អន្តរជាតិ
នយោបាយអន្តរជាតិ
លោក ប្រាយុទ្ធ ការពារស្ថានភាពសិទ្ធិមនុស្សនៅថៃក្រោមការគ្រប់គ្រងរបស់យោធា
×
បន្ទាប់ពីក្រុមយោធាធ្វើរដ្ឋប្រហារដណ្ដើមអំណាចពីរដ្ឋាភិបាលស៊ីវិលរួចមក ស្ថានភាពសិទ្ធិមនុស្សនៅថៃ ធ្លាក់ទៅរកស្ថានភាពអាក្រក់យ៉ាងខ្លាំង និងថែមទាំងរងការរិះគន់ពីសហគមន៍អន្តរជាតិទៀតផង។ យ៉ាងណាក្ដី ប្រមុខរបបយោធាថៃ បានចេញមកការពាររបាយការណ៍សិទ្ធិមនុស្សរបស់ខ្លួន និងបានអះអាងថា រដ្ឋប្រហារយោធារបស់លោក ធ្វើឡើងដើម្បីស្រោចស្រង់ស្ថានការណ៍ប្រទេសដែលធ្លាក់ចុះប៉ុណ្ណោះ។
នាយករដ្ឋមន្ត្រីថៃ លោកឧត្តមសេនីយ៍ ប្រាយុទ្ធ ចន្ទអូចា បានចេញមកនិយាយការពារកំណត់ត្រាសិទ្ធិមនុស្សរបស់រដ្ឋាភិបាលលោក ចាប់តាំងពីលោកឡើងកាន់អំណាចក្នុងឆ្នាំ២០១៤មក។ លោក ប្រាយុទ្ធ ក៏ថ្លែងការពាររដ្ឋប្រហារយោធាមិនបង្ហូរឈាមរបស់លោក ដែលធ្វើឡើងក្នុងគោលដៅបញ្ចប់អស្ថិរភាពនយោបាយ ដែលជាប់គាំងអស់ពេលជាច្រើនខែមកនោះ។
ថ្លែងនៅវិមានរដ្ឋាភិបាល នៅថ្ងៃទី១៥ ខែកញ្ញា នាយករដ្ឋមន្ត្រីថៃបានប្រាប់ឲ្យអ្នកដែលតែងអំពាវនាវឲ្យគោរពសិទ្ធិមនុស្ស និងប្រជាធិបតេយ្យនោះ ងាកមើលស្ថានការណ៍ដែលកើតឡើងពីអតីតកាល។ លោកនិយាយថា ជនបរទេសទាំងឡាយ ត្រូវតែយល់ពីអ្វីថៃដែលបានឆ្លងកាត់ ដ្បិតប្រទេសទាំងអស់ សុទ្ធតែជួបប្រទះស្ថានភាពលំបាក ហើយថៃ គឺគ្រាន់តែយឺតជាងគេប៉ុណ្ណោះ។
«កុំមកប្រាប់ថា យើងរំលោភសិទ្ធិមនុស្សអីនុះ។ អ្នកឯង ក៏រំលោភបំពានសិទ្ធិរបស់គេ ហើយក៏ដើរបង្កើតបញ្ហាដែរ។» នេះជាការលើកឡើងរបស់នាយករដ្ឋមន្ត្រីថៃ នៅប៉ុន្មានថ្ងៃមុនចាកចេញទៅកាន់ក្រុងញូវយ៉ក ដើម្បីចូលរួមប្រជុំមហាសន្និបាតអង្គការសហប្រជាជាតិ។ ក្រៅពីថ្លែងការពាររបាយការណ៍សិទ្ធិមនុស្ស លោក ប្រាយុទ្ធ ក៏បាននិយាយការពាររដ្ឋប្រហារឆ្នាំ២០១៤ ដែលបណ្ដេញរដ្ឋាភិបាលលោកស្រី យីងឡាក់ ស៊ីណាវ៉ាត្រា ចេញពីតំណែងដែរ។
ទីភ្នាក់ងារព័ត៌មាន Reuters ផ្សាយថា អតីតមេទ័ពរូបនេះបញ្ជាក់ថា លោកធ្វើរដ្ឋប្រហារ ដើម្បីតែបញ្ចប់អស្ថិរភាព និងនាំយកភាពស្ងប់ស្ងាត់មកវិញប៉ុណ្ណោះ។ មួយវិញទៀត លោក ក៏មិនចង់នៅកាន់អំណាចឲ្យលើសឆ្នាំ២០១៧ដែរ ខណៈការបោះឆ្នោតទូទៅ នឹងធ្វើឡើង បន្ទាប់សេចក្ដីព្រាងរដ្ឋធម្មនុញ្ញ ត្រូវបានយល់ព្រមក្នុងប្រជាមតិខែសីហារួចហើយនោះ។
នៅមុននេះ រដ្ឋាភិបាលយោធា ក៏បានផ្លាស់ប្ដូរដំណើរការកាត់ទោស ដោយបានប្រមូលទោសទាំងអស់ទាក់ទងនឹងសន្តិសុខជាតិ និងទោសប្រមាថស្ដេច ត្រូវទៅកាត់ក្ដីនៅតុលាការស៊ីវិល ជំនួសតុលាការយោធា។ យ៉ាងណាក្ដី ក្រុមការពារសិទ្ធិមនុស្សថៃ រិះគន់ថា នេះគ្រាន់តែការធ្វើឲ្យល្អប៉ុណ្ណោះ ដើម្បីបង្អួតក្រុមប្រឹក្សាសិទ្ធិមនុស្សអង្គការសហប្រជាជាតិ ដែលនឹងពិនិត្យមើលរបាយការណ៍សិទ្ធិមនុស្សនៅថៃនៅទីក្រុងហ្សឺណែវ៕
© រក្សាសិទ្ធិដោយ thmeythmey.com