អន្តរជាតិ
នយោបាយអន្តរជាតិ
Duterte ប្រាប់វៀតណាម ថា លោក ធា្លប់ប្រាថ្នាទៅវៀតណាមតាំងពីក្មេង ព្រោះវៀតណាមមានលក្ខណពិសេស
ប្រធានាធិបតីហ្វីលីពីនខាងឆ្វេង និងនាយករដ្ឋមន្ត្រីវៀតណាមខាងស្តាំ (ប្រភពរូបភាព៖ zing.vn)
×![]()
ប្រធានាធិបតីហ្វីលីពីន លោក Rodrigo Duterte នៅសប្តាហ៍មុន បានបំពេញទស្សនកិច្ចផ្លូវការទៅកាន់វៀតណាម ដែលជាប្រទេសទីបីនៃមិត្តអាស៊ាន ដែលលោក បានទៅដល់ក្នុងនាមជាប្រមុខរដ្ឋ។ តាមរយៈដំណើរទស្សនកិច្ចនោះ មានកិច្ចព្រមព្រៀងជាច្រើនត្រូវបាន ធ្វើឡើងរវាងភាគីទាំងពីរ។ ហើយអ្វីដែលគួរឲ្យចាប់អារម្មណ៍នោះ ដំណើរទស្សនកិច្ចទៅកាន់វៀតណាម បានធ្វើឲ្យលោក Duterte សម្រេចក្តីសុបិនរបស់លោកកាលនៅពីក្មេងផងដែរ។ 
លោកប្រធានាធិបតីហ្វីលីពីន Rodrigo Duterte និង លោកនាយករដ្ឋមន្ត្រីវៀតណាម Nguyen Xuan Phuc បានបង្ហាញពីគោលជំហរក្នុងការពង្រីក និងធ្វើឲ្យទំនាក់ទំនងភាពជាដៃគូយុទ្ធសាស្ត្រនៃប្រទេសទាំងពីរកាន់តែស៊ីជម្រៅ ក៏ដូចជាគម្រោងក្នុងចុះហត្ថលេខាលើកិច្ចព្រមព្រៀងពាណិជ្ជកម្មជាច្រើនបន្ថែមផ្សេងទៀតដើម្បីធ្វើឲ្យប្រទេសទាំងពីរកាន់តែរឹងមាំនៅក្នុងតំបន់។ នេះបើយោងតាមសេចក្តីថ្លែងការណ៍ក្រសួងការបរទេសវៀតណាមស្តីពីដំណើរទស្សនកិច្ចរយៈពីរថ្ងៃរបស់លោក Duterte ទៅកាន់ក្រុងហាណូយកាលពីថ្ងៃទី២៩-៣០ ខែកញ្ញាកន្លងទៅ។
នាជំនួបជាមួយនឹងប្រមុខរដ្ឋាភិបាលវៀតណាមនោះដែរ លោកប្រធានាធិបតីហ្វីលីពីន ក៏បាននិយាយពីសារៈសំខាន់ នៃការកសាងសន្តិភាព និងសន្តិសុខ, ការជំរុញកិច្ចសហប្រតិបត្តិការនៅក្នុងសមុទ្រចិនខាងត្បូង និងដោះស្រាយជម្លោះតាមយន្តការសន្តិវិធី ដោយយោងតាមច្បាប់អន្តរជាតិ និងច្បាប់សមុទ្រផងដែរ។ នេះបើយោងតាមសេចក្តីថ្លែងការណ៍ដដែល ដែលបានបន្តដែរថា លោកនាយករដ្ឋមន្ត្រីវៀតណាម ក៏បានទទូចឲ្យហ្វីលីពីន ធ្វើការរួមគ្នាជាមួយវៀតណាមដើម្បីពង្រឹងសាមគ្គីភាព និងតួនាទីជាស្នូលរបស់អាស៊ានដើម្បីតទល់ជាមួយនឹងបញ្ហាប្រឈមនានាដែលអាចបំផ្លាញសន្តិភាព ស្ថិរភាព និងសន្តិសុខនៅក្នុងតំបន់។
អ្វីគួរកត់សម្គាល់នោះបើតាមសេចក្តីថ្លែងការណ៍នោះដែរ លោកប្រធានាធិបតីហ្វីលីពីន ក៏បានប្រាប់ពីក្តីប្រាថ្នាមួយរបស់លោកមកកាន់វៀតណាមយ៉ាងដូច្នេះថា «ពេលលោកនៅក្មេង លោក ធា្លប់ប្រាថ្នាចង់បំពេញទស្សនកិច្ចទៅកាន់វៀតណាម ដ្បិតលោក ក៏បានសរសើរពីការមិនរាថយរបស់វៀតណាមក្នុងការប្រយុទ្ធប្រឆាំងដើម្បីឯករាជ្យភាព និងសេរីភាព ក៏ដូចជាសមិទ្ធផលនៃការអភិវឌ្ឍផងដែរ»។
សូមជម្រាបផងដែរថា គិតចាប់ពីឡើងកាន់អំណាចជាប្រធានាធិបតីហ្វីលីពីននៅថ្ងៃទី៣០ ខែមិថុនាមក លោក Duterte ទើបតែបានបំពេញទស្សនកិច្ចទៅកាន់បណ្តាមិត្តអាស៊ានបីប្រទេសប៉ុណ្ណោះ។ ក្នុងនោះលោក Duterte ដែលកំពុងតែជាប់នៅទំព័រមុខនៃសារព័ត៌មាន ដោយសារតែគោលនយោបាយបង្ក្រាបគ្រឿងញៀនរបស់លោកនោះ បានបំពេញទស្សនកិច្ចទៅកាន់ឡាវ ឥណ្ឌូនេស៊ី និងវៀតណាមនោះឯង៕
Tag:
ហ្វីលីពីន
វៀតណាម
អាស៊ាន
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
