អ៊ីរ៉ង់ ចាប់យកវៀតណាមជាមូលដ្ឋានដើម្បីធ្វើពិពិធកម្មពាណិជ្ជកម្មនៅតំបន់អាស៊ី

អន្តរជាតិ

អ៊ីរ៉ង់ ចាប់យកវៀតណាមជាមូលដ្ឋានដើម្បីធ្វើពិពិធកម្មពាណិជ្ជកម្មនៅតំបន់អាស៊ី

07, Oct 2016 , 9:59 pm

រូបភាព

លោកប្រធានាធិបតីអ៊ីរ៉ង់ Hassan Rouhani (ឆ្វេង) នាជំនួបជាមួយលោក Nguyen Phu Trong អគ្គលេខាធិការបក្សកុំម្មុយនីស្តវៀតណាម។ រូប IRNA

ដោយ:

រដ្ឋាភិបាលក្រុងតេហេរ៉ង់ ប្រកាសពង្រីកទំនាក់ទំនងទ្វេភាគី និងជាពិសេសនោះ បង្កើនទំហំពាណិជ្ជកម្ម និងការវិនិយោគជាមួយនឹងរដ្ឋាភិបាលក្រុងហាណូយ។ ក្រុងតេហេរ៉ង់ ក៏បានបង្ហាញពីចេតនាក្នុងការចាប់យកវៀតណាមជាដៃគូស្នូល និងជាមូលដ្ឋានដើម្បីធ្វើពិពិធកម្មសកម្មភាពពាណិជ្ជកម្មរបស់ខ្លួននៅក្នុងតំបន់ ខណៈ ក្រុងហាណូយ ក៏ប្តេជ្ញាពង្រីកកិច្ចសហប្រតិបត្តិការ និងទំនាក់ទំនងទ្វេភាគីជាមួយអ៊ីរ៉ង់ឲ្យតែច្រើនវិញផងដែរ។

លោកប្រធានាធិបតីអ៊ីរ៉ង់ Hassan Rouhani នៅថ្ងៃទី០៦ ខែតុលា ម្សិលមិញនេះ បានជួបពិភាក្សាជាមួយនឹងមេដឹកនាំកំពូលវៀតណាម រួមមានលោកអគ្គលេខាបក្សកុម្មុយនីសវៀតណាម Nguyen Phu Trong និងលោកនាយករដ្ឋមន្ត្រីវៀតណាម Nguyễn Xuân Phúc ក្នុងដំណើរទស្សនកិច្ចផ្លូវការទៅកាន់ក្រុងហាណូយ។ ក្នុងជំនួបដាច់ដោយឡែកនោះ ភាគីទាំងពីរ សម្រេចបានកិច្ចព្រមព្រៀងជាច្រើន ដែលភាគច្រើនផ្តោតលើផលប្រយោជន៍សេដ្ឋកិច្ច។

នៅក្នុងជំនួបជាមួយនឹងលោកនាយករដ្ឋមន្ត្រីវៀតណាម លោកប្រធានាធីបតី Rouhani បានប្រាប់ភាគីវៀតណាមឲ្យដឹងពីទិសដៅរបស់លោកមកកាន់តំបន់អាស៊ី ដោយលោក សង្កត់ធ្ងន់ថា ការពង្រីកទំនាក់ទំនងជាមួយនឹងប្រទេសអាស៊ីអាគ្នេយ៍ ជាពិសេស វៀតណាមតែម្តងនោះ គឺជាទិសដៅចម្បងបំផុតរបស់អ៊ីរ៉ង់។ នេះបើយោងតាមការចុះផ្សាយរបស់សារព័ត៌មានអ៊ីរ៉ង់ Press TV។

លោកប្រធានាធិបតីអ៊ីរ៉ង់រូបនោះ ថែមទាំងប្រាប់លោកនាយករដ្ឋមន្ត្រីវៀតណាមថា វៀតណាម អាចក្លាយជាមូលដ្ឋានមួយសម្រាប់ សកម្មភាពពាណិជ្ជកម្មរបស់អ៊ីរ៉ង់នៅក្នុងតំបន់ ហើយ វៀតណាម ក៏អាចទទួលបានផលប្រយោជន៍សេដ្ឋកិច្ចតាមរយៈការដំណើរការនៅក្នុងប្រទេសអ៊ីរ៉ង់ដែលមានទីផ្សារប្រជាជនរហូត៤០០លាននាក់ផងដែរនោះ។

មិនខុសពីជំនួបជាមួយនឹងនាយករដ្ឋមន្ត្រីវៀតណាម ប្រមុខនីតិប្រតិបត្តិអ៊ីរ៉ង់រូបនោះ បានជជែកច្រើនជាមួយនឹងលេខាធិការបក្សកុម្មុយនីស្តវៀតណាមលើផលប្រយោជន៍សេដ្ឋកិច្ចដែរ។ លោក បានប្រាប់ប្រមុខបក្សវៀតណាមថា ដំណើរទស្សនកិច្ចផ្លូវការមកកាន់តំបន់អាស៊ីអាគ្នេយ៍ ជាពិសេសក្នុងប្រទេសវៀតណាម ជា«ការបើកទំព័រថ្មីនៃទំនាក់ទំនងតេហេរ៉ង់ និងហាណូយ»។ លោក Rouhani ក៏បានអះអាងថាវិស័យឯកជនរបស់អ៊ីរ៉ង់ ដែលរាប់បញ្ចូលទាំងផ្នែកធនាគារ បានត្រៀមខ្លួនរួចជាស្រេចហើយដើម្បីធ្វើការជាមួយនឹងវៀតណាម។

ជាការឆ្លើយតបទៅនឹង ភាគីអ៊ីរ៉ង់ វៀតណាម ក៏បង្ហាញពីចេតនាខ្លាំងក្លាណាស់ដែរក្នុងការសហប្រតិបត្តិការជាមួយអ៊ីរ៉ង់។ ក្នុងនោះ លោកនាយករដ្ឋមន្ត្រីវៀតណាម បានអះអាងថា ក្រុងហាណូយ ចង់ពង្រីកទំនាក់ទំនងជាមួយនឹងអ៊ីរ៉ង់ទៅលើគ្រប់វិស័យ ហើយ ក្រុងហាណូយ ក៏បាននឹងកំពុងតែត្រៀមខ្លួនដើម្បីឆ្ពោះទៅកាន់កិច្ចសហប្រតិបត្តិការកំពូលជាមួយអ៊ីរ៉ង់ក្នុងការកសាងយន្តការនៃការធ្វើពាណិជ្ជកម្មសេរីរវាងប្រទេសទាំងពីរទៀតផង។

សូមជម្រាបផងដែរថា លោកប្រធានាធិបតីអ៊ីរ៉ង់ កំពុងតែបំពេញទស្សនកិច្ចផ្លូវការនៅក្នុងតំបន់អាស៊ីអាគ្នេយ៍បីប្រទេស ដោយក្នុងនោះ វៀតណាម គឺជាទិសដៅទីមួយ ម៉ាឡេស៊ី គឺជាទិសដៅទីពីរ និងប្រទេសថៃ គឺជាទិសដៅចុងក្រោយនៃដំណើរទស្សនកិច្ចនេះ។ ក្នុងដំណើរទស្សនកិច្ចទិសដៅចុងក្រោយក្នុងប្រទេសថៃ លោក Rouhani ក៏នឹងចូលរួមកិច្ចប្រជុំកិច្ចសន្ទនាសហប្រតិបត្តិការអាស៊ី ដែលជាវេទិកាតំបន់មួយដែលនឹងមានការចូលរួមពីសំណាក់មេដឹកនាំអាស៊ីប្រមាណ៣០ប្រទេស។

ដំណើរឆ្ពោះមកកាន់អាស៊ីជាលទ្ធផលនៃការដកទណ្ឌកម្មលើអ៊ីរ៉ង់?
មុនពេលនៃការចាប់ផ្តើមដំណើរទស្សនកិច្ចផ្លូវការនេះ លោកប្រធានាធិបតី Hassan Rouhani ក៏បានថ្លែងប្រាប់អ្នកសារព័ត៌មានឲ្យដឹងពីរបៀបវារៈនៃដំណើរទស្សនកិច្ចបីប្រទេសនៃតំបន់អាស៊ីអាគ្នេយ៍ផងដែរ។ ក្នុងនោះ លោក បានពណ៌នា «តំបន់អាស៊ី ជាទ្វីបដ៏សំខាន់សម្រាប់អ៊ីរ៉ង់ ដោយលោក បន្ថែមថា សតវត្សរ៍ទី២១ គឺជាកម្មសិទ្ធិរបស់អាស៊ី»។ នេះ ក៏មានន័យដែរថា ក្រៅពីប្រទេសមហាអំណាចរួមមានទាំងអាមេរិកផងដែរនោះ អ៊ីរ៉ង់ ចាប់ផ្តើមផ្តោតសំខាន់លើទីផ្សារ និងទំនាក់ទំនងនៅអាស៊ីផងដែរ។

តាមពិតទៅការងាកមកផ្តោតប្រទេសនៅតំបន់អាស៊ី និងជាពិសេសនោះនៅតំបន់អាស៊ីអាគ្នេយ៍របស់«មហាអំណាចប្រេងអ៊ីរ៉ង់» ក៏ជាផ្នែកមួយនៃលទ្ធផលដំណោះស្រាយកម្មវិធីនុយក្លេអ៊ែររវាងអ៊ីរ៉ងជាមួយនឹងមហាអំណាចប្រាំមួយប្រទេសផងដែរ។ នេះ មានន័យថា ការអាចផ្តើមទំនាក់ទំនងសេដ្ឋកិច្ច និងពាណិជ្ជកម្មខាងក្រៅកាន់តែទូលាយទូលាយរបស់អ៊ីរ៉ង ក៏ដោយសារតែការបន្ធូរបន្ថយទណ្ឌកម្មពីប្រទេសមហាអំណាចទាំងប្រាំមួយរួមមាន ចិន បារាំង រុស្ស៊ី អង់គ្លេស អាមេរិក និងអាល្លឺម៉ង់នៅឆ្នាំ២០១៥កន្លងទៅ។

ជាក់ស្តែងនោះក្នុងជំនួបជាមួយនឹងមេដឹកនាំវៀតណាម លោកប្រធានាធិបតីអ៊ីរ៉ង់ ក៏បានប្រាប់ដែរថា ការឆ្ពោះមកកាន់តវៀតណាមរបស់លោក ត្រូវបានត្រៀមលក្ខណៈតាំងពីអ៊ីរ៉ង់រួចផុតការពីការដកទណ្ឌកម្មរបស់ប្រទេសមហាអំណាចទាំងប្រាំមួយនៅឆ្នាំមុនមកម្ល៉េះ៕