អន្តរជាតិ
នយោបាយអន្តរជាតិ
×![]()
ប្រធានាធិបតីអាមេរិក បារ៉ាក់ អូបាម៉ាបានប្រកាសដកទណ្ឌកម្មសេដ្ឋកិច្ចប្រឆាំងមីយ៉ាន់ម៉ាទាំងអស់ដោយលុបចោលបញ្ជាដែលកំណត់គោលនយោបាយរបបដឹកនាំយោធាមីយ៉ាន់ម៉ាជាការគំរាមកំហែងសន្តិសុខអាមេរិក។ ប៉ុន្តែខាងសិទ្ធិមនុស្សអះអាងថា អាមេរិកនឹងបាត់បង់អំណាចដាក់សម្ពាធលើក្រុមយោធាដែលនៅបន្តមានឥទ្ធិពលនៅក្នុងនយោបាយមីយ៉ាន់ម៉ា។
ចុងក្រោយលោក បារ៉ាក់ អូបាម៉ា បានប្រកាសដកទណ្ឌកម្មប្រឆាំងមីយ៉ាន់ម៉ានៅថ្ងៃសុក្រទី ៧ តុលា។ លោកបានសម្រេចលុបចោលបទបញ្ជាបន្ទាន់មួយដែលកំណត់គោលនយោបាយរបស់របបសឹកមីយ៉ាន់ម៉ាជាការគំរាមកំហែងសន្តិសុខជាតិអាមេរិក ហើយលោកសន្យាថាអាមេរិកនឹងប្រើប្រាស់មធ្យោបាយផ្សេងទៀតដើម្បីគាំទ្រប្រជាធិបតេយ្យនិងការលូតលាស់របស់មីយ៉ាន់ម៉ា។
យោងតាមទីភ្នាក់ងារព័ត៌មាន AP លោក អូបាម៉ា បានថ្លែងថា៖« ខ្ញុំជឿជាក់ថា ស្ថានភាពដែលបង្កផលប៉ះពាល់ដល់ដល់សន្តិសុខជាតិ ត្រូវបានផ្លាស់ប្តូរដោយគោលនយោបាយគាំទ្រលទ្ធិប្រជាធិបតេយ្យហើយ។ ដូចឃើញស្រាប់ការបោះឆ្នោតប្រជាធិបតេយ្យជាប្រវត្តិសាស្ត្រកាលពីខែវិច្ឆិកាឆ្នាំ ២០១៥កន្លងទៅ»។
តាមពិតទៅបទបញ្ជាថ្មីរបស់លោក អូបាម៉ា មានគោលដៅលុបចោលបទបញ្ជានីតិប្រតិបត្តិដែលអនុញ្ញាតឲ្យមានការបន្តទណ្ឌកម្មរាល់ឆ្នាំដែលសម្រេចដោយប្រធានាធិបតីក្នុងរយៈពេល ២ទសវត្សរ៍មកហើយនោះ។ វាមានគោលដៅដកការហាមឃាត់ការនាំចូលត្បូងកណ្តៀងនិងត្បូងទទឹមពីមីយ៉ាន់ម៉ា និងការរឹតត្បិតធនាគារមីយ៉ាន់ម៉ាផងដែរ។
ក្រៅពីប្រកាសបញ្ចប់ទណ្ឌកម្ម ប្រធានាធិបតីជិតផុតអាណត្តិរូបនេះបានអះអាងថាអាមេរិកនឹងប្រើប្រាស់ចំណាត់ការផ្សេងទៀតដើម្បីគាំទ្រការលូតលាស់នៃលទ្ធិប្រជាធិបតេយ្យនិងសេដ្ឋកិច្ចរបស់មីយ៉ាន់ម៉ាជាដើមផង។
តាមពិតទៅលោក អូបាម៉ា បានបង្ហាញផែនការលើកទណ្ឌកម្មនេះតាំងពីខែមុនមកម្ល៉េះនៅពេលដែលលោកជួបពិភាក្សាជាមួយលោកស្រីទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី។ កាលនោះលោកស្រី ស៊ូជី បានទទូចសុំឲ្យអាមេរិកដកទណ្ឌកម្មប្រឆាំងមីយ៉ាន់ម៉ាចេញឲ្យអស់ ដោយលោកស្រី លើកឡើងថាទណ្ឌកម្មបានធ្វើឲ្យប៉ះពាល់ដល់សេដ្ឋកិច្ចមីយ៉ាន់ម៉ាខ្លាំង។
អាមេរិកបានលុបចោលការរឹតត្បិតការវិនិយោគនិងពាណិជ្ជកម្មដែលបានដាក់ប្រឆាំងមីយ៉ាន់ម៉ា កន្លងមក ប៉ុន្តែអាមេរិកបានបន្តរក្សាទុកការរឹតត្បិតមួយចំនួនដែលដាក់ប្រឆាំងក្រុមហ៊ុនមួយចំនួនដែលជារបស់ក្រុមមន្ត្រីយោធានិងក្រុមមន្ត្រីណាដែលមានទំនាក់ទំនងជិតស្និទ្ធជាមួយរបបសឹកមីយ៉ាន់ម៉ា។
យ៉ាងណាក៏ដោយចុះ ក្រុមសិទ្ធិមនុស្សបានអះអាងថា ការសម្រេចរបស់រដ្ឋបាលក្រុងវ៉ាស៊ីនតោននេះនឹងធ្វើឲ្យអាមេរិកបាត់បង់អំណាចដាក់សម្ពាធលើក្រុមយោធាដែលមានបន្តឥទ្ធិពលនៅក្នុងវិស័យនយោបាយមីយ៉ាន់ម៉ា។ សមាជិកសភាអាមេរិកមួយចំនួនបានបង្ហាញការគាំទ្រការដកទណ្ឌកម្ម ប៉ុន្តែក៏បារម្ភពីស្ថានភាពសិទ្ធិមនុស្សនៅមីយ៉ាន់ម៉ាដូចជាការរំលោភសិទ្ធិជនជាតិរ៉ូហ៊ីងយ៉ា និងជម្លោះជនជាតិភាគតិចជាដើម។ ហើយក្រៅពីនេះ គេក៏បារម្ភពីការបន្តកែទម្រង់នយោបាយនៅមីយ៉ាន់ម៉ាជាពិសេសកែទម្រង់រដ្ឋធម្មនុញ្ញដើម្បីកាត់បន្ថយអំណាចក្រុមយោធាដែលបន្តកាន់កាប់អាសនៈ ២៥ភាគរយនៃអាសនៈសភាទាំងមូលនោះ៕
Tag:
បារ៉ាក់ អូបាម៉ា
អ៊ុងសាន ស៊ូជី
© រក្សាសិទ្ធិដោយ thmeythmey.com
