អន្តរជាតិ
អង់គ្លេសចេញពីអឺរ៉ុប មិនធ្វើឲ្យអឺរ៉ុបស្លាប់ឡើយ, គ្រាន់តែចុះខ្សោយ
× មកទល់ពេលនេះ ជិតបីខែហើយ បន្ទាប់ពីចក្រភពអង់គ្លេសធ្វើប្រជាមតិចាកចេញពីសហភាពអឺរ៉ុប ។ ឥទ្ធិពលអឺរ៉ុប បានធ្លាក់ចុះបន្ទាប់ពីការចាកចេញនេះ បើទោះជាក្រុងឡុងដ៍មិនទាន់ប្រកាសផ្លូវការពីអនុវត្តតាមមាត្រា៥០ នៃសន្ធិសញ្ញា Lisbon ក្ដី។ វាច្បាស់ណាស់ថា ការចាកចេញរបស់អង់គ្លេស ធ្វើឲ្យអឺរ៉ុបកាន់តែលំបាក ព្រោះបាត់បង់បង្គោលដ៏រឹងមាំ ដែលតែងជួយជ្រោងអឺរ៉ុបរហូតមកជាមួយរដ្ឋសមាជិកដទៃទៀត ដូចជាបារាំង និងអាល្លឺម៉ង់ជាដើមនោះ។ ប៉ុន្តែមេដឹកនាំអឺរ៉ុបអះអាងថា ការចាកចេញនេះមិនអាចសម្លាប់អឺរ៉ុបឡើយ។
ការបោះឆ្នោតចាកចេញពីសហភាពអឺរ៉ុបរបស់ចក្រភពអង់គ្លេស ជាការមកដល់ទីបញ្ចប់នៃការពង្រីកវិសាលភាពអឺរ៉ុប ក៏ដូចជាសមាហរណកម្មតំបន់ក្នងរយៈពេលជាង៥០ឆ្នាំមកនេះដែរ។ បើទោះជាចក្រភពអង់គ្លេសមិនទាន់ចាកចេញភ្លាមៗក៏ដោយចុះ បញ្ហាជាច្រើនបានលេចជារូបរាងបណ្ដើរៗហើយ រួមទាំងការវាយប្រហារភេរវកម្ម ស្ថានភាពហិរញ្ញវត្ថុ និងការបែកបាក់ក្នុងចំណោមសមាជិកអឺរ៉ុបពាក់ព័ន្ធរឿងបែងចែកជនភៀសខ្លួន។
វិបត្តិសេដ្ឋកិច្ច និងហិរញ្ញវត្ថុជាច្រើនឆ្នាំមកនេះ ធ្វើឲ្យអត្រាអ្នកគ្មានការងារកើនឡើងយ៉ាងខ្លាំងនៅតាមប្រទេសជាសមាជិករបស់សហភាពអឺរ៉ុប។ ជាមួយគ្នានេះ ការកើនឡើងការវាយប្រហារភេរវកម្ម និងលំហូរជនភៀសខ្លួនកាន់តែច្រើនពីមជ្ឈិមបូព៌ា បានបង្កើនប្រជាប្រិយភាពរបស់ក្រុមបក្សនយោបាយប្រឆាំងអឺរ៉ុប ជាពិសេសប្រទេសនៅតំបន់អឺរ៉ុបខាងកើត។
នៅថ្ងៃទី១៦ ខែកញ្ញា បណ្ដាមេដឹកនាំសហភាពអឺរ៉ុបមកប្រជុំគ្នានៅទីក្រងប្រាទីស្លាវ៉ា ប្រទេសហុងគ្រី ដើម្បីពិភាក្សារកដំណោះស្រាយជាក់លាក់សម្រាប់ដោះស្រាយបញ្ហាប្រឈមទាំងនេះ។ មុនកិច្ចប្រជុំមកដល់ ប្រធានក្រុមប្រឹក្សាអឺរ៉ុប លោក Donald Tusk បញ្ជាក់ថា អ្វីដែលគួរធ្វើនៅក្រោយការចាកចេញរបស់អង់គ្លេស គឺអឺរ៉ុបត្រូវធ្វើខ្លូនឲ្យរឹងមាំ និងត្រូវវាយតម្លៃស្ថានការណ៍ឲ្យច្បាស់លាស់។
១. លោក ចាំងកឺ ៖ ការចាកចេញរបស់អង់គ្លេស មិនអាចសម្លាប់អឺរ៉ុបឡើយ
វាជាការពិតដែលការចាកចេញរបស់ចក្រភពអង់គ្លេស ធ្វើឲ្យអឺរ៉ុបធ្លាក់ខ្សោយព្រោះបាត់ជន្ទល់រឹងមាំមួយ តែមិនមែនមានន័យថា ការចាកចេញនេះ អាចសម្លាប់សហភាពអឺរ៉ុបបានឡើយ។ ប្រធានគណៈកម្មាការអឺរ៉ុប លោក ហ្សង់-ក្លូដ ចាំងកឺ (Jean-Claude Juncker) ក៏អះអាងថា សហភាពអឺរ៉ុប មិនត្រូវលិចលង់ដោយសាររឿងនេះទេ ហើយលោកក៏បានដាក់ចេញផែនការមួយចំនួនដើម្បីស្ដារស្ថានការណ៍ផងដែរ។
ថ្លែងទៅកាន់កិច្ចប្រជុំសភាអឺរ៉ុបនៅថ្ងៃទី១៤ ខែកញ្ញា ប្រធានគណៈកម្មការរូបនេះបានទទូចឲ្យសមាជិកសហភាពអឺរ៉ុបទាំងអស់ រួមគ្នាដើម្បីជម្នះការបែកបាក់នៅក្នុងតំបន់ ក៏ដូចជាការចាកចេញរបស់អង់គ្លេសដែរ។ មិនតែប៉ុណ្ណោះ លោកក៏បានព្រមានអង់គ្លេស ដែលចង់ប្រើប្រាស់ទីផ្សារតែមួយរបស់អឺរ៉ុប តែបន្តរឹតត្បិតនយោបាយជនអន្តោប្រវេសន៍។
យោងតាមទីភ្នាក់ងារព័ត៌មាន AFP លោក ចាំងកឺ ក៏លើកសំណើបង្កើនទឹកប្រាក់វិនិយោគឲ្យដល់៦៣០ពាន់លានអឺរ៉ូ និងប្រកាសចាត់វិធានការជួយយុវជនឲ្យមានការងារធ្វើដែរ បន្ទាប់ពីរងគ្រោះដោយសារវិបត្តិបំណុលអឺរ៉ុបនោះ។ លើសពីនោះលោកក៏បានលើកឡើងពីលទ្ធភាពនៃការបង្កើតទីបញ្ជាការរួមកងទ័ពអឺរ៉ុប ដើម្បីបំពេញបន្ថែមលើកងកម្លាំងណាតូដែលមានស្រាប់ហើយនោះ។
២. សមាជិកអឺរ៉ុប កំពុងប្រឈមមុខបញ្ហាផ្ទៃក្នុង
នៅពេលនេះ សហភាពអឺរ៉ុប កំពុងតែស្វះស្វែងរកដំណោះស្រាយសម្រាប់អនាគតរបស់ខ្លួន ក្រោយប្រជាមតិចាកចេញរបស់ចក្រភពអង់គ្លេសនៅខែមិថុនា ខណៈអឺរ៉ុបនឹងប្រារព្ធខួបលើកទី៦០នៃសន្ធិសញ្ញាក្រុងរ៉ូមនៅឆ្នាំក្រោយ។ សហភាពអឺរ៉ុប ត្រូវរកច្រកចេញដែលប្រសើរមួយ សម្រាប់ជំហានទៅមុខដោយគ្មានចក្រភពអង់គ្លេស ដែលជាសសរស្តម្ភដ៏សំខាន់របស់ខ្លួននោះ។
យ៉ាងណាក្ដី ដំណោះស្រាយជាក់លាក់ណាមួយនោះ ទំនងជាពិបាកនឹងលេចជារូបរាងណាស់។ នេះក៏ដោយសារតែបញ្ហានៅក្នុងរដ្ឋជាសមាជិករបស់អឺរ៉ុប ជាពិសេសសមាជិកសំខាន់ដូចជាបារាំង អាល្លឺម៉ង់ និងអ៊ីតាលីជាដើម។ បារាំង អាល្លឺម៉ង់ និងហូឡង់ នឹងមានការបោះឆ្នោតរើសមេដឹកនាំថ្មីនៅឆ្នាំ២០១៧ ដែលនេះមានន័យថាអឺរ៉ុបនឹងប្រឈមមុខការផ្លាស់ប្ដូរមិនខាន។
នៅបារាំង និងអាល្លឺម៉ង់ បេក្ឋជនដែលមកប្រជែងយកតំណែងលោក ហ្វ្រង់ស្វ័រ ហូឡង់ និងលោកស្រី Angela Merkel សុទ្ធតែគោលនយោបាយប្រឆាំងនឹងគោលការណ៍របស់អឺរ៉ុប។ មេដឹកនាំគណបក្ស «រណសិរ្សជាតិ»បារាំងលោកស្រី Marine Le Pen បានសន្យាជាថ្មីថា បើលោកស្រីជាប់ឆ្នោត ប្រជាមតិមួយនឹងត្រូវរៀបចំដើម្បីបើកផ្លូវឲ្យបារាំងចាកចេញពីសហភាពអឺរ៉ុប។ អ្នកនយោបាយរូបនេះនឹងឈរឈ្មោះបោះឆ្នោតប្រធានាធិបតីក្នុងឆ្នាំ ២០១៧ ដើម្បីប្រជែងបេក្ខជនផ្សេងទៀតរួមជាមួយអតីតប្រធានាធិបតី នីកូឡា សាកូហ្ស៊ីផង។
ចំណែកអធិការបតីអាល្លឺម៉ង់ ដែលកំពុងដើរតួនាទីជាមេដឹកនាំអឺរ៉ុបនោះ ក៏រងសម្ពាធពីនយោបាយក្នុងស្រុកដើរជុំវិញគោលនយោបាយស្វាគមន៍ជនភៀសខ្លួនរបស់លោកស្រី។ ក្រៅពីនោះ លោកស្រី ក៏មិនអាចបញ្ចុះបញ្ចូលប្រទេសអឺរ៉ុបខាងកើតដូចជា ប៉ូឡូញ ហុងគ្រី និងឆែក ឲ្យយល់ព្រមទទួលផែនការបែងចែកកូតាជនភៀសខ្លួនរបស់អឺរ៉ុបដែរ ហើយបែរជាចង់ទទួលជនភៀសខ្លួនតាមចិត្តរបស់ខ្លួនវិញ។
ដោយឡែកនៅអ៊ីតាលីវិញ នាយករដ្ឋមន្ត្រី Matteo Renzi ក៏ប្រកាសទុកមុនថា លោកនឹងលាលែងពីតំណែងនៅចុងឆ្នាំនេះ ប្រសិនប្រជាមតិលើការវិសោធនកម្មរដ្ឋធម្មនុញ្ញរបស់លោក បរាជ័យ។ ក្នុងករណីប្រជាមតិបរាជ័យ ហើយលោក Renzi ចាកចេញមែននោះ បញ្ហានឹងរាលដាលដល់អឺរ៉ុប ដែលកំពុងតែជួបប្រទះបញ្ហាស្រាប់ផងនោះ ហើយគេក៏មិនដឹងថា មេដឹកនាំថ្មី នឹងមានគោលនយោបាយដូចលោកឬអត់ដែរ។
ដូចឃើញស្រាប់ សហភាពអឺរ៉ុប កំពុងស្ថិតក្នុងស្ថានភាពមិនច្បាស់លាស់ និងរុំព័ទ្ធដោយបញ្ហា ក្រោយការចាកចេញរបស់អង់គ្លេស បើទោះជាអង់គ្លេសមិនទាន់អនុវត្តតាមមាត្រា៥០ នៃសន្ធិសញ្ញា Lisbon ក្ដី។ ប៉ុន្តែមេដឹកនាំអឺរ៉ុប ជាពិសេសបារាំង និងអាល្លឺម៉ង់ ដែលតែងដើរតួសំខាន់ក្នុងការដឹកនាំអង្គការតំបន់មួយនេះ នៅបន្តប្ដេជ្ញាចិត្តជំរុញការលូតលាស់របស់សហភាពអឺរ៉ុប នៅពេលខាងមុខទៀត៕
Tag:
សហភាពអឺរ៉ុប
Brexit
Jean-Claude Juncker
Angela Merkel
© រក្សាសិទ្ធិដោយ thmeythmey.com