តាមួយចំនួនដើម្បីធានាគុណភាពក្នុងនាមជាគ្រឹះស្ថានអប់រំ ដែលមានការប្រកួតប្រជែង។ ប៉ុន្តែចំណុចទាំងនេះ ចំពោះគ្រឹះស្ថានអប់រំថ្នាក់ឧត្ដមសិក្សាមួយចំនួន នៅពុំទាន់បានធ្វើការវាយតម្លៃនៅឡើយទេ។
ចាប់តាំងពីថ្ងៃ ចាប់ផ្ដើមប្រឡងមធ្យមសិក្សាទុតិយភូមិ រហូតមកដល់ពេលនេះ គ្រឹះស្ថានមួយចំនួន បានចែកខិត្តប័ណ្ណអួតសរសើរពីគ្រឹះស្ថានឧត្ដមសិក្សា ដល់យុវសិស្ស និងបង្ហាញឱកាសដល់សិស្សានុសិស្ស។ ក្នុងខិត្តប័ណ្ណនីមួយៗ សុទ្ធតែបញ្ជាក់ពីផ្ដល់ជាអាហារូបករណ៍តាមនិទ្ទេស ផ្ដល់អាហារូបករណ៍និស្សិតក្រីក្រ ផ្ដល់វគ្គសិក្សាខ្លីៗដោយឥតគិតថ្លៃ ផ្ដល់ជូនវគ្គសិក្សាកុំព្យូទ័រដោយឥតគិតថ្លៃ គ្រឹះស្ថានអាចជួយនិស្សិតក្នុងការស្វែងរកការងារធ្វើជាដើម។
គ្រឹះស្ថានឧត្ដមសិក្សា ផ្ដល់អាហារូបករណ៍ដល់សិស្សក្រីក្រ គឺជារឿងល្អ ដើម្បីជួយសម្រួលស្ថានភាពជីវភាពរបស់និស្សិត។ ប៉ុន្តែនិស្សិតដែលមកពីបណ្ដារខេត្តតែងតែទទួលរងផលអវិជ្ជមានពីគ្រឹះស្ថានទាំងនោះ។ ព្រោះមានគ្រឹះស្ថានឧត្ដមសិក្សាខ្លះ មិនបានបំពេញតាមអ្វីដែលខ្លួនបានផ្សព្វផ្សាយជូនសិស្ស ហើយប្រើគ្រប់វិធីសាស្ត្រ ឲ្យសិស្សនិស្សិតចំណាយលុយលើស្ថាប័នខ្លួន។
គ្រឹះស្ថានខ្លះ មានរចនាសម្ព័ន្ធគ្រប់គ្រងមិនច្បាស់លាស់ កម្មវិធីអប់រំគ្មានគុណភាព គ្រូឧទ្ទេសនាមខ្វះសមត្ថភាព ពេលខ្លះជ្រើសរើសគ្រូជានិស្សិតដូចគ្នាមកបង្រៀនព្រោះតម្លៃជួលគ្រូទាប តែតម្លៃឯកសារថ្លៃ។ គ្រឹះស្ថានខ្លះ ថាឲ្យអាហារូបករណ៍ តែបែរជានិស្សិតបង់លុយពេញថ្លៃ និងការងាររដ្ឋបាលក្នុងស្ថាប័ន ដើរយឺតក្នុងការផ្ដល់សេវាជូននិស្សិត។ ទីបំផុតនិស្សិតខ្លះ បង្ខំចិត្តចាក់ចេញពីគ្រឹះស្ថានទាំងកណ្ដាលទី ហើយត្រូវខាតបង់ថវិការ ពេលវេលា ជាច្រើនតែមិនទទួលបានលទ្ធផលសម្រាប់ខ្លួន។
កត្តាទាំងនេះ គឺជារូបភាពអវិជ្ជមានមួយសម្រាប់ អនាគតយុវជននៅពេលដែលពួកគេសម្រេចចិត្តជ្រើសរើសសាលាទាំងនោះ។ ហេតុនេះ យុវជនត្រូវដឹងថា ស្របពេលក្រសួងធ្វើកំណែរទម្រង់ប្រព័ន្ធអប់រំ គ្រឹះស្ថានអប់រំកាន់តែធំ កាន់តែល្បី មានការរៀបចំកម្មវិធីអប់រំល្អ គឺកាន់តែធានាបាននៅគុណភាពជូនសិស្សនិស្សិត។ មិនអាចជ្រើសរើសយកសកលវិទ្យាល័យរៀនបន្ត ដោយគ្រាន់តែមើលឃើញឱកាសអាហារូបករណ៍ និងផលចំណេញតិចតួចឡើយ។
© រក្សាសិទ្ធិដោយ thmeythmey.com