អន្តរជាតិ
កូរ៉េខាងត្បូង កោះហៅទូតចិនមកសួរនាំរឿងលិចទូកល្បាត
× កូរ៉េខាងត្បូង បានកោះហៅអគ្គរដ្ឋទូតចិនប្រចាំក្រុងសេអ៊ូល ដើម្បីតវ៉ារឿងលិចទូកល្បាតរបស់ខ្លួន ក្រោយការប៉ះទង្គិចជាមួយទូកនេសាទរបស់ចិនកាលពីពេលថ្មីៗនេះ។ ក្រសួងការបរទេសកូរ៉េខាងត្បូង អះអាងថា ទូកនេសាទចិន បានចូលមកដែនទឹករបស់ដោយខុសច្បាប់ ដើម្បីនេសាទត្រីនៅតំបន់នោះ។
អនុរដ្ឋមន្ត្រីការបរទេសកូរ៉េខាងត្បូង លោក Kim Hyong-zhin បានអញ្ជើញអគ្គរដ្ឋទូតចិនប្រចាំកូរ៉េខាងត្បូង លោក Chu Guo Hong មកសួរនាំរឿងទូកនេសាទចិន បុកទូករបស់ឆ្មាំការពារឆ្នេរសមុទ្រកូរ៉េខាងត្បូង ដែលក្រោយមកក៏បានលិច។ ឆ្លៀតពេលនោះ មន្ត្រីជាន់ខ្ពស់កូរ៉េខាងត្បូង ក៏ទាមទារឲ្យចិនចាត់វិធានការ ដើម្បីកុំឲ្យឧប្បត្តិហេតុរបៀបនេះ កើតឡើងម្ដងទៀត។
បើតាមទីភ្នាក់ងារព័ត៌មានកូរ៉េខាងត្បូង Yonhap អគ្គរដ្ឋទូតចិន លោក Qiu Guohong មិនបាននិយាយអ្វីឡើយ ក្រោយពីជំនួបជាមួយអនុរដ្ឋមន្ត្រីការបរទេសកូរ៉េខាងត្បូងនោះនៅថ្ងៃទី១១ ខែកញ្ញាឡើយ។ ការកោះហៅនេះ កើតឡើងបន្ទាប់ពីរដ្ឋាភិបាលកូរ៉េខាងត្បូង បានហៅអគ្គកុងស៊ុលចិនប្រចាំក្រុងសេអ៊ូល ដើម្បីរំលែកទុក្ខជុំវិញរឿងប៉ះទង្គិចនេះ។
ដោយឡែកក្រសួងសុវត្ថិភាពនិងសន្តិសុខសាធារណៈកូរ៉េខាងត្បូង ដែលទទួលបន្ទុកគ្រប់គ្រងឆ្មាំការពារឆ្នេរ និយាយថា ទូកល្បាតទម្ងន់៤.៥តោន បានលិចកាលពីសប្ដាហ៍មុន អំឡុងពេលនៃប្រតិបត្តិការបង្ក្រាបទូកនេសាទខុសច្បាប់របស់ចិន នៅតំបន់ភាគខាងកើតប្រទេស។ យ៉ាងណាក្ដី គ្មានរបាយការណ៍មនុស្សរងគ្រោះ ក្នុងហេតុការណ៍នោះឡើយ ហើយសារព័ត៌មានកូរ៉េខាងត្បូងក៏ផ្សាយថា ទូកនេសាទចិនបានគេចខ្លួនក្រោយកើតហេតុ។
សេចក្ដីប្រកាសព័ត៌មានរបស់ក្រសួងដដែលចុះថ្ងៃទី១០ ខែតុលា បញ្ជាក់ថា កូរ៉េខាងត្បូង ក៏ស្នើឲ្យភាគីចិន កំណត់អត្តសញ្ញាណទូកនេសាទដែលត្រូវចោទថា ធ្វើឲ្យទូកល្បាតកូរ៉េខាងត្បូងលិចក្នុងសមុទ្រ។ ជាទម្លាប់នោះ កងឆ្មាំការពារឆ្នេរកូរ៉េខាងត្បូង តែងបើកប្រតិបត្តិការបណ្ដេញទូកនេសាទខុសចិន ដែលតែងតែចូលនេសាទដោយខុសច្បាប់ក្នុងដែនទឹកកូរ៉េខាងត្បូងនោះ។
ជារឿយៗ ការបង្ក្រាបទូកនេសាទចិនពីសំណាក់អាជ្ញាធរកូរ៉េខាងត្បូង បានរាលដាលខ្លាំងរហូតដល់មានទំនាស់ការទូតរវាងក្រុងសេអ៊ូល និងក្រុងប៉េកាំង។ ក្រុងសេអ៊ូល តែងបន្ទោសក្រុងប៉េកាំងថា បើកដៃឲ្យទូកនេសាទរបស់ខ្លួនចូលដែនទឹករបស់ខ្លួន និងមិនដែលចាត់វិធានការអ្វីរារាំងឡើយ។ ចំណែកចិនឯណោះ ឆ្លើយតបវិញថា ទូកនេសាទរបស់ខ្លួន ធ្វើសកម្មភាពក្នុងដែនទឹករបស់ខ្លួនប៉ុណ្ណោះ៕
Tag:
កូរ៉េខាងត្បូង
ចិន
ទូកល្បាត
© រក្សាសិទ្ធិដោយ thmeythmey.com