ពីនេះ ពីនោះ
តើប្រជាពលរដ្ឋអាចធ្វើអ្វីបាន ក្រៅពីការចិញ្ចឹមជីវិតប្រចាំថ្ងៃ និងការគ្រប់គ្រងគ្រួសារ?
× ភ្នំពេញ៖ ក្នុងនាមជាប្រជាជននៅក្នុងសង្គម មានកិច្ចការជាច្រើនដែលត្រូវបំពេញប្រចាំថ្ងៃដើម្បីជីវិតខ្លួនឯងផ្ទាល់ និងគ្រួសារ។ ប៉ុន្តែសំណួរសួរថា តើពលរដ្ឋអាចធ្វើអ្វីបានក្រៅពីកិច្ចការចិញ្ចឹមជីវិតប្រចាំថ្ងៃ សេដ្ឋកិច្ចគ្រួសារ និងការគ្រប់គ្រងគ្រួសារ?
ប៉ុន្តែបន្ថែមពីកិច្ចការដែលជាប្រយោជន៍ផ្ទាល់ខ្លួន មានកិច្ចការជាច្រើនផ្សេងទៀតដែលទាមទារពលរដ្ឋគ្រប់រូបទៅបំពេញ ដើម្បីជាប្រយោជន៍ជាតិ ប្រយោជន៍សង្គម។ កិច្ចការមួយក្នុងចំណោមរឿងដែលពលរដ្ឋត្រូវធ្វើគឺមិនចូលរួមគាំទ្រអំពើអាក្រក់ បំផ្លាញសង្គម ពុករលួយ តាមដានស្ថានភាពសង្គម ស្ថានភាពនយោបាយ ដើម្បីរួមចំណែកឃ្លាំងមើលការវិវឌ្ឍ គាត់មិនចូលរួមដើម្បីបណ្ដោយឲ្យជនខិលខូចនាំសង្គមឲ្យវិនាស តាមដានការអនុវត្ត ច្បាប់សង្គម។
ពីព្រោះការចូលរួមរបស់ប្រជាជន គឺពិតជាមានសារៈសំខាន់បំផុត នៅក្នុងការកម្រិតនូវ អាកប្បកិរិយា និងឥរិយាបថរបស់មន្ត្រីរាជការ អ្នកមានសមត្ថកិច្ច និងបុគ្គលនយោបាយ។ ប្រសិនបើប្រជាជន ចាប់ផ្ដើមយល់ដឹងពីអ្វីត្រូវ អ្វីខុស អាក្រកល្អ ហើយ ពេលនោះហើយដែលអាជ្ញាធរ ចាប់ផ្ដើមកែតម្រូវ និងតម្រង់ឥរិយាបថខ្លួនឯងនៅក្នុងការដឹកនាំ ឲ្យស្របទៅតាមចិត្តរបស់ប្រជាជនដែរ។ ពីព្រោះបើមិនធ្វើដូច្នេះទេ ប្រជាជនលែងគាំទ្រ។
បញ្ហាជាច្រើននៅក្នុងសង្គមកម្ពុជា ប្រជាពលរដ្ឋ តែងទាមទារឲ្យគោរពទៅតាមគោលការណ៍ច្បាប់ដែលបានកំណត់។ ប៉ុន្តែមិនមែនគ្រប់បញ្ហា អាចដោះស្រាយទៅបានដោយប្រសិទ្ធភាព តាមរយៈការប្រើប្រាស់ច្បាប់ទាំងស្រុងនោះទេ។ ព្រោះច្បាប់ គ្រាន់តែជាឯកសារនៅលើក្រដាស់ ប៉ុន្តែដើម្បីធ្វើឲ្យច្បាប់ អាចយកទៅអនុវត្តបាន គឺត្រូវសរសេរគោលនយោបាយ ប្រសិនបើអត់មានស្ថាប័នរដ្ឋណាមួយ ទទួលខុសត្រូវ ឬក៏អត់មធ្យោបាយដើម្បីអនុវត្តរឿងនោះទេ ច្បាប់នោះក៏មិនអាចជោគជ័យទេ។ ចំណែកប្រភេទច្បាប់ផ្សេងទៀត រដ្ឋមិនចាំបាច់សរសេរគោលនយោបាយទេ ប៉ុន្តែត្រូវផ្ដល់មធ្យោបាយនៅក្នុងការធ្វើការងារ ហើយនឹងធ្វើការពង្រឹងសមត្ថភាពស្ថាប័ន ឲ្យធ្វើការងារឲ្យឯករាជ្យ ច្បាប់នោះអាចអនុវត្តបានហើយ។
ចំណែករឿងដែលត្រូវធ្វើគឺត្រូវកសាងសមត្ថភាពស្ថាប័ន ផ្ដល់មធ្យោបាយគ្រប់គ្រាន់ឲ្យស្ថាប័ន និងពង្រឹងសមត្ថភាពមន្ត្រីអនុវត្តច្បាប់ ហើយធានាប្រសិទ្ធភាពការអនុវត្តច្បាប់ សង្គម។ ចំណែកប្រជាពលរដ្ឋនៅពេលនោះគឺមានតួនាទីយ៉ាងសំខាន់ ដើម្បីជាកញ្ចក់ឆ្លុះដល់មន្ត្រីទាំងអស់៕
© រក្សាសិទ្ធិដោយ thmeythmey.com