ជប៉ុនឲ្យ​ថវិកា​ជាង ២​លាន​ដុល្លារ​ដល់ WFP សម្រាប់​ជួយ​កុមារ​កម្ពុជា​
ជាតិ
សង្គមជាតិ
ជប៉ុនឲ្យ​ថវិកា​ជាង ២​លាន​ដុល្លារ​ដល់ WFP សម្រាប់​ជួយ​កុមារ​កម្ពុជា​
23, Sep 2016 , 6:49 pm        
រូបភាព
ដោយ: ថ្មីៗ
ភ្នំពេញ​៖ ជប៉ុន​បានផ្តល់​ថវិកា​ចំនួន ២២០​លាន​យ៉េន ស្មើនឹង​ប្រមាណ ២​លាន​ដុល្លារ​អាមេរិក​ដល់​កម្មវិធី​ស្បៀងអាហារ​ពិភពលោក (World Food Programme) សម្រាប់​ជួយ​ផ្គត់ផ្គង់ អាហារូបត្ថម្ភ​ដល់កុមារ​ក្រីក្រ នៅ​កម្ពុជា​។​



​លោក  គូ​ម៉ា​ម៉ា​រូ យូ​ជិ (KUMAMARU Yuji) ឯកអគ្គរដ្ឋទូត​ជប៉ុន​ប្រចាំ​កម្ពុជា និង​លោក Gianpictro Bordignon ប្រធាន​​កម្មវិធី​ស្បៀងអាហារ​ពិភពលោក​ប្រចាំ​កម្ពុជា បាន​ចុះហត្ថលេខា ជំនួយ​​ថវិកា​ជាង ២​លាន​ដុល្លារ​អាមេរិក​នេះ ក្នុង​ស្ថានទូត​ជប៉ុន​ប្រចាំ​​កម្ពុជា នៅ​ថ្ងៃទី​២៣​ ខែកញ្ញា​នេះ​។​

​លោក  គូ​ម៉ា​ម៉ា​រូ យូ​ជិ (KUMAMARU Yuji) បាន​សាទរ​នឹង​គម្រោង​ជួយផ្តល់​អាហារូបត្ថម្ភ ដល់​កុមារ​កម្ពុជា ដោយ​លោក​ថ្លែង​ក្នុង​ពិធី​ចុះហត្ថលេខា​នេះ​ថា ជំនួយ​ជប៉ុន​ដែល​ផ្តល់​ឲ្យ WFP នឹង​ផ្គត់ផ្គង់​ជា​អាហារូបត្ថម្ភ​ដល់​កុមារ​ក្រីក្រ ក្នុង​សាលារៀន​នៅតាម​សហគមន៍ ជនបទ​មួយចំនួន ដូចជា ខេត្តពោធិ៍សាត់ បាត់ដំបង ឧ​ត្ត​រ​មានជ័យ កំពង់ស្ពឺ ព្រៃវែង កំពង់ធំ និង​សៀមរាប ជាដើម​។​

​លោក​ជឿជាក់ថា ការជួយ​គាំទ្រ​របស់​រដ្ឋាភិបាល​ជ​ប៉ុន តាមរយៈ WFP ដល់​ក្រុមគ្រួសារ​កុមារ​ទាំងនោះ នឹង​លើកទឹកចិត្ត​ឱ​ពុក​ម្តាយ​កុមារ​ឲ្យ​បញ្ជូន​ពួកគេ​ចូល​សិក្សា​រៀនសូត្រ ក្នុង​សាលារៀន​គ្រប់ៗ​គ្នា ជៀសវាង​ជម្រុញ​ពួកគេ​ឱ្យធ្វើ​ការងារ​ដោយ​បោះបង់​ការសិក្សា​។​

​តាម​លោក  គូ​ម៉ា​ម៉ា​រូ យូ​ជិ WFP នឹងផ្តល់​ត្រីខកំប៉ុង​ផលិត​ផល​ជប៉ុន​ចំនួន ២៩០​តោន ដល់កុមា​រទាំង​នោះដែរ​។​

​ជាមួយគ្នា​ដែរ លោក Gianpictro Bordignon បាន​រៀបរាប់​ពី​ជំនួយ​របស់​ជប៉ុន​នេះ ផ្តោត លើ​គម្រោង ២ សំខាន់ រួមមាន ទី​១, កិច្ចសហការ​ជាមួយ ក្រសួង​អប់រំ​កម្ពុជា ដើម្បី លើកកម្ពស់​អាហារូបត្ថម្ភ និង​ការសិក្សា​រៀនសូត្រ​ដល់​កុមារ និង​គម្រោង​ទី​២ កិច្ចសហប្រតិបត្តិការ លើ​ការ​អភិវឌ្ឍន៍ជនបទ ពិសេស​លើ​ការប្រែប្រួល អាកាសធាតុ ដោយ​សហការ​ជាមួយ អង្គការ NGO ក្នុង​ការជួយ​ជនរងគ្រោះ​ដោយសារ​គ្រោះមហន្តរាយ ធម្មជាតិ​នានា​។​

តាម លោក Gianpictro Bordignon នេះ​ជា​ជំនួយ​ចុងក្រោយ​ដែល​រដ្ឋាភិបាល​ជប៉ុន​បានផ្តល់​ដល់​កម្មវិធី​ស្បៀងអាហា​ពិភពលោក (WFP) ចំណោម​ប្រទេស​ជាង ៧០​ប្រទេស​នៅ​ជុំវិញ ពិភពលោក​។ លោក​ចាត់ទុក​ជំនួយ​នេះ ពិតជា​មាន​សារៈសំខាន់​សម្រាប់​ជួយ​កុមារ​កម្ពុជា ដើម្បី​ជួយផ្តល់​អាហារូបត្ថម្ភ​ចំពោះ​កុមារ និង​សម្រួល​ដល់​ជីវភាព​គ្រួសារ​របស់​ពួកគេ​។​

«​កុមារ​កម្ពុជា​ក្រីក្រ​ប្រមាណ​ជា​៣៥​ម៉ឺន​នាក់ និង​គ្រួសារ​ក្រីក្រ​ជា​មធ្យម ប្រមាណ​៦​ម៉ឺន​គ្រួសារ នឹង​ទទួល​ជំនួយ​ទាំងនេះ ដូចជា អង្ករ ត្រីខកំប៉ុង ដែលមាន​ប្រួ​តេ​អ៊ី​ន​គ្រប់គ្រាន់ ដល់​ការសិក្សា​របស់​កុមារ​»​។ លោក Gianpictro Bordignon បញ្ជាក់​។​

ទន្ទឹមគ្នានេះ ប្រធាន WFP រូបនេះ បាន​សង្កេត​ផ្អែកលើ​កំណើនសេដ្ឋកិច្ច​កម្ពុជា មានការ​រ​រីកចំរើន ដូចនេះ​ក្រសួង​អប់រំ​នឹង​ទទួល​គម្រោង​នេះ​ដោយផ្ទាល់ ដើម្បី​ជួយ​កុមារ នៅ​ថ្ងៃ​អនាគត​។ ហើយ​ថា WFP នៅតែ​បន្ត​ជួយ​ជម្រុញ​បច្ចេកទេស​បន្ថែម ដើម្បីឱ្យ​ក្រសួង​មានលទ្ធភាព​គ្រប់គ្រង​កម្មវិធី​ជាតិ​ដោយផ្ទាល់​៕


Tag:
 ​គូ​ម៉ា​ម៉ា​រូ យូ​ជិ​
  WFP
© រក្សាសិទ្ធិដោយ thmeythmey.com