អន្តរជាតិ
ក្រុងប៉េកាំងគំរាមកោះតៃវ៉ាន់កុំឲ្យស្វាគមន៍សម្តេចសង្ឃ ដាឡៃ ឡាម៉ា
× រដ្ឋអំណាចចិន បានព្រមានរដ្ឋាភិបាលថ្មីរបស់តៃវ៉ាន់ដែលចង់ទទួលស្វាគមន៍មេដឹកនាំសាសនាសម្តេចសង្ឃទីបេ ដាឡៃ ឡាម៉ា នៅថ្ងៃពុធទី ១៤ កញ្ញាម្សិលមិញនេះ។ កន្លងមកចិនតែគំរាមតៃវ៉ាន់ ហើយរដ្ឋាភិបាលតៃវ៉ាន់កាលស្ថិត ក្រោមការដឹកនាំរបស់លោក Ma Ying-jeou ក៏បានបដិសេធការស្វាគមន៍ដំណើរទស្សនកិច្ចរបស់មេដឹកនាំសាសនាទីបេ នេះជាច្រើនដងដែរ។
ថ្ងៃពុធ ទី ១៤ កញ្ញា ក្រុងប៉េកាំងបានព្រមានរដ្ឋាភិបាលតៃវ៉ាន់កុំឲ្យទទួលស្វាគមន៍សម្តេចសង្ឃទីបេ ដាឡៃ ឡាម៉ា ទៅទស្សនកិច្ចនៅកោះតៃវ៉ាន់។ ការព្រមាននេះធ្វើឡើងក្រោយ សមាជិកសភាតៃវ៉ាន់ បានអញ្ជើញមេដឹកនាំសាសនាទីបេ ដែលកំពុងនិរទេសខ្លួននៅបរទេសឲ្យទៅទស្សនកិច្ចនៅកោះតៃវ៉ាន់។
យោងតាមទីភ្នាក់ងារព័ត៌មាន Reuters កាលពីសប្តាហ៍មុន សមាជិកសភាតៃវ៉ាន់ និងជាអ្នកនយោបាយដែលតែងរិះគន់ចិនឥតសំចៃមាត់ Freddy Lim បានសូមអញ្ជើញសម្តេចសង្ឃមកទស្សនកិច្ចនៅតៃវ៉ាន់ នៅពេលអ្នកទាំងពីរជួបគ្នានៅប្រទេសឥណ្ឌា។
ក្នុងសន្និសីទសារព័ត៌មានមួយ អ្នកនាំពាក្យការិយាល័យកិច្ចការតៃវ៉ាន់ស្ថិតក្រោមរដ្ឋាភិបាលចិនលោក Ma Xiaoguang បានហៅសម្តេច ដាឡៃ ឡាម៉ា ថាជាបុគ្គលដែលគ្រងស្បង់ចីពរតែធ្វើសកម្មភាពខុសច្បាប់ដើម្បីទាមទារផ្តាច់ទឹកដីតំបន់ទីបេ។
អ្នកនាំពាក្យក្រុងប៉េកាំងម្នាក់នេះ ក៏បានបន្ថែមផងដែរថា ចេតនារបស់អ្នកនយោបាយតៃវ៉ាន់ខ្លះដែលអញ្ជើញមេដឹកនាំចលនាផ្តាច់ខ្លួន ដាឡៃ ឡាម៉ា នឹងធ្វើឲ្យប៉ះពាល់ខ្លាំងដល់ទំនាក់ទំនងរវាងចិននិងតៃវ៉ាន់។ ហើយចិនប្រឆាំងដាច់ខាតចំពោះដំណើរទស្សនកិច្ចរបស់សម្តេចសង្ឃ ដាឡៃ ឡាម៉ា ទោះជាក្នុងរូបភាពបែបណាក៏ដោយ។
តាមពិតទៅ រដ្ឋាភិបាលមុនរបស់តៃវ៉ាន់ ស្ថិតក្រោមការដឹកនាំរបស់លោក Ma Ying-jeou ដែលមានទំនាក់ទំនងស្អិតល្មួតជាមួយចិន បានបដិសេធការស្វាគមន៍ដំណើរទស្សនកិច្ចរបស់មេដឹកនាំសាសនាដែលនិរទេសខ្លួននេះជាច្រើនដង។ តែក្នុងឆ្នាំ ២០០៩ តៃវ៉ាន់អនុញ្ញាតឲ្យសម្តេចសង្ឃ ដាឡៃ ឡាម៉ា ទស្សនកិច្ចនៅតៃវ៉ាន់ តែលោក Ma Ying-jeou មិនជួបពិភាក្សាជាមួយមេដឹកនាំសាសនាអង្គនេះឡើយ។
មកទល់ពេលនេះ ប្រមុខរដ្ឋតៃវ៉ាន់លោកស្រី Tsai Ing-wen ដែលទើបឡើងកាន់តំណែងកាលពីខែមករានោះ មិនទាន់បានបកស្រាយនៅឡើយទេថា តើរដ្ឋាភិបាលលោកស្រីនឹងអនុញ្ញាតឲ្យសម្តេចសង្ឃដាឡៃ ឡាម៉ា ទៅទស្សនកិច្ចនៅកោះតៃវ៉ាន់ឬអត់។ ពេលលោកស្រីជាប់ឆ្នោត សម្តេចសង្ឃអង្គនេះក៏បានផ្ញើសារជូនពរនិងអបអរសាទរលោកស្រីពេលជាប់ឆ្នោតដែរ។
ពាក់ព័ន្ធបញ្ហាទស្សនកិច្ចនេះ រដ្ឋមន្ត្រីការបរទេសតៃវ៉ាន់ David Lee បានបញ្ជាក់ថា បើសិនជាសម្តេចសង្ឃ ដាឡៃ ឡាម៉ា សម្រេចថាមកទស្សនកិច្ចនៅតៃវ៉ាន់មែន ក្រសួងការបរទេសនឹងត្រួតពិនិត្យបញ្ហានេះដោយប្រុងប្រយ័ត្នបំផុត។
ទោះជាយ៉ាងណាក៏ដោយ ចិនតែងតែមានមន្ទិលសង្ស័យលើ គោលនយោបាយរបស់ប្រធានាធិបតីថ្មី និងជាប្រធានគណបក្សប្រជាធិបតេយ្យជឿនលឿនលោកស្រី Tsai Ing-wen។ នេះក៏ព្រោះថា លោកស្រីតែងតែមានមហិច្ឆតាប្រកាសឯករាជ្យកោះតៃវ៉ាន់ ទោះមានការគំរាមពីសំណាក់រដ្ឋាភិបាលចិនក្តី។ ជាធម្មតា ចិននៅបន្តចាត់ទុកកោះតៃវ៉ាន់ជាកោះដែលស្ថិតក្រោមការគ្រប់គ្រងរបស់ខ្លួន ទោះបីតៃវ៉ាន់ចាត់ទុកខ្លួនឯងជារដ្ឋឯករាជ្យក៏ដោយ។
សូមបញ្ជាក់ផងដែរថា តាំងពីយូរមកហើយ រដ្ឋាភិបាលចិន ចាត់ទុកសម្តេចសង្ឃ ដាឡៃ ឡាម៉ា ជាមេដឹកនាំចលនាផ្តាច់ខ្លួននៅតំបន់ទីបេ។ សម្តេច ដាឡៃ ឡាម៉ា បាននិរទេសខ្លួនទៅកាន់ប្រទេសឥណ្ឌានៅឆ្នាំ ១៩៥៩ ក្រោយលោកក្រោកឈរប្រឆាំងរបបដឹកនាំកុម្មុយនីស្តក្រុងប៉េកាំង។ លោកក៏បានឈ្នះពានរង្វាន់ណូបែលសន្តិភាពក្នុងឆ្នាំ ១៩៨៩ ដែរ៕
Tag:
ដាឡៃ ឡាម៉ា
Ma Ying-jeou
Tsai Ing-wen
© រក្សាសិទ្ធិដោយ thmeythmey.com