រុស្ស៊ីមានបំណងចង់ត្រឡប់ទៅបើកមូលដ្ឋានទ័ពរបស់ខ្លួននៅវៀតណាមនិងគុយបាឡើងវិញ។ បច្ចុប្បន្ននេះក្រសួងការពារជាតិរុស្ស៊ី កំពុងសិក្សាពីគម្រោងនៃការចាប់ផ្តើមដំណើរការមូលដ្ឋានទ័ពនេះឡើងវិញដែរ។ កាលពីឆ្នាំ ២០១៤ រដ្ឋមន្ត្រីការពារជាតិរុស្ស៊ីបានប្រកាសថា រុស្ស៊ីត្រូវការមូលដ្ឋានទ័ពនៅបរទេសនៅប្រទេសមួយចំនួននៅអាស៊ីអាគ្នេយ៍ អាហ្វ្រិកនិងអាមេរិកឡាទីន ដែលសម្រួលដល់ការពង្រឹងយុទ្ធសាស្ត្រយោធា។
អនុរដ្ឋមន្ត្រីការពារជាតិរុស្ស៊ីNikolay Pankov បានអះអាងថា រុស្ស៊ីមានបំណងចង់ត្រឡប់ទៅបើកដំណើរការមូលដ្ឋានទ័ពរបស់ខ្លួនឡើងវិញនៅគុយបា និងនៅវៀតណាម។ យោងតាមសារព័ត៌មានរដ្ឋរុស្ស៊ី Sputnik ការសិក្សាពីគម្រោងនិងស៊ើបអង្កេតពីលទ្ធភាពនៃការបើកដំណើរការមូលដ្ឋានទ័ពនេះត្រូវបានចាប់ផ្តើមឡើងរួចរាល់ហើយ។
ថ្លែងក្នុងសភាជាន់ទាប លោក Nikolay Pankov បានបញ្ជាក់ច្បាស់ថា រុស្ស៊ីមានគម្រោងនិងនការសិក្សាមួយចំនួនដើម្បីឲ្យដឹងថា ការចាប់ផ្តើមដំណើរការឡើងវិញនូវមូលដ្ឋាទ័ពរបស់ខ្លួនអាចទៅរួចឬអត់នោះ។ ប៉ុន្តែមន្ត្រីរូបនេះមិនបានបញ្ជាក់ច្បាស់ថា ការសិក្សានឹងបញ្ចប់ពេលណា ឬវាបានទទួលផលបែបណាឡើយ។
តាមពិតទៅ ការកសាងមូលដ្ឋានទ័ពនៅបរទេសជាចំណុចស្នូលនៃគោលនយោបាយរបស់រដ្ឋាភិបាលក្រេមឡាំងបច្ចុប្បន្ន ព្រោះមហាអំណាចនេះកំពុងប្រឹងប្រែងពង្រីកឥទ្ធិពលនិងពង្រឹងយុទ្ធសាស្ត្រយោធារបស់ខ្លួនឡើងវិញ។ ដូចឃើញស្រាប់ហើយ ការឈានទៅសម្រេចដាក់មូលដ្ឋានទ័ពអាកាសនៅស៊ីរី, ការឈានទៅបើកមូលដ្ឋានទ័ពចាស់ៗឡើងវិញ និងកសាងមូលដ្ឋានយោធាថ្មីនៅបរទេស សុទ្ធសឹងតែបង្ហាញច្បាស់ពីមហិច្ឆតារបស់រុស្ស៊ី។
កាលពីឆ្នាំ ២០១៤ រដ្ឋមន្ត្រីការពារជាតិរុស្ស៊ីលោក Sergei Shoigu បានអះអាងថា រុស្ស៊ីត្រូវការបណ្តាញនៃមូលដ្ឋានទ័ពនៅបរទេស ហើយប្រទេសមួយចំនួនមានវៀតណាម, សិង្ហបុរី,គុយបា, វេណេស៊ុយអេឡា និងប្រទេសមួយចំនួននៅអាហ្វ្រិកសុទ្ធតែជាគោលដៅនៃការដាក់មូលដ្ឋានទ័ពរបស់រុស្ស៊ីដែរ។
រុស្ស៊ីមានមូលដ្ឋានទ័ពមួយដែលទទួលបន្ទុកកិច្ចការចារកម្មនៅគុយបាតាំងពីសម័យសង្គ្រាមត្រជាក់រហូតដល់ឆ្នាំ ២០០២។ រហូតមកដល់បច្ចុប្បន្នទំនាក់ទំនងរវាងគុយបានិងរុស្ស៊ីនៅតែល្អប្រសើរ ហើយមកដល់រយៈពេលប៉ុន្មានឆ្នាំចុងក្រោយរុស្ស៊ីប្រឹងប្រែងពង្រីកកិច្ចសហប្រតិបត្តិការឧស្សាហកម្មយោធានិងវិស័យសំខាន់ទៀតជាច្រើន។ អ្វីដែលគួរឲ្យកត់សម្គាល់ក្នុងទំនាក់ទំនងប្រទេសទាំងពីរគឺ រុស្ស៊ីលុបចោលបំណុលគុយបាជំពាក់ប្រហែល ៦ពាន់លានដុល្លារ នៅឆ្នាំ ២០១៣ ហើយរុស្ស៊ីក៏តែងតែរិះគន់ការហ៊ុមព័ទ្ធសេដ្ឋកិច្ចរបស់ក្រុងវ៉ាស៊ីនតោនដាក់ប្រឆាំងគុយបាដែរ។
ចំណែកវៀតណាមវិញ រុស្ស៊ីធ្លាប់ដាក់កងទ័ពជើងទឹករបស់ខ្លួនមូលដ្ឋានទ័ពជើងទឹក Cam Ranh វៀតណាម។ ហើយកាលពីខែសីហាកន្លងទៅរុស្ស៊ីបានបង្ហាញគម្រោងសាងសង់ឡើងវិញនូវផ្លូវហោះហើរសម្រាប់យន្តហោះចម្បាំងនៅ Cam Ranh ផងដែរ។
តាមពិតទៅមូលដ្ឋានទ័ពនៅ Cam Ranh ជាតំបន់យុទ្ធសាស្ត្រ ហើយសូវៀត និងរុស្ស៊ីបានប្រើប្រាស់ទីតាំងខាងលើសម្រាប់ទ័ពអាកាសខ្លួនតាំងពីឆ្នាំ ១៩៧៩ មកដល់ ឆ្នាំ ២០០២។ចាប់ពីឆ្នាំ ២០០២ រុស្ស៊ីមិនបានប្រើប្រាស់ទីតាំងខាងលើទៀតឡើយ តែក្រុងហាណូយមិនបានផ្តល់សិទ្ធិឲ្យប្រទេសផ្សេងទៀតប្រើប្រាស់ដែរ ទោះបីជាមានប្រទេសខ្លះសុំប្រើប្រាស់ក្តី។
ជាបន្តបន្ទាប់ រុស្ស៊ីបានបង្ហាញចំណាប់អារម្មណ៍ចង់ត្រឡប់មកប្រើប្រាស់មូលដ្ឋានចាស់នេះវិញដែរ ហើយវៀតណាមក៏មានបំណងចង់ផ្តល់សិទ្ធិឲ្យរុស្ស៊ីប្រើប្រាស់មូលដ្ឋានទ័ពនេះវិញដែរ។ វាជារឿងមិនអាចចៀសផុតដែលវៀតណាមចង់ឲ្យរុស្ស៊ីមកវិញ ព្រោះរុស្ស៊ីនៅតែជាអ្នកផ្គត់ផ្គងអាវុធដ៏ធំឲ្យវៀតណាម ហើយអ្នកជំនាញរុស្ស៊ីជាច្រើននាក់ត្រូវបានវៀតណាមសុំឲ្យមកជួយជួសជុលសព្វាវុធនិងជួសជុលមូលដ្ឋានទ័ព Cam Ranh ផងដែរ។
កន្លងមក វៀតណាមបានផ្តល់សិទ្ធិឲ្យរុស្ស៊ីប្រើប្រាស់ផ្លូវយន្តហោះបម្រើវិស័យយោធា និងផ្តល់សិទ្ធិឲ្យកងទ័ពជើងទឹករុស្ស៊ីប្រើប្រាស់កំពង់ផែ Cam Ranh ប៉ុន្តែវាមិនមែនជាការតាំងទ័ពជាអចិន្ត្រៃយ៍ទេ។ឆ្នាំ ២០១៣ រុស្ស៊ីទទួលបានសិទ្ធិប្រើប្រាស់ឆក Cam Ranh សម្រាប់កងទ័ពជើងទឹក ហើយក្នុងឆ្នាំ ២០១៤ ទ័ពអាកាសរុស្ស៊ីបានទទួលសិទ្ធិពីវៀតណាមដើម្បីប្រើប្រាស់ទីតាំងនេះដែរ។