អន្តរជាតិ
លោក ដូណាល់ត្រាំ «លើសទម្ងន់» ហើយលោកស្រី ហ៊ីឡារី ជាពីជំងឺ«រលាកសួត»
× គ្រូពេទ្យផ្ទាល់ខ្លួនរបស់លោកស្រី ហ៊ីឡារី គ្លីនតុន បានបញ្ចេញព័ត៌មានសុខភាពលម្អិតមួយដែលបញ្ជាក់ថាលោកស្រី មានសុខភាពល្អ ព្រោះជាសះស្បើយពីជំងឺរលាកសួត ។ ការបញ្ចេញរបាយការណ៍លម្អិតស្តីពីសុខភាពនេះ កើតឡើងក្រោយពេលដែលគូប្រជែងលោកស្រី លោក ដូណាល់ ត្រាំ បង្ហាញព័ត៌មានសុខភាពរបស់ខ្លូនចុងឆ្នាំ២០១៥ និង របាការណ៍ត្រួតពិនិត្យសុខភាពថ្មីបំផុតជាសាធារណៈដើម្បីជម្រះមន្ទិលសង្ស័យ។ ប៉ុន្តែគេរកឃើញថា លោក ដូណាល់ ត្រាំ លើសទម្ងន់បន្តិច ដែលវាអាចបង្កបញ្ហាដល់សុខភាពរបស់លោកដែរ។
សូមស្តាប់ការបកស្រាយរបស់លោក សៅ ផលនិស្ស័យ៖
ស្ថានភាពសុខភាពបេក្ខជនប្រធានាធិបតីអាមេរិកបានក្លាយជាបញ្ហាចម្រូងចម្រាសនិងរសើបបំផុតមួយក្នុងការឃោសនាបោះឆ្នោត ក្រោយពេលលោកស្រី ហ៊ីឡារី គ្លីនតុន រងគ្រោះដោយសារជំងឺ «រលាកសួត»ធ្ងន់ធ្ងរ ។ លោកស្រី ហ៊ីឡារី គ្លីនតុន និងលោក ដូណាល់ ត្រាំ សុទ្ធតែរងសម្ពាធពីសាធារណជន ហើយគេតម្រូវឲ្យអ្នកទាំងពីរប្រញាប់បង្ហាញព័ត៌មានលម្អិតពាក់ព័ន្ធការត្រួតពិនិត្យសុខភាពរបស់ខ្លួនឲ្យសាធារណជនបានដឹងផង។
បេក្ខជនប្រធានាធិបតីបក្សសាធារណរដ្ឋ លោក ដូណាល់ ត្រាំ មិនបង្អែរបង្អង់យូរឡើយ ដោយលោកបញ្ចេញព័ត៌មានសុខភាពខ្លួនឯង ដែលរៀបចំដោយវេជ្ជបណ្ឌិត Harold Bornstein តាំងពីខែ ធ្នូឆ្នាំ ២០១៥។ ហើយរហូតដល់ថ្ងៃពុធទី ១៤ កញ្ញាម្សិលមិញ លោកក៏សម្រេចបញ្ចេញព័ត៌មានសុខភាពថ្មីមួយទៀត ឲ្យគ្រប់គ្នាបានឃើញថា លោកពិតជាមានសុខភាពល្អ ទោះមានវ័យ ៧០ ក៏ដោយ។
ចំណែកលោកស្រី ហ៊ីឡារី គ្លីនតុន ដែលសម្រាកព្យាបាលជំងឺនៅផ្ទះមិនចេញឃោសនានយោបាយនោះ ក៏បានបញ្ចេញព័ត៌មានសុខភាពដែរ ដើម្បីបញ្ជាក់ថា លោកស្រីមិនឈឺធ្ងន់ទេ។ ចាប់ពីថ្ងៃចន្ទដើមសប្តាហ៍ ដល់ថ្ងៃពុធលោកស្រី ហ៊ីឡារី គ្លីនតុន បានសម្រាកនៅផ្ទះបីថ្ងៃជាប់ៗគ្នា ដើម្បីទទួលការព្យាបាលពីគ្រូពេទ្យនិងថែទាំសុខភាព។ សូម្បីតែការឃោសនានយោបាយនៅរដ្ឋកាលីហ្វ័រនីញ៉ា ដែលត្រូវរៀបចំនៅថ្ងៃចន្ទទី ១២ កញ្ញា ក៏ត្រូវលោកស្រីលុបចោលវិញដែរ។ ប៉ុន្តែការបង្ហាញឲ្យសាធារណជនឃើញពីព័ត៌មានសុខភាពលម្អិតនេះ បញ្ជាក់ថា សុខភាពលោកស្រីត្រឡប់មកភាពប្រក្រតីវិញហើយ។
១. លោកស្រី គ្លីនតុន មានសុខភាពប្រសើរវិញ និងអាចកាន់តំណែងប្រធានាធិបតីបាន
យោងតាមទីភ្នាក់ងារព័ត៌មាន AFP របាយការណ៍ព័ត៌មានសុខភាពលោកស្រី ហ៊ីឡារី គ្លីនតុន ត្រូវបានគេបញ្ចេញជាសាធារណៈនៅថ្ងៃពុធទី ១៤ កញ្ញា ហើយរបាយការណ៍នេះបញ្ជាក់ច្បាស់ថា «លោកស្រី គ្លីនតុន ជាសះពីជំងឺ និងមានសុខភាពល្អអាចកាន់តំណែងប្រធានាធិបតីអាមេរិកបាន»។
យោងតាមព័ត៌មានសុខភាពលោកស្រី គ្លីនតុន ដែលមានកម្រាស់ពីរទំព័រនិងត្រូវបានរៀបចំឡើងដោយវេជ្ជបណ្ឌិត Lisa Bardack លោកស្រី ហ៊ីឡារី គ្លីនតុន ជាសះស្បើយពីជំងឺរលាកសួត ក្រោយទទួលបានការព្យាបាលដោយប្រើប្រាស់ថ្នាំអង់ទីប៊ីយូទិក និងសម្រាកតាមវេជ្ជបញ្ជាប៉ុន្មានថ្ងៃនេះ។
លោកស្រី វេជ្ជបណ្ឌិតបានសង្កត់ធ្ងន់ថា បេក្ខជនប្រធានាធិបតីបក្សប្រជាធិបតេយ្យនេះនឹងបន្តមានសុខភាពល្អ គ្រប់គ្រាន់ដើម្បីបម្រើការងារជាប្រធានាធិបតីអាមេរិក នៅពេលលោកស្រីជាប់ឆ្នោតនៅពេលខាងមុខ។
សូមបញ្ជាក់បន្តិចដែរ កាលពីថ្ងៃអាទិត្យចុងសប្តាហ៍មុន លោកស្រី ហ៊ីឡារី គ្លីនតុន បានចាកចេញពីកន្លែងគោរពវិញ្ញាណក្ខ័ន្ធអ្នកស្លាប់ក្នុងការវាយប្រហារភេរវកម្មថ្ងៃ ១១កញ្ញា លឿនខុសប្រក្រតី។ គេដឹងថា លោកស្រីមានបញ្ហាសុខភាព ព្រោះ វីដេអូខ្លីមួយ បង្ហាញថា លោកស្រី ហ៊ីឡារី គ្លីនតុន ទប់ជំហរខ្លួនមិនជាប់និងជិតសន្លប់ផងពេលកំពុងដើរចូលក្នុងរថយន្ត។ លោកស្រីត្រូវគេគ្រាឡើងរថយន្ត ដើម្បីកុំឲ្យដួល ដោយមានក្រុម Secret Service ឈរជុំវិញផងដើម្បីការពារសុវត្ថិភាព។ ក្រោយមកទើបគេដឹងថា លោកស្រី មានជំងឺរលាកសួត។
២. លោក ដូណាល់ ត្រាំ លើសទម្ងន់បន្តិច
ដូចបានបញ្ជាក់ខាងដើមស្រាប់ លោក ដូណាល់ ត្រាំ បានបញ្ចេញព័ត៌មានសុខភាពរបស់ខ្លួនដែរ តែវាជាព័ត៌មានចាស់តាំងពីខែធ្នូឆ្នាំ ក្រោយទទួលបានព័ត៌មានថា លោកស្រី ហ៊ីឡារី មានជំងឺរលាកសួត។ដើម្បីជម្រះមន្ទិលសង្ស័យ លោក ដូណាល់ ត្រាំ ក៏បានបង្ហាញឲ្យគ្រប់គ្នាបានឃើញនូវព័ត៌មានលម្អិតនិងត្រឹមត្រូវមួយទៀតពាក់ព័ន្ធសុខភាពលោកផ្ទាល់ ក្រោយពេលលោកទទួលបានការត្រួតពិនិត្យសុខភាពពីវេជ្ជបណ្ឌិត Harold Bornstein នាថ្ងៃពុធទី ១៤ កញ្ញាម្សិលមិញ ។
ប៉ុន្តែអ្វីដែលគួរឲ្យចាប់អារម្មណ៍គឺ គេឃើញថា បេក្ខជនប្រធានាធិបតីរូបនេះ លើសទម្ងន់ និងអាចមានកូឡេស្តេរ៉ូលខ្ពស់ផង។ លោក ដូណាល់ ត្រាំ មានទម្ងន់សរុប ១២០ គីឡូក្រាម និងមានកម្ពស់ប្រហែល ១,៨៨ម៉ែត្រ។ តាមការវាយតម្លៃ លោក ដូណាល់ ត្រាំ ពិតជាលើសទម្ងន់មែន តែលើសបន្តិចបន្តួច។ ចំណែករឿង កូឡេស្តរ៉ូលវិញ វាហាក់ស្ថិតនៅកម្រិតធម្មតានិងមានសុវត្ថិភាពសម្រាប់លោក ដូណាល់ ត្រាំ ព្រោះលោកបានទទួលការព្យាបាលកន្លងមកដែរ។
៣. លោក ដូណាល់ត្រាំ និងលោកស្រី គ្លីនតុន សុទ្ធតែមានវ័យចំណាស់ខ្លាំង
មុនមានការបញ្ចេញរបាយការណ៍សុខភាពលម្អិត គូបដិបក្ខលោកស្រី ពោលគឺបេក្ខជនប្រធានាធិបតីបក្សសាធាណរដ្ឋលោក ដូណាល់ ត្រាំ ផ្ទាល់កន្លងមកឆ្លៀតឱកាសលើកយកបញ្ហាសុខភាពធ្វើជា ឧបករណ៍ទម្លាក់ប្រជាប្រិយភាពលោកស្រី គ្លីនតុន។ ហើយការលេចចេញវីដេអូ និងព័ត៌មានថាលោកស្រី មានជំងឺរលាកសួតកន្លងមកនោះ ក៏រឹតតែបង្កផលប៉ះពាល់ដល់ប្រជាប្រិយភាពលោកស្រី ថែមទៀត។
ជាធម្មតា ចង់មិនចង់ អ្នកគាំទ្រ និងអ្នកមិនទាន់សម្រេចថាបោះឲ្យអ្នកណានោះ ត្រូវពិចារណាឡើងវិញ ចំពោះបេក្ខជនប្រធានាធិបតីទាំងពីរ។ គេដឹងច្បាស់ថា តំណែងប្រធានាធិបតីអាមេរិកគួរតែត្រូវកាន់កាប់ដោយអ្នកនយោបាយដែលមានសុខភាពបរិបូរណ៍ និងមានកម្លាំងពលំមាំមួន ព្រោះវាជាកិច្ចការធំនិងស្មុគស្មាញបំផុត។ តែដូចបានរៀបរាប់ខាងលើ បេក្ខជនទាំងពីររូបសុទ្ធតែមានបញ្ហាសុខភាព ហើយវ័យកាន់តែជ្រេខ្លាំងណាស់ទៅហើយ។
លោកស្រី ហ៊ីឡារី គ្លីនតុន មានវ័យ៦៨ ឆ្នាំ ខណៈលោក ដូណាល់ ត្រាំ មានវ័យ ៧០ឆ្នាំ។ ហើយបើសិនជាលោកជាប់ឆ្នោត លោកនឹងក្លាយជាប្រធានាធិបតីវ័យចំណាស់ជាងគេដែលស្បថចូលកាន់តំណែងជាប្រធានាធិបតីក្នុងអាណត្តិទីមួយ។ ចំណែកលោកស្រី ហ៊ីឡារី គ្លីនតុន នឹងក្លាយជាបេក្ខជនចំណាស់បំផុតទី២ បន្ទាប់ពីលោក ដូណាល់ ត្រាំ៕
© រក្សាសិទ្ធិដោយ thmeythmey.com