អន្តរជាតិ
បញ្ហាស៊ីរី៖ ត្រាំ ថា នយោបាយការបរទេស ហ៊ីឡារី ជាគ្រោះមហន្តរាយនិងជាកំហុសឆ្គង
× ក្នុងការជជែកដេញដោលលើកទី២ លោក ដូណាល់ ត្រាំ បានអះអាង បញ្ហាស៊ីរីស្មុគស្មាញខ្លាំង ហើយការទម្លាក់លោក អាសាដ ពីតំណែងមិនមែនជាជំរើសល្អទេ។ បន្ថែមពីនេះលោកបន្តថាលោកស្រី ហ៊ីឡារី គ្លីនតុន បានបង្កបញ្ហាច្រើនក្នុងនយោបាយការបរទេស ហើយអាមេរិកចាញ់ប្រៀបគេនៅក្នុងជម្លោះស៊ីរីដោយសារនយោបាយការបរទេសអាមេរិកខ្សោយ។
បេក្ខជនប្រធានាធិបតីបក្សសាធារណរដ្ឋលោក ដូណាល់ ត្រាំ បានលើកឡើងក្នុងការជជែកដេញដោលរវាងបេក្ខជនប្រធានាធិបតីថ្ងៃអាទិត្យទី ៩ តុលាថា អ្វីដែលលោកស្រី ហ៊ីឡារី គ្លីនតុន គាំទ្រមានទាំងការអន្តរាគមន៍នៅស៊ីរី និងគាំទ្រក្រុមឧទ្ទាមនៅស៊ីរីដើម្បីជួយឲ្យពួកគេប្រយុទ្ធប្រឆាំងរបបអាសាដជាគ្រោះថ្នាក់។ ការអន្តរាគមន៍យោធានៅស៊ីរីមិនជួយដោះស្រាយបញ្ហាឡើយ ហើយការសហការជាមួយរុស្ស៊ីនៅតែជារឿងសំខាន់ក្នុងការប្រឆាំងភេរវកម្មនិងដោះស្រាយបញ្ហាស៊ីរី។
លោក ដូណាល់ ត្រាំ បកស្រាយថា លោកស្រី ហ៊ីឡារី គ្លីនតុន ចេះតែរឿងមួយគឺ ប្រឆាំងរុស្ស៊ី និងរបបដឹកនាំស៊ីរី។ ក្រៅពីនេះលោកស្រីបន្តគាំទ្រក្រុមឧទ្ទាមនៅស៊ីរី ដើម្បីជួយឲ្យពួកគេទម្លាក់លោក បាសា អាល់ អាសាដ ពីតំណែង ទាំងដែលលោកស្រីខ្លួនឯងមិនដឹងអ្វីសោះថា ក្រុមឧទ្ទាមទាំងនោះជាអ្នកណា។
លោក ដូណាល់ ត្រាំ បន្តថា៖«លោកស្រីនិយាយពីរឿងក្រុមឧទ្ទាម ប៉ុន្តែគាត់មិនដឹងច្បាស់ទេថា ក្រុមឧទ្ទាមនោះជាអ្នកណាឡើយ។ ស្ទើរគ្រប់យ៉ាងដែលលោកស្រីបានធ្វើនៅក្នុងការរៀបចំនយោបាយការបរទេស សុទ្ធតែជាកំហុស និងគ្រោះមហន្តរាយប៉ុណ្ណោះ»។
ក្នុងការជជែកដេញដោលគ្នានេះដែរ លោកស្រី ហ៊ីឡារី គ្លីនតុន ចង់បង្កើតតំបន់គ្មានការហោះហើរ, គាំទ្រក្រុមឧទ្ទាមដើម្បីប្រឆាំងអាសាដ និងបង្ខំឲ្យស៊ីរី និងរុស្ស៊ីទទួលខុសត្រូវបទឧក្រិដ្ឋប្រឆាំងមនុស្សជាតិផង ដើម្បីដោះស្រាយវិបត្តិនៅស៊ីរី។
ដោយឡែកលោកក៏បន្តថា មេរៀនមានស្រាប់ហើយដូចនៅអ៊ីរ៉ាក់ ឬលីប៊ី នៅពេលអាមេរិកបំពាក់អាវុធឲ្យក្រុមឧទ្ទាម ហើយទម្លាក់ កាដាហ្វីចេញពីតំណែង។ ចុងក្រោយ ភាពចលាចលកើតឡើងពេញប្រទេស។ ជារួមលោក ដូណាល់ ត្រាំ សង្កត់ធ្ងន់ថា អ្វីដែលលោកស្រី ហ៊ីឡារី គ្លីនតុន បានធ្វើក្នុងការបង្កើតនយោបាយការបរទេសសុទ្ធតែមានកំហុសនិងគ្រោះថ្នាក់។
យ៉ាងណាក៏ដោយចុះ លោក ដូណាល់ ត្រាំ បន្ថែមថា លោកមិនចូលចិត្តអាសាដ ឡើយ តែអ្វីដែលគេគួរដឹងគឺ កងទ័ពរុស្ស៊ី ,ស៊ីរី និង អ៊ីរ៉ង់សុទ្ធតែកំពុងប្រយុទ្ធប្រឆាំងក្រុមភេរវជនរដ្ឋឥស្លាម។ ហើយពួកគេអាចព្រួតគ្នានិងមានប្រៀបលើអាមេរិកមកដល់បច្ចុប្បន្នក៏ដោយសារតែនយោបាយការបរទេសអាមេរិកខ្លួនឯងខ្សោយដែរ។ លោកក៏បន្តទៀតថា វាជារឿងល្អ បើសិនជាអាមេរិកអាចធ្វើការជាមួយរុស្ស៊ីបានដើម្បីដោះស្រាយបញ្ហានិងប្រឆាំងភេរវកម្មនោះ៕
Tag:
ដូណាល់ ត្រាំ
ស៊ីរី
ហ៊ីឡារី គ្លីនតុន
Second Presidential Debate
© រក្សាសិទ្ធិដោយ thmeythmey.com