អាមេរិកបានអះអាងថា រុស្ស៊ីបានចល័តមីស៊ីលអាចបំពាក់ក្បាលគ្រាប់នុយក្លេអ៊ែរទៅកាន់ ក្រុងKaliningrad ដែលស្ថិតនៅជាប់ប៉ូឡួញ និងលីទុយអានីរួចរាល់ហើយ។ ប៉ុន្តែមន្ត្រីអាមេរិកថា វាមិនគ្រោះថ្នាក់ឬ មិនមែនជារឿងគួរឲ្យបារម្ភឡើយព្រោះរុស្ស៊ីធ្លាប់ពង្រាយអាវុធប្រភេទនេះម្តងដែរកាលពីឆ្នាំ ២០១៤ដើម្បរៀបចំសមយុទ្ធយោធា។
នាថ្ងៃសុក្រទី ៧ តុលា ម្សិលមិញនេះ មន្ត្រីចារកម្មអាមេរិកនិងអេស្តូនីបានអះអាងថា កងទ័ពរុស្ស៊ីចល័តមីស៊ីលអាចបំពាក់នុយក្លេអ៊ែរបានទៅកាន់ក្រុង Kaliningrad ដែលស្ថិតនៅចន្លោះប្រទេសប៉ូឡូញ និងលីទុយអានី។ រុស្ស៊ីហាក់កំពុងព្យាយាមពង្រឹងកម្លាំងរបស់ខ្លួននៅតាមព្រំដែនជាពិសេនៅជាប់បណ្តារដ្ឋបាល់ទិក ដោយមានគោលដៅរក្សាអំណាចនិងឥទ្ធិពលរបស់ខ្លួនដើម្បីគំរាមអឺរ៉ុប។
តាមពិតទៅ យោងតាមសារព័ត៌មាន The Guardian មីស៊ីលដែលត្រូវបញ្ជូនទៅនោះអាចហោះហើរបានរយៈចម្ងាយ ៥០០ គីឡូម៉ែត ហើយវាជាប្រភេអាវុធមួយដែលទំនើបនិងអាចបំពាក់ក្បាលគ្រាប់នុយក្លែអ៊ែរបានថែមទៀត។ គេមិនទាន់ដឹងនៅឡើយទេថា រុស្ស៊ីមានគោលដៅអ្វីពិតប្រាកដ ដែលត្រូវបញ្ជូនសព្វាវុធប្រភេទនេះទៅកាន់តំបន់ជិតរដ្ឋបាល់ទិកឡើយ។
យ៉ាងណាក៏ដោយចុះ មន្ត្រីអាមេរិម្នាក់ដែលមិនបង្ហាញអត្តសញ្ញាណបានអះអាងថា មូលហេតុនៃការពង្រាយអាវុធប្រភេទនេះទំនងជាមិនមានគ្រោះថ្នាក់ឡើយ ព្រោះកាលពីឆ្នាំ ២០១៤ រុស្ស៊ីក៏ធ្លាប់ចល័តអាវុធប្រភេទនេះទៅកាន់តំបន់ Kaliningrad ដែរដើម្បីចូលរួមសមយុទ្ធយោធា។ តែវាជាសារមួយបង្ហាញទៅលោកខាងលិចថារុស្ស៊ីមិនពេញចិត្តចំពោះការបន្តកសាងកម្លាំងរបស់បក្សសម្ព័ន្ធយោធាណាតូនៅតាមព្រំដែនខ្លួនឡើយ។
ចាប់ពីជម្លោះអ៊ុយក្រែនកើតឡើងនៅដើមឆ្នាំ ២០១៤ សមាជិកណាតូ ដែលដឹកនាំដោយអាមេរិកបន្តកសាងកម្លាំងទ័ពនៅជាប់ព្រំដែនរុស្ស៊ី ហើយសមយុទ្ធយោធាត្រូវបានគេរៀបចំឡើងជាញឹកញាប់ដើម្បីកំញើញរុស្ស៊ី។ អ្វីដែលគួរឲ្យកត់សម្គាល់អាមេរិកបានតំឡើងខែលការពារមីស៊ីលនៅប៉ូឡូញកាលពីប៉ុន្មានខែមុននេះថែមទៀត ដែលសកម្មភាពនេះធ្វើឲ្យរុស្ស៊ីនៅមិនសុខនិងខឹងសម្បារជាខ្លាំង។
ក្រៅពីនេះ កាលពីចុងខែកញ្ញាកន្លងទៅ ក្រសួងការពារជាតិ រុស្ស៊ីបានប្រកាសថា ប្រព័ន្ធការពារដែនអាកាសស៊េរីទំនើប S-400 ចំនួន២កងវរសេនាធំ ក៏ត្រូវពង្រាយទៅកាន់អង្គភាពកងទ័ពអាកាសនិងការពារដែនអាកាសនៅក្នុងតំបន់ Leningrad នៅពេលឆាប់ៗផង។ ការពង្រាយប្រព័ន្ធការពារដែនអាកាសនេះត្រូវបានក្រសួងខាងលើអះអាងថា ធ្វើឡើងក្នុងគោលដៅពង្រឹងសមត្ថភាពការពារដែនអាកាសរបស់ខ្លួនទប់ស្កាត់ការគំរាមកំហែងនានាប៉ុណ្ណោះ។
ពាក់ព័ន្ធការពង្រាយសព្វាវុធអាចបំពាក់នុយក្លេអ៊ែរនេះដែរ អ្នកជំនាញអេស្តូនីម្នាក់បានអះអាងថា អាវុធរបស់រុស្ស៊ីនេះជាប្រភេទអាវុធដែលទំនើបបំផុត ហើយអ្វីដែលគួរឲ្យកត់សម្គាល់ខែការពាររបស់លោកខាងលិចមិនទាន់មានលទ្ធភាពទប់ទល់ជាមួយវាបានឡើយ។ វាអាចបំពាក់អាវុធនុយក្លេអ៊ែរ អាចផ្លាស់ប្តូរគោលដៅពេលហោះបានពាក់កណ្តាលផ្លូវ និងអាចហោះហើរបានចម្ងាយ ៥០០ គីឡូម៉ែត្រទៀត។ ប្រាកដណាស់ថា អាវុធនេះអាចគំរាមកំហែងប៉ូឡូញ និងប្រព័ន្ធការពារមីស៊ីលអាមេរិកនៅទីនោះផង។
មកទល់ពេលនេះអេស្តូនី បានតាមដានយ៉ាងយកចិត្តទុកដាក់ចំពោះសកម្មភាពរុស្ស៊ីនៅតាមព្រំដែនព្រោះ អេស្តូនីភ័យថា រុស្ស៊ីនឹងអាចលេបត្របាក់តំបន់បាល់ទិកស្របពេលដែលអាមេរិកកំពុងមរមាញឹករឿងបោះឆ្នោតប្រធានាធិបតី។ ហើយការពង្រាយអាវុធនេះអាចជាយុទ្ធសាស្ត្រពង្រឹងអំណាចយោធារបស់ខ្លួននៅអឺរ៉ុខាងកើត រហូតដល់មជ្ឈិមបូព៌ា។
កាលពីថ្ងៃព្រហស្បតិ៍ យន្តហោះយោធារុស្ស៊ី An-72 បានហោះហើររំលោភចូលដែនអាកាសអេស្តូនី ដោយហោះរំលងកោះ Vaindloo ក្នុងរយៈពេល ៩០វិនាទី។ ក្រោយមកក្រសួងការបរទេសអេស្តូនេះបានកោះហៅឯកអគ្គរដ្ឋទូតរុស្ស៊ីប្រចាំនៅអេស្តូនីដើម្បីផ្តល់ឲ្យកំណត់ទូតដើម្បីទាមទារឲ្យបកស្រាយ។ ចំណែក ហ្វាំងឡង់ បានអះអាងថា យន្តហោះរុស្ស៊ីក៏បានហោះហើររំលោភចូលដែនអាកាសខ្លួនដែរ ខណៈដែលប្រទេសនេះត្រៀមខ្លួនចុះកិច្ចព្រមព្រៀងយោធាជាមួយអាមេរិក៕