អន្តរជាតិ
នយោបាយអន្តរជាតិ
អាមេរិកចោទថា រុស្ស៊ីប្រព្រឹត្តបទឧក្រិដ្ឋសង្គ្រាមនិងប្រឆាំងមនុស្សជាតិនៅស៊ីរី
×![]()
ដោយ: ថ្មីៗ
រដ្ឋមន្ត្រីការបរទេសអាមេរិក ចន ឃែរី បានស្នើឲ្យមានការស៊ើបអង្កេតមួយពាក់ព័ន្ធបទឧក្រិដ្ឋកម្មសង្គ្រាមរបស់រុស្ស៊ីនិងស៊ីរីដោយលើកហេតុផលថាប្រទេសទាំងពីរបន្តទម្លាក់គ្រាប់ប្រឆាំងជនស៊ីវិល។ លោក និងសមភាគីបារាំងក៏អំពាវនាវឲ្យមានការចាប់ផ្តើមអនុវត្តបទឈប់បាញ់ឡើងវិញនិងសង្គ្រោះប្រជាជននៅ Aleppo ។ 
អាមេរិកបន្តចោទប្រកាន់ថារុស្ស៊ី និងស៊ីរីបន្តសមគំនិតគ្នាបង្កឧក្រិដ្ឋកម្មសង្គ្រាមដោយបន្តទម្លាក់គ្រាប់បែកសម្លាប់ជនស៊ីវិល។ រដ្ឋមន្ត្រីការបរទេសអាមរិកលោក ចន ឃែរី ក៏បានអំពាវនាវឲ្យមានការបើកការស៊ើបអង្កេតពាក់ព័ន្ធបទឧក្រិដ្ឋនេះប្រឆាំងរុស្ស៊ីនិងស៊ីរីផងដែរ។
មុនជួបរដ្ឋមន្ត្រីការបរទេសបារាំងលោក Jean-Marc Ayrault ដើម្បីពិភាក្សាដំណោះស្រាយដែលព្រាងឡើងដោយអេស្ប៉ាញនិងបារាំង ដែលដាក់ក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិថ្ងៃ សុក្រទី ៧ តុលាម្សិលមិញនេះ លោក ចន ឃែរី បានអះអាងថា រុស្ស៊ីនិងស៊ីរីអាចប្រឈមការស៊ើបអង្កេតបទឧក្រិដ្ឋកម្មសង្គ្រាម ហើយលោកក៏ឆ្លៀតស្នើឲ្យមានការបទឈប់បាញ់ឡើងវិញនៅស៊ីរីផងដែរ។ វាអាចនឹងអនុញ្ញាឲ្យមានការចែកចាយជំនួយមនុស្សធម៌ ដល់ប្រជាជន និងបញ្ចប់រាល់ការទម្លាក់គ្រាប់បែកនៅក្រុង Aleppo។
«កាលពីយប់មិញ របបដឹកនាំអាសាដ វាយប្រហារលើមន្ទីរពេទ្យមួយទៀត និងសម្លាប់មនុស្ស ២០នាក់ និងធ្វើឲ្យមនុស្ស១០០នាក់ផ្សេងទៀតរបួស។ រុស្ស៊ីនិងស៊ីរីជំពាក់ពិភពលោកច្រើនជាងការបកស្រាយពីមូលហេតុដែលគេបន្តវាយប្រហារលើមន្ទីរពេទ្យនិងសម្លាប់ជនស៊ីវិល។ សកម្មភាពទាំងនេះវាល្មមអាចមានការស៊ើបអង្កេតត្រឹមត្រូវមួយពាក់ព័ន្ធបទឧក្រិដ្ឋសង្គ្រាម និងដើម្បីកំណត់ឲ្យអ្នកដែលត្រូវទទួលខុសចំពោះទង្វើនេះទទួលទោសផងដែរ»។ នេះជាការលើកឡើងរបស់លោក ចន ឃែរី។
ទាក់ទងដំណោះស្រាយនេះដែរ រដ្ឋមន្ត្រីបរទេសបារាំងលោក Ayrault បានអះអាងថា ដំណោះស្រាយនេះមិនមានបំណងបង្កើតការប្រឈមមុខគ្នាជាមួយក្រុងម៉ូស្គូឡើយ ប៉ុន្តែវាជាមធ្យោបាយដែលអាចជួយសង្គ្រោះក្រុង Aleppo។ លោកឆ្លៀតលើកឡើងជាថ្មីពីការព្រមានរបស់បេកសជនពិសេសរបស់អង្គការសហប្រជាជាតិ Staffan de Mistura ថា ទីក្រុង Aleppo ដែលកំពុងកាន់កាប់ដោយក្រុមឧទ្ទាមដែលមានប្រជាជនរស់នៅ ២៧៥០០០ នាក់ឯណោះនោះ នឹងត្រូវកម្ទេចចោលទាំងស្រុងត្រឹមខែធ្នូដោយសារការទម្លាក់បែករបស់រុស្ស៊ីនិងស៊ីរី។
តាមពិតទៅ ដំណោះស្រាយដែលព្រាងឡើងដោយបារាំងនិងអេស្ប៉ាញនេះ មានចែងពីចំណុចមួយចំនួនដែលវាស្នើឲ្យភាគីតាំងអស់ជាពិសេសរបបដឹកនាំស៊ីរីគោរពច្បាប់មនុស្សធម៌អន្តរជាតិ។ ហើយមិនត្រឹមតែប៉ុណ្ណោះទេដំណោះស្រាយនេះបានបញ្ជាក់ថា រាល់អ្នកប្រព្រឹត្តបទឧក្រិដ្ឋប្រឆាំងមនុស្សនិងបទឧក្រិដ្ឋកម្មសង្គ្រាមមិនអាចរួចខ្លួនដោយគ្មានការដាក់ទណ្ឌកម្មឡើយ។ បន្ថែមពីនេះដំណោះស្រាយដដែលក៏បានស្នើឲ្យរាល់ភាគីអនុវត្តបទឈប់បាញ់ឡើងវិញដើម្បីធានាដល់ការចែកចាយជំនួយមនុស្សធម៌ទៅកាន់ប្រជាជននិងបញ្ចប់ឲ្យអស់រាល់ការទម្លាក់គ្រាប់ និងប្រយុទ្ធគ្នានៅក្រុង Aleppo ។ តែចំណុចនេះសំដៅតែលើរុស្ស៊ីនិងស៊ីរីប៉ុណ្ណោះ។
យ៉ាងណាក៏ដោយចុះ នៅថ្ងៃសៅរ៍នេះ សមាជិកក្រុមប្រឹក្សាសន្តិសុខនឹងចាប់ផ្តើមជជែកដេញដោលគ្នាពាក់ព័ន្ធដំណោះស្រាយដែលដាក់ចេញនេះ ប៉ុន្តែរុស្ស៊ីបានបញ្ចេញដំណោះស្រាយរបស់ខ្លួនមួយផងដែរ ដោយដំណោះស្រាយនេះមិនបានអំពាវនាវឲ្យរុស្ស៊ីនិងស៊ីរីបញ្ចប់ការទម្លាក់គ្រាប់ឡើយ៕
© រក្សាសិទ្ធិដោយ thmeythmey.com
