អន្តរជាតិ
ប្រជាប្រិយភាពលោក អូបាម៉ា កើនខ្ពស់ខ្លាំង ប៉ុន្មានខែមុនចេញពីតំណែង
× ប្រជាប្រិយភាពលោក បារ៉ាក់ អូបាម៉ា កើនឡើងខ្ពស់ហួសក្នុងអាណត្តិទី២ និងក្នុងរយៈពេលប៉ុន្មានខែចុងក្រោយមុនពេលលោកចេញពីតំណែង។ យោងតាមរបាយការណ៍ស្ទង់មតិរបស់សារព័ត៌មាន Huffington Post ភាគរយនៃប្រជាជនអាមេរិកជាសមាជិកបក្សធំៗទាំងពីរ និងអ្នកឯករាជ្យដែលយល់ឃើញថាលោកអូបាម៉ា បំពេញការងារបានល្អ បានកើនឡើងជាបន្តបន្ទាប់។
សូមស្ដាប់ព័ត៌មានលម្អិត៖
នៅសល់ប៉ុន្មានខែទៀតប៉ុណ្ណោះលោក បារ៉ាក់ អូបាម៉ា នឹងចាកចេញពីតំណែង។ លោកប្រហែលនឹងក្លាយជាប្រធានាធិបតីដែលទទួលបានការគាំទ្រខ្ពស់បំផុតក្នុងពេលកំពុងបន្តកាន់តំណែងនៅអាណត្តិទី២។
យោងតាមរបាយការណ៍ស្ទង់មតិដែលរៀបចំឡើងដោយសារព័ត៌មានអាមេរិក Huffington Post ភាគរយនៃចំនួនអ្នកគាំទ្រ ការបំពេញការងាររបស់លោក បារ៉ាក់ អូបាម៉ា កើនឡើងគួរឲ្យកត់សម្គាល់។ ហើយការកើនឡើងនៃចំនួនអ្នកគាំទ្រលោកនេះមានទាំងសមាជិកបក្សប្រជាធិបតេយ្យ, បក្សសាធារណរដ្ឋ និងអ្នកឯករាជ្យផង។
ក្នុងចំណោមសមាជិកបក្សប្រជាធិបតេយ្យ ភាគរយនៃចំនួនអ្នកគាំទ្រលោក បារ៉ាក់ អូបាម៉ា មានដល់ ៨៩ភាគរយ ដោយវាកើនឡើង ១២ ខ្ទង់។ ចំណែកក្នុងចំណោមអ្នកឯករាជ្យវិញ ភាគរយនៃអ្នកដែលគាំទ្រលោកមានសរុប ៥៦ ភាគរយដោយវាកើនឡើងដល់ ១៤ ភាគរយ ។ ហើយ ភាគរយនៃអ្នកគាំទ្រលោកក្នុងចំណោមអ្នកសាធារណរដ្ឋមានចំនួន ១៣ ភាគរយ ដោយវាកើនឡើង ២ភាគរយដែរ។
ជាធម្មតា ការបំពេញការងាររបស់លោក បារ៉ាក់ អូបាម៉ា បានទទួលការគាំទ្រច្រើនដោយសារកត្តាច្រើនដែលក្នុងនោះមានទាំងនយោបាយសេដ្ឋកិច្ច សន្តិសុខនិងនយោបាយការបរទេសផង។ ការខិតខំបង្កើនការងារសម្រាប់ប្រជាជនអាមេរិកជាបន្តបន្ទាប់ចាប់តាំងពីក្រោយវិបត្តិសេដ្ឋកិច្ចសកលរបស់លោក អូបាម៉ា បានទាក់ទាញការគាំទ្រខ្លាំងក្នុងរយៈពេលចុងក្រោយ។
យ៉ាងណាក៏ដោយ ប្រជាប្រិយភាពរបស់លោក កើនឡើងអាចបណ្តាលមកកត្តាច្រើនមែន តែគេមិនអាចភ្លេចទេថា បេក្ខជនប្រធានាធិបតីទាំងពីរដែលកំពុងប្រជែងគ្នាដើម្បីជំនួសលោកនោះ ធ្វើឲ្យលោកកាន់តែទទួលបានការគាំទ្រច្រើនថែមទៀត។ នេះក៏ដោយសារបេក្ខជនប្រធានាធិបតីទាំងពីរធ្វើឲ្យប្រជាជនអាមេរិកមើលឃើញថា ប្រធានាធិបតីបច្ចុប្បន្នមានសមត្ថភាពនិងបំពេញការងារបានល្អ ហើយពួកគេក៏មើលឃើញភាពខុសប្លែកគ្នាដាច់រវាងអ្នកដែលនឹងមកជំនួសតំណែងលោក និងលោក អូបាម៉ា ខ្លួនឯង។
យ៉ាងណាក៏ដោយចុះ ជាទម្លាប់ ប្រជាប្រិយភាពខ្ពស់របស់ប្រធានាធិបតីជិតផុតអាណត្តិ តែងជួយលើកប្រជាប្រិយភាពបេក្ខជនប្រធានាធិបតីមកពីបក្សជាមួយគ្នា។ ប៉ុន្តែ ប្រជាប្រិយភាពខ្ពស់របស់លោក បារ៉ាក់ អូបាម៉ា ហាក់មិនជួយដល់លោកស្រី ហ៊ីឡារី គ្លីនតុន សោះ។ យោងតាមសារព័ត៌មាន CNN មកទល់ពេលនេះ ត្រឹម ៤១ ភាគរយចំនួនអ្នកចុះឈ្មោះបោះឆ្នោតប៉ុណ្ណោះដែលគាំទ្រលោកស្រី ហ៊ីឡារី គ្លីនតុន ខណៈ ៥៦ ភាគរយទៀតមិនពេញចិត្តលោកស្រីឡើយ៕
Tag:
បារ៉ាក់ អូបាម៉ា
ដូណាល់ ត្រាំ
ហ៊ីឡារី គ្លីនតុន
© រក្សាសិទ្ធិដោយ thmeythmey.com