អន្តរជាតិ
នយោបាយអន្តរជាតិ
សារព័ត៌មានចិន៖អាមេរិកគ្មានសិទ្ធិទៅបង្រៀនគេរឿងប្រជាធិបតេយ្យឡើយ
× សារព័ត៌មានរដ្ឋចិនបានព្រួតគ្នារិះគន់និងចម្អកឲ្យអាមេរិករឿងបោះឆ្នោតដែលបេក្ខជនប្រធានាធិបតីម្នាក់រុំព័ទ្ធដោយរឿងអាស្រូវមិនចេះចប់។ គេក៏ចម្អកផងដែរថា បញ្ហានិងភាពរញ៉េរញ៉ៃក្នុងប្រព័ន្ធនយោបាយអាមេរិកនេះបង្ហាញឲ្យឃើញច្បាស់ថា អាមេរិកគ្មានសិទ្ធិឯណាទៅបង្រៀនគេឯងរឿងប្រជាធិបតេយ្យឡើយ។
តាំងពីដើមមករដ្ឋាភិបាលចិនរក្សាជំហររបស់ខ្លួន ដោយមិនចេញមុខរិះគន់ឬបកស្រាយរឿងបោះឆ្នោតប្រធានាធិបតីអាមេរិកឡើយ ព្រោះចិនប្រកាន់ខ្ជាប់គោលការណ៍មិនជ្រៀតជ្រែកផ្ទៃក្នុងប្រទេសដ៏ទៃឡើយ។ ប៉ុន្តែសារព័ត៌មានរដ្ឋចិនវិញហាក់មានសិទ្ធិពេញលេញ ក្នុងការទិតៀនការបោះឆ្នោតអាមេរិករយៈពេលចុងក្រោយនេះ។
យោងតាមទីភ្នាក់ងារព័ត៌មាន Reuters សារព័ត៌មានចិន ចាប់ផ្តើមវាយប្រហារនិងរិះគន់ការបោះឆ្នោតប្រធានាធិបតីអាមេរិកហើយ។សារព័ត៌មានចិនទាំងនោះបានរិះគន់ថា ការបោះឆ្នោតអាមេរិកមានលក្ខណៈរញ៉េរញ៉ៃ ហើយលើកហេតុផលថា បេក្ខជនប្រធានាធិបតីម្នាក់សុទ្ធតែមានរឿងអាស្រូវច្រើនមិនចេះចប់។ ដូច្នេះអាមេរិកគ្មានសិទ្ធិឯណាទៅបង្ហាត់បង្រៀនគេរឿងសិទ្ធិមនុស្សឡើយ។
បទវិចារណកថាមួយ ចុះផ្សាយក្នុងសារព័ត៌មាន People’s Daily បានចម្អកថា ការបោះឆ្នោតអាមេរិកមានលក្ខណៈ ច្របូកច្របល់ ហើយអ្នកនិពន្ធបានលើយកបញ្ហារឿងអាស្រូវមិនបានពន្ធចូលរដ្ឋរបស់លោក ដូណាល់ ត្រាំ និងបញ្ហាអ៊ីម៉ែលលោកស្រី ហ៊ីឡារី គ្លីនតុន ជាឧទាហរណ៍ផងដែរ។
បទវិចារណកថាដដែលនេះបានទិតៀនថា បេក្ខជនប្រធានាធិបតីអាមេរិកយកពេលវេលាវាយប្រហារគ្នារឿងបុគ្គលច្រើនជាងផ្តោតលើគោលនយោបាយដែលជាបញ្ហាសំខាន់សម្រាប់ប្រទេសជាតិ។
«រឿងចម្លែកទាំងនេះមិនត្រឹមតែបង្ហាញពីភាពច្របូកច្របល់នៃនយោបាយអាមេរិកប៉ុណ្ណោះទេ វាក៏បង្ហាញឲ្យឃើញពីបញ្ហាពុករលួយដែលកើតឡើងក្នុងប្រព័ន្ធនយោបាយអាមេរិកដូចគ្នា។ តាំងពីយូរមកហើយអាមេរិកតែងតែងអួតពីប្រព័ន្ធបោះឆ្នោតរបស់ខ្លួនដោយអះអាងថា វាល្អផុតគេ។ ហើយសម្អាងលើប្រព័ន្ធបោះឆ្នោតនេះ អាមេរិកក៏ប្រឹងរិះគន់ប្រទេសកំពុងអភិវឌ្ឍដទៃផងទៀតផងដែរ។ ដូច្នេះហើយ ភាពក្រអឺតក្រទមតាំងខ្លួនជាបិតាប្រជាធិបតេយ្យនោះគួរតែចប់ហើយ»។ នេះជាការលើកឡើងរបស់អ្នកនិពន្ធបទវិចារណកថា។
ចំណែកសារព័ត៌មានរដ្ឋចិនមួយទៀតដែលមានឈ្មោះថា Global Times ក៏រិះគន់ការបោះឆ្នោតអាមេរិកដូចគ្នា។ សារព័ត៌មានដែលមានភាសាចិន និងអង់គ្លេសផងនេះបានចេញបទវិចារណកថាមួយផងដែរ ដោយអះអាងថា ប្រជាធិបតេយ្យបែបបស្ចិមលោកនោះមិនល្អផុតគេទេ។
បទវិចារណកថានោះបានបន្តថា៖ «ប្រទេសលោកខាងលិចមានប្រព័ន្ធគតិយុត្តដែលរក្សាសន្តិសុខ និងស្ថិរភាពសង្គមនៅពេលដែមប្រទេសទាំងនោះប្រឈមបញ្ហាចលាចល។ ប៉ុន្តែប្រទេសកំពុងអភិវឌ្ឍជាច្រើនដែលបានរៀនសូត្រយ៉ាងរហ័សពីលោកខាងលិចបែរជាស្គាល់តែបញ្ហាអស្ថិរភាពសង្គម»៕
© រក្សាសិទ្ធិដោយ thmeythmey.com