ជំនួបលោកស្រីស៊ូជី ជាមួយលោកអូបាម៉ានៅវ៉ាស៊ីនតោន នាំលាភដល់មីយ៉ាន់ម៉ា

អន្តរជាតិ

ជំនួបលោកស្រីស៊ូជី ជាមួយលោកអូបាម៉ានៅវ៉ាស៊ីនតោន នាំលាភដល់មីយ៉ាន់ម៉ា

15, Sep 2016 , 4:51 pm

រូបភាព

ទីប្រឹក្សារដ្ឋមីយ៉ាន់ម៉ា លោកស្រី អ៊ុងសាន ស៊ូជី ជួបប្រធានាធិបតីអាមេរិក បារ៉ាក់ អូបាម៉ា នៅសេតវិមាន (ប្រភពរូបភាព៖ Reuters)

ដោយ:

ក្រៅពីការកែប្រែប្រវត្តិសាស្ត្រនយោបាយសម្រាប់ខ្លួន ទីប្រឹក្សារដ្ឋមីយ៉ាន់ម៉ា លោកស្រី អ៊ុងសាន ស៊ូជី បាននាំមកនូវលាភសក្ការៈ និងផលប្រយោជន៍ជាច្រើនតាមរយៈដំណើរទស្សនកិច្ចផ្លូវការទៅកាន់ក្រុងវ៉ាស៊ីនតោនស្របតាមការអញ្ជើញរបស់លោកប្រធានាធិបតីអាមេរិក បារ៉ាក់ អូបាម៉ា។ ហើយនោះគឺ មានកិច្ចព្រមព្រៀងជាច្រើនរួមបញ្ចូលទាំងពាណិជ្ជកម្ម និងបញ្ហាទណ្ឌកម្ម សុទ្ធសឹងតែបានលើកឡើងក្នុងជំនួបកំពូលលើកដំបូងផ្លូវការរវាងមេដឹកនាំទាំងពីរ។

លោកស្រី អ៊ុងសាន ស៊ូជី ទីប្រឹក្សារដ្ឋ និងជារដ្ឋមន្ត្រីការបរទេសមីយ៉ាន់ម៉ាផងដែរនោះ នៅថ្ងៃទី១៤ ខែកញ្ញា ម្សិលមិញនេះ បានជួបពិភាក្សាទ្វេភាគីជាមួយនឹងលោក បារ៉ាក់ អូបាម៉ាប្រធានាធិបតីអាមេរិក ជាលើកដំបូងក្នុងនាមជាប្រមុខដឹកនាំកំពូលនៅក្នុងការិយាល័យពងក្រពើនៃសេតវិមានអាមេរិក។ ភាគីទាំងពីរ បានអនុម័តលើសេចក្តីថ្លែងការណ៍រួមមួយជាមួយគ្នា ដោយបញ្ជាក់ពី ទំនាក់ទំនងទ្វេភាគីនៅក្នុងសករាជថ្មី ដែលមានឈ្មោះថា «ភាពជាដៃគូអាមេរិក-មីយ៉ាន់ម៉ា»។

យោងតាមសេចក្តីថ្លែងការណ៍រួមរបស់លោក អូបាម៉ា និងលោកស្រី ស៊ូជី ដែលបានចុះផ្សាយក្រោយជំនួបនោះ «ភាពជាដៃគូអាមេរិក-មីយ៉ាន់ម៉ា» នឹងត្រូវស្ថិតក្រោមការដឹកនាំដោយក្រសួងការបរទេសនៃប្រទេសទាំងពីរ។ កិច្ចការសហប្រតិបត្តិការនេះ នឹងបើកផ្លូវឲ្យប្រទេសទាំងពីរអាចធ្វើការជាមួយគ្នាកាន់តែទូលំទូលាយ និងស៊ីជម្រៅលើវិស័យកាន់តែច្រើន រាប់បញ្ចូលទាំងផ្នែកសុខភាព អប់រំ ពាណិជ្ជកម្ម និងការទ្រទ្រង់អាជីវកម្មខ្នាតតូច និងកំពុងលូតលាស់របស់មីយ៉ាន់ម៉ា។

ចំណុចគួរកត់សម្គាល់ក្នុងសេចក្តីថ្លែងការណ៍រួមនោះ គឺ អាមេរិក សន្យា នឹងលុបចោល«សេចក្តីបង្គាប់ដែលជាក្របខណ្ឌពាក់ព័ន្ធនឹងទណ្ឌកម្មលើមីយ៉ាន់ម៉ា»។ និយាយឲ្យខ្លី គឺអាមរិក នឹងលុបចោលទណ្ឌកម្មប្រឆាំងនឹងមីយ៉ាន់ម៉ា ដែលបានដាក់តាំងពីយោធាដឹកនាំមីយ៉ាន់ម៉ាអស់រយៈពេលជាច្រើនទសវត្សរ៍ហើយនោះ។ តែការលុបចោលនេះ មិនត្រូវបានបញ្ជាក់ថាពេលណាពិតប្រាកដនោះទេ ដោយលោក អូបាម៉ា គ្រាន់តែប្រាប់លោកស្រី ស៊ូជី ថា នាពេលខាងមុខដ៏ខ្លី។

បន្ថែមពីការលុបចោលនេះ សហរដ្ឋអាមេរិក ក៏គ្រោងនឹងចុះហត្ថលេខាផ្តល់កម្ចីជាមួយនឹងស្ថាប័នមីក្រូហិរញ្ញវត្ថុក្នុងស្រុកចំនួនប្រាំក្នុងចំនួនទឹកប្រាក់ជាង១០លានដុល្លារដើម្បីទ្រទ្រង់អាជីវកម្មខ្នាតតូចនៅមីយ៉ាន់ម៉ាផងដែរ។ ភាគីទាំងពីរ ការសន្យាពង្រឹងលើទំនាក់ទំនងសេដ្ឋកិច្ច និងការអនុវត្តច្បាប់ដែលជាប់ពាក់ព័ន្ធទៅនឹងលំហូរវិនិយោគទ្វេភាគី និងការវិនិយោគបរទេស ដែលរួមបញ្ចូលទាំងសន្ធិសញ្ញាវិនិយោគទ្វេភាគីផងដែរ។

សូមជម្រាបផងដែរថា ការណ៍ដែលអាចធ្វើអាមេរិក និងមីយ៉ាន់ម៉ា អាចបង្កើតភាពជិតស្និទ្ធ និងឈានមកដល់ការគ្រោងលុបទណ្ឌកម្មនេះ ក៏ព្រោះតែដំណើរទៅមុខនៃលទ្ធិប្រជាធិបតេយ្យដែលចេញពីការបោះឆ្នោតចុងឆ្នាំ២០១៥នោះឯង។ ហើយនោះ គឺក្រោយពីបក្សសម្ព័ន្ធជាតិដើម្បីប្រជាធិបតេយ្យមីយ៉ាន់ម៉ារបស់លោកស្រី អ៊ុងសាន ស៊ូជី បានទទួលការគាំទ្រច្រើនលើសលប់ពីប្រជាពលរដ្ឋ ហើយ ក្រុមយោធា ព្រមទទួលស្គាល់លទ្ធផល ដែលអាចឲ្យមីយ៉ាន់ម៉ាអាចមានមេដឹកនាំស៊ីវិលប្រជាធិបតេយ្យបានមកដល់បច្ចុប្បន្ន។

ហើយចំណុចផ្តើមនៃការខិតជិតគ្នាកាន់តែខ្លាំងនោះ គឺចាប់ពីខែឧសភាកន្លងមក ពោលគឺនៅពេលរដ្ឋាភិបាលក្រុងវ៉ាស៊ីនតោន បានលុបចោលទណ្ឌកម្មលើក្រុមហ៊ុនមួយចំនួនដែលក្រុងវ៉ាស៊ីនតោនបានដាក់ក្នុងពេលមីយ៉ាន់ម៉ាដឹកនាំដោយរបបយោធា។ ពេលនោះ មន្ត្រីអាមេរិកអះអាងថា ការសម្រេចចិត្តរបស់ខ្លួន គឺមានការផ្ដល់យោបល់ពីលោកស្រី ស៊ូជី ដ្បិតរដ្ឋាភិបាលស៊ីវិលមីយ៉ាន់ម៉ា ចង់រក្សាឥទ្ធិពលប្រឆាំងក្រុមយោធា និងក្រុមហ៊ុនពួកគេគាំទ្រ ដែលរកស៊ីមុខជំនួញធំៗរបស់ប្រទេស៕