អន្តរជាតិ
ហៃទី៖ យ៉ាងហោច ៣៣០នាក់ស្លាប់ដោយសារព្យុះ Matthew មហន្តរាយនៅហៃទី ដោយសារព្យុះ Matthews (រូបភាព Xinhua)
× ក្រុមមន្ត្រីហៃទី និយាយថា ព្យុះសង្ឃរា Matthews បានឆក់យកជីវិតមនុស្សដល់ទៅ៣៣០នាក់ហើយ ក្រោយព្យុះនេះបក់បោកមកលើដែនកោះនេះ ដោយនាំយកទាំងខ្យល់ខ្លាំង និងភ្លៀងធ្លាក់ខ្លាំងមកនោះ។ ហេដ្ឋារចនាសម្ព័ន្ធជាច្រើនត្រូវបានបំផ្លាញដោយសារឥទ្ធិពលដ៍ខ្លាំងនៃព្យុះ Matthews ហើយប្រជាជនហៃទីដែលរងគ្រោះ កំពុងដង្ហើយហៅជំនួយបន្ទាន់ដែរ។
ខ្យល់ព្យុះ Matthews បានបក់បោកលើកោះហៃទីកាលពីថ្ងៃទី៤ ខែតុលា ដោយមានទាំងភ្លៀងមកជាមួយផង។ កម្លាំងដ៏ខ្លាំងនៃព្យុះនេះ បានសម្លាប់ជីវិតមនុស្សជាច្រើន ដោយមន្ត្រីក្នុងស្រុកនិយាយនៅថ្ងៃទី៦ ខែតុលា ថា អ្នកស្លាប់កើនដល់៣៣០នាក់ហើយ ស្របពេលដែលការជួយសង្គ្រោះ កំពុងបន្តធ្វើយ៉ាងសស្រាក់សស្រាំ ហើយក្រុមជួយសង្គ្រោះ ក៏កំពុងតស៊ូនឹងអាកាសធាតុអាក្រក់ ដើម្បីចូលទៅតំបន់ដាច់ស្រយាលនានា។
សារព័ត៌មាន The Guardian ផ្សាយថា ព្យុះ Matthews នេះមានកម្លាំងខ្យល់ដល់ទៅ១៤៥ម៉ៃយ៍ក្នុងមួយម៉ោង ដែលបានបំផ្លាញផ្ទះច្រើនជាងបីពាន់ខ្នង និងបង្ខំឲ្យមនុស្សច្រើនជាងមួយម៉ឺននាក់ ចាកចេញពីផ្ទះសម្បែង ព្រមទាំងបំផ្លាញដំណាំផងដែរ។ ជាមួយគ្នា ចំនួនសាកសពអ្នកស្លាប់ ក៏ត្រូវបានរកឃើញច្រើនថែមទៀតដែរ។
បើតាមសារព័ត៌មានដដែល បន្ទាប់ពីវាយប្រហារហៃទី ព្យុះ Matthews នេះ ក៏បានតម្រង់ទៅកាន់រដ្ឋ Florida របស់អាមេរិក នៅវេលាយប់ថ្ងៃទី៦ ខែតុលា។ ហើយវាក៏ក្លាយជាព្យុះកំណាចដំបូងគេក្នុងរយៈពេល១០ឆ្នាំមកនេះ ដែលអាចនឹងវាយប្រហារទឹកដីអាមេរិកដោយផ្ទាល់។ ជាការបង្ការទុកមុននោះ ប្រធានាធិបតី អូបាម៉ា ក៏បានប្រកាសស្ថានភាពអាសន្ននៅរដ្ឋមួយចំនួនផងដែរ។
ដោយសារព្យុះ Matthews វាយប្រហារខ្លាំងពេក ដំណើរការជួយសង្គ្រោះ កំពុងប្រឈមមុខនឹងបញ្ហា ដ្បិតហេដ្ឋារចនាសម្ព័ន្ធតភ្ជាប់ និងប្រព័ន្ធគមនាគមន៍ភាគច្រើន ត្រូវបានកាត់ផ្ដាច់ស្ទើរទាំងស្រុងទៅហើយ។ ទាំងរដ្ឋាភិបាលហៃទី និងក្រុមការងារជួយសង្គ្រោះរបស់អង្គការសហប្រជាជាតិ មិនអាចចូលដល់តំបន់ដាច់ស្រយាល ដែលរងគ្រោះបានឡើយ ហើយគេបារម្ភថា ការពន្យារពេលនេះ នឹងធ្វើឲ្យចំនួនអ្នកស្លាប់កើនឡើងច្រើនទៀត។
ប្រទេសហៃទី ដែលមិនទាន់ងើបខ្លួនរួចពីគ្រោះរញ្ជួយដីឆ្នាំ២០១០ នឹងត្រូវដោះស្រាយវិបត្តិដែលកើតឡើងដោយសារព្យុះ Matthews នេះ ហើយការស្វះស្វែងរកជំនួយ ជារឿងអាទិភាព។ នេះក៏ដោយសារតែប្រទេសតំបន់ការ៉ាអ៊ីបមួយនេះ ជារដ្ឋក្រីក្រខ្លាំង និងរស់នៅពឹងផ្អែកតែលើជំនួយអន្តរជាតិប៉ុណ្ណោះ៕
© រក្សាសិទ្ធិដោយ thmeythmey.com