អន្តរជាតិ
រុស្ស៊ី ថា សមយុទ្ធយោធាខ្លួនជាមួយនឹងចិនក្នុងសមុទ្រចិនខាងត្បូង ជួយរក្សាស្ថិរភាពក្នុងតំបន់
× រដ្ឋាភិបាលក្រុងប៉េកាំង និងរដ្ឋាភិបាលក្រុងម៉ូស្គូ បាននិងកំពុងតែធ្វើលំហាត់យោធាដែនសមុទ្ររួមគ្នាប្រចាំឆ្នាំរយៈពេលប្រាំបីថ្ងៃនៅក្នុងតំបន់ជម្លោះសមុទ្រចិនខាងត្បូង។ សម្រាប់ក្រុងម៉ូស្គូ បានចាត់ទុកសមយុទ្ធនេះ នឹងជួយរឹតបន្តឹងស្ថិរភាពក្នុងតំបន់ឲ្យកាន់តែល្អប្រសើរជាជាងការបំផ្លាញស្ថិរភាពដូចដែលប្រទេសមួយចំនួនបានលើកឡើងនោះ។
«យើង ជឿជាក់ថា រាល់សកម្មភាពដែលកំពុងតែប្រព្រឹត្តនៅទីនោះ(សមុទ្រចិនខាងត្បូង) ត្រូវតែមានការប្រយ័ត្នប្រយែង, តុល្យភាព និងមិនបន្ថែមចលនាអស្ថិរភាព, ប៉ុន្តែ លើសពីនេះ វា ក៏ជួយរឹតបន្តឹងស្ថិរភាព និងការយោគយល់គ្នាដើម្បីដោះស្រាយជម្លោះនោះទេ»។ នេះគឺជាសេចក្តីថ្លែងការណ៍របស់ក្រសួងការពារជាតិរុស្ស៊ីនៅថ្ងៃទី១៥ ខែកញ្ញាម្សិលមិញ ដែលបានចុះផ្សាយដោយគេហទំព័រក្រសួងការពារជាតិចិន។
សេចក្តីថ្លែងការណ៍របស់ក្រសួងការពារជាតិរុស្ស៊ី ត្រូវបានមើលឃើញថាជាសារមួយតបទៅនឹងការព្រួយបារម្ភរបស់អាមេរិកដែលលើកឡើងពីសមយុទ្ធនេះ។ នៅថ្ងៃទីចន្ទទី១២ ខែកញ្ញា ដែលជាថ្ងៃផ្តើមសមយុទ្ធរួមរវាងរុស្ស៊ី និងចិន អ្នកនាំពាក្យក្រសួងការបរទេសអាមេរិក លោក Jonh Kirby បានអះអាងថា ក្រុងវ៉ាស៊ីនតោន សង្ឃឹមថា លំហាត់យោធា ប្រព្រឹត្តឡើងដោយស្របតាមច្បាប់អន្តរជាតិ ហើយនិងមិនបង្កឲ្យមានស្ថានភាពតានតឹងផងដែរ។
សូមរម្លឹកផងដែរថា នៅថ្ងៃទី១២ ខែកញ្ញា កន្លងទៅ ក្រសួងការពារជាតិចិន បានចេញការប្រកាសពីការចាប់ផ្តើមសមយុទ្ធយោធារួមជាមួយនឹងរុស្ស៊ីនៅក្នុងសមុទ្រចិនខាងត្បូងដែលត្រូវប្រព្រឹត្តឡើងពីថ្ងៃទី១២ដល់ថ្ងៃទី១៩ខែកញ្ញា។ តាមរយៈសេចក្តីថ្លែងការណ៍នោះ សមយុទ្ធយោធានោះ មានវត្តមានសព្វាវុធសង្គ្រាមជាច្រើនប្រភេទដូចជា នាវាពិឃាដ, នាវាមុជទឹក, យន្តហោះចម្បាំង, ឧទ្ធម្ភាគចក្រកងជើងទឹក និងយន្តហោះអាចបើកជាប់ទឹកបាន រួមជាមួយនឹងសព្វាវុធយោធាជាច្រើនផ្សេងទៀត។
តាមរយៈសេចក្តីថ្លែងការណ៍ដដែលនោះ សមយុទ្ធយោធារួមរវាងមហាអំណាចទាំងពីរ ផ្តោតលើប្រតិបត្តិការការពារ សង្គ្រោះ និងប្រតិបត្តិការប្រឆាំងនឹងនាវាមុជទឹក។ ហើយសមយុទ្ធយោធានេះ ត្រូវធ្វើឡើងតាមទម្លាប់ ដែលក្រុងប៉េកាំង អះអាងថាដើម្បីពង្រឹងសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយរវាងចិន និងរុស្ស៊ី ពោលគឺ ចិន ថា មិនសំដៅលើភាគីទីបីណាឡើយ។
សូមជម្រាបជាថ្មីផងដែរថា ចិន និងរុស្ស៊ី បានចាប់ផ្តើមសមយុទ្ធយោធារួមគ្នាក្នុងដែនសមុទ្រតាំងពីឆ្នាំ២០១២មកម្ល៉េះ។ ហើយសមយុទ្ធយោធាក្នុងសមុទ្រចិនខាងត្បូងនេះ គឺជាសមយុទ្ធរួមលើកទី៥ហើយ។ កាលពីឆ្នាំមុន ភាគីទាំងពីរ ក៏បានធ្វើសមយុទ្ធលក្ខណៈបែបនេះដែរ នៅក្នុងសមុទ្រជប៉ុន។
បើទោះបីជា រដ្ឋាភិបាលក្រុងប៉េកាំង អះអាងថាសមយុទ្ធយោធារបស់ខ្លួនជាមួយនឹងរុស្ស៊ី ធ្វើឡើងតាមទម្លាប់ក៏ដោយ គេសង្កេតឃើញថា រយៈពេលចុងក្រោយនេះ ក្រុងប៉េកាំង បានធ្វើសមយុទ្ធយោធាជាញឹកញាប់នៅក្នុងសមុទ្រចិនខាងត្បូង។ ក្នុងនោះ នៅមុនពេលនៃការប្រកាសសាលក្រមរបស់តុលាការអន្តរជាតិលើសំណុំរឿងសមុទ្រចិនខាងត្បូងមួយសបា្តហ៍ និងក្នុងថ្ងៃនៃការប្រកាសសាលក្រមនោះ ក្រុងប៉េកាំង ក៏បានធ្វើសមយុទ្ធទ្រង់ទ្រាយនៅថ្ងៃបន្តបន្ទាប់គ្នានៅក្នុងសមុទ្រចិនខាងត្បូងផងដែរ៕
Tag:
រុស្ស៊ី
ចិន
សមុទ្រចិនខាងត្បូង
© រក្សាសិទ្ធិដោយ thmeythmey.com