អន្តរជាតិ
នយោបាយអន្តរជាតិ
ការស្ទាប់ស្ទង់៖ ជនជាតិចិនវ័យចំណាស់១៣៧០នាក់ បានបាត់ខ្លួនរៀងរាល់ថ្ងៃ
×
ការស្ទាបស្ទង់មួយបង្ហាញថា ជនជាតិចិនវ័យចំណាស់ប្រហែលប្រាំសែននាក់ បានបាត់ខ្លួនជារៀងរាល់ឆ្នាំ។ ករណីបាត់ខ្លួនភាគច្រើនបំផុតនោះ កើតនៅតំបន់ជនបទ និងបណ្ដាទីក្រុងតូចៗរបស់ចិន ដ្បិតក្រុមមនុស្សចាស់ទាំងនោះ ត្រូវក្មេងៗជំនាន់ក្រោយបោះបង់ ដោយសារពួកគេធ្វើចំណាកស្រុកទៅកាន់កន្លែងផ្សេងៗ ដើម្បីស្វែងរកការងារ ហើយសេវាកម្មថែទាំមនុស្សចាស់ ក៏មិនសូវមានប្រសិទ្ធភាពដែរ។
យោងតាមការស្ទាបស្ទង់ បញ្ចេញដោយវិទ្យាសា្ថនជំនួយសង្គម និងទំព័រព័ត៌មាន Toutiao នៅថ្ងៃទី៩ ខែតុលា បង្ហាញថា ជនជាតិចិនវ័យចំណាស់ចំនួន១៣៧០នាក់ បានបាត់ខ្លួនរៀងរាល់ថ្ងៃ។ ក្នុងចំណោមមនុស្សចំណាស់ដែលបាត់ខ្លួនទាំងនោះ មានអាយុជាមធ្យម៧៦ឆ្នាំ ហើយស្ត្រីចំនួន៥៨ភាគរយនៃចំនួនអ្នកដែលបាត់ខ្លួន។
ការស្ទាបស្ទង់ខាងលើ ក៏បានរកឃើញមូលហេតុនៃការបាត់ខ្លួនមនុស្សចាស់ដ៏ច្រើនជារៀងរាល់ថ្ងៃនេះ។ ការស្ទាបស្ទង់បង្ហាញថា ភាគច្រើននៃមនុស្សចាស់ដែលបាត់ខ្លួន មានបញ្ហាផ្នែកសតិ។ ក្នុងនោះ ៧២ភាគរយមានបញ្ហាអន់ថយផ្នែកសតិបញ្ញា ហើយ២៥ភាគរយទៀត គឺវិកលចរិក។ មិនតែប៉ុណ្ណោះ ករណីបាត់ខ្លួនភាគច្រើន ក៏ជាប់ទាក់ទងនឹងភាពក្រីក្ររបស់ប្រជាជនរស់នៅតំបន់ដាច់ស្រយាល ក៏ដូចជាការថែទាំមនុស្សចាស់ដែរ។
បើតាមសារព័ត៌មានចិន People’s Daily ជនជាតិចិនជំនាន់ក្រោយដែលមានវ័យក្មេង បានចាកចេញពីស្រុកកំណើត និងទុកឪពុកម្ដាយពួកគេចោលនៅផ្ទះ។ ពួកគេធ្វើដំណើរទៅកាន់ទីក្រុងធំៗ ដើម្បីស្វែងរកការងារ និងចំណូលខ្ពស់សម្រាប់គ្រួសារ ដ្បិតការរស់នៅជនបទ មិនបានជួយលើកកម្ពស់ជីវភាពពួកគេឡើយ។ ម្យ៉ាងទៀត តំបន់ជនបទ មិនមានលក្ខណៈអំណោយផលអ្វីដល់ការងាររបស់ពួកគេដែរ។
ទន្ទឹមគ្នានេះ ការស្ទាបស្ទង់ខាងលើ ក៏បានស្នើឲ្យមានការបង្កើតប្រព័ន្ធជាតិមួយ ដើម្បីកត់ត្រា និងស្វែងរកមនុស្សចាស់ដែលបាត់ខ្លួនទាំងនោះ។ ការស្ទាបស្ទង់នេះ ក៏ណែនាំឲ្យមជ្ឈមណ្ឌលផ្ដល់ជំនួយ រៀបចំអ្នកជំនាញ ដើម្បីជួយស្វែងរកអ្នកបាត់ខ្លួនរាប់រយនាក់ក្នុងមួយៗថ្ងៃនោះ។
ការស្ទាបស្ទង់ដដែល ក៏បានស្នើឲ្យរដ្ឋាភិបាលថ្នាក់តំបន់ ជាពិសេសតំបន់ដែលមានប្រជាជនច្រើន សហការជាមួយសង្គមស៊ីវិល ក្នុងការវាយតម្លៃលក្ខខណ្ឌរស់នៅរបស់ប្រជាជនចាស់ៗ ដែលត្រូវទុកនៅផ្ទះ និងរកវិធីសាស្ត្រដែលមានប្រសិទ្ធភាព ដើម្បីបញ្ឈប់ការបាត់ខ្លួនតទៅទៀត។ ការបាត់ខ្លួនមនុស្សជាច្រើននេះ គឺជាបញ្ហាលលំបាកមួយ ដែលតម្រូវឲ្យមានការចាត់វិធានការបន្ទាន់៕
© រក្សាសិទ្ធិដោយ thmeythmey.com