សង្គម​ស៊ីវិល៦០ ថ្កោលទោស​ក្រុម​សន្តិសុខ ដែល​វាយ​អ្នកការពារ​សិទ្ធិមនុស្ស
ជាតិ
សង្គមជាតិ
សង្គម​ស៊ីវិល៦០ ថ្កោលទោស​ក្រុម​សន្តិសុខ ដែល​វាយ​អ្នកការពារ​សិទ្ធិមនុស្ស
11, Oct 2016 , 2:16 pm        
រូបភាព
ភ្នំពេញ៖ អង្គការក្រៅរដ្ឋាភិបាល​ចំនួន៦០ បានរួម​គ្នា​ចេញ​សេចក្តីថ្លែងការណ៍​មួយ ដើម្បី​ថ្កោលទោស​ក្រុម​សន្តិសុខ​ខណ្ឌដូនពេញ ដែល​ប្រើ​អំពើហិង្សា​លើ​មន្ត្រី​ការពារ​សិទ្ធិមនុស្ស។ សង្គម​ស៊ីវិល ចាត់ទុក​ទង្វើ​នេះ​ជា​រឹតត្បិត​សិទ្ធិសេរីភាព​បញ្ចេញមតិ​នៅ​កម្ពុជា។ មន្ត្រីជាន់ខ្ពស់​អង្គការ​លីកាដូ លោក អំ សំអាត បាន​រងរបួស នៅ​គ្រា​ប៉ះទង្គិច​ដោយ​ហិង្សា នៅពេល​អាជ្ញាធរ​រារាំង​ពលរដ្ឋ​រងគ្រោះ​ដីធ្លី ដែល​ប្រារព្ធ​ទិវា​លំនៅដ្ឋាន​ពិភពលោក​លើក​ទី៣១ កាលពី​ថ្ងៃទី១០តុលា។



ក្រុម​សង្គម​ស៊ីវិល មិន​ពេញចិត្ត​ចំពោះ​ទង្វើ​របស់​សន្តិសុខ​ខណ្ឌ​ដូនពេញ​មួយចំនួន ដែល​ប្រើ​អំពើហិង្សា​ទៅ​ហ្វូង​ប្រជាពលរដ្ឋ ដែល​កំពុងតែ​ដង្ហែ​ក្បួន​ក្នុង​ទិវា​លំនៅដ្ឋាន​ពិភពលោក​លើក​ទី៣១ កាលពី​ម្សិលមិញ​ឡើយ។ សង្គម​ស៊ីវិល ចាត់ទុក​ការប្រើ​អំពើហិង្សា​ពី​សំណាក់​ក្រុម​សន្តិសុខ ដែល​បាន​បង្ក​ឲ្យ​លោក អំ សំអាត មន្ត្រី​ការពារ​សិទ្ធិមនុស្ស​នៃ​អង្គការ​លីកាដូ និង​លោក ច័ន្ទ ពុទ្ធិ​ស័​ក្ត សកម្មជន​ដីធ្លី​សហគមន៍​បឹងកក់ រួមទាំង​អ្នកសារព័ត៌មាន​ម្នាក់​រងរបួស​នោះ គឺជា​ការរំលោភ​សិទ្ធិមនុស្ស​យ៉ាងធ្ងន់ធ្ងរ។ 

សេចក្តីថ្លែងការណ៍​ក្រុម​សង្គម​ស៊ីវិល សហគមន៍ និង​សមាគម​ទាំង៦០នោះ បានបញ្ជាក់​ដូច្នេះ​ថា៖«ការវាយប្រហារ​នេះ បង្ហាញ​ពី​ការ​រឹតត្បិត​ខ្លាំង​ឡើង​នៃ​បរិយាកាស​សម្រាប់​ប្រើប្រាស់​សេរី​ភាពជា​មូលដ្ឋាន​ដោយ​សន្តិវិធី​នៅក្នុង​ប្រទេស​កម្ពុជា។ […..] យើងខ្ញុំ ជា​អង្គការ​សង្គម​ស៊ីវិល សូម​សម្ដែង​ការសោកស្តាយ​យ៉ាងខ្លាំង​ចំពោះ​សន្តិសុខ​សាលាខណ្ឌ​ដូនពេញ​មួយចំនួន ដែល​បាន​ប្រើប្រាស់​អំពើហិង្សា​ដោយ​គ្មាន​ហេតុផល​ក្នុងអំឡុង​ពេលដែល​ប្រជាពលរដ្ឋ ដើរ​ហែ​ក្បួន​អហិង្សា​មួយ ដើម្បី​ប្រារព្ធ​ទិវា​លំនៅដ្ឋាន​ពិភពលោក។ យើងខ្ញុំ សូម​ថ្កោលទោស​ចំពោះ​ការវាយប្រហារ​ដែល​មិនអាច​ទទួលយកបាន​នេះ»។

លោក អំ សំអាត មន្ត្រីជាន់ខ្ពស់​នៃ​អង្គការ​លីកាដូ ដែល​រង​ការវាយប្រហារ បាន​ប្រាប់​សារព័ត៌មានថ្មីៗថា ក្រុម​សន្តិសុខ​បាន​វាយ​លោក ត្រូវចំ​កន្លែង​មួយចំនួន ដូចជា ថ្គាម​ខាងឆ្វេង ថ្ពាល់​ខាងស្តាំ បបូរមាត់ កញ្ចឹងក និង​ចិញ្ចើម។ លោក អំ សំអាត យល់ថា​អំពើហិង្សា​នេះ គឺ​កើតឡើង​ពី​ទង្វើ​របស់​ក្រុម​សន្តិសុខ​ផ្ទាល់ មិនមែនជា​បញ្ជា​របស់​រដ្ឋាភិបាល​នោះទេ។ តែ​វា​ជា​ទង្វើរ​បំបាក់មុខ​លោកនាយក​រដ្ឋមន្ត្រី ហ៊ុន សែន ស្រប​ពេលដែល​អ្នករាយការណ៍​ពិសេស​ទទួលបន្ទុក​ផ្នែក​សិទ្ធិមនុស្ស​របស់​អង្គការសហប្រជាជាតិ​លោកស្រី រ៉ូ​ណា​ល់ ស្មី​ត មក​បំពេញ​ទស្សនកិច្ច​នៅ​កម្ពុជា ។

លោក​បញ្ជាក់​បែបនេះ​ថា«ពួកគាត់ (ក្រុម​សន្តិសុខ) ប្រើ​អំពើហិង្សា ចំ​ពេលដែល​លោកស្រី រ៉ូ​ណា ស្មី​ត អ្នករាយការណ៍​ពិសេស​របស់​អង្គការសហប្រជាជាតិ​មក​កម្ពុជា។ វា​អាក្រក់​មើល​មែនទែន។ ពួកគាត់​ធ្វើបែបនេះ គឺ​ដូចជា​បំបាក់មុខ​នាយករដ្ឋមន្ត្រី​តែម្តង»។

ជាមួយគ្នានេះ​ក្រុម​សង្គម​ស៊ីវិល បាន​ទ​ទួ​ច​ឲ្យ​លោកស្រី រ៉ូ​ណា ស្មី​ត ដែល​កំពុង​បំពេញ​ទស្សនកិច្ច​នៅ​កម្ពុជា លើក​ពី​បញ្ហា​នៃ​ការប្រើប្រាស់​អំពើហិង្សា​ពី​សំណាក់​អាជ្ញាធរ ដែល​គាបសង្កត់​លើ​សេរីភាព​ក្នុងការ​បញ្ចេញមតិ និង​ប្រមូលផ្ដុំ​ដោយ​សន្តិវិធី​នេះ រាយការណ៍​នៅ​អង្គការសហប្រជាជាតិ​ផងដែរ។

អង្គការ​ទាំងនោះ​មានដូចជា អង្គការ​សម្ព័ន្ធភាព​ការពារ​សិទ្ធិមនុស្ស​កម្ពុជា (CHRAC), សមាគម​អាដហុក (ADHOC),  សមាគម​គ្រូបង្រៀន​កម្ពុជា​ឯករាជ្យ (CITA), សម្ព័ន្ធ​ខ្មែរ​ជំរឿន និង​ការពារ​សិទ្ធិមនុស្ស លីកាដូ (LICADHO), គណៈកម្មាធិការ ដើម្បី​ការបោះឆ្នោត​ដោយ​សេរី និង​យុត្តិធម៌​នៅ​កម្ពុជា (COMFREL) ជាដើម។

សូមបញ្ជាក់ថា កាលពី​ថ្ងៃទី១០ ខែតុលា ឆ្នាំ២០១៦ ប្រជាពលរដ្ឋ​រាប់រយ​នាក់​បាននាំគ្នា​ដង្ហែ​ក្បួន​ពី​វិមាន​រដ្ឋសភា ឆ្ពោះទៅកាន់​ទីលាន​ប្រជាធិបតេយ្យ ដើម្បី​ប្រារព្ធ​ទិវា​លំនៅដ្ឋាន​ពិភពលោក​លើក​ទី៣។ ក្បួន​កំពុង​ដង្ហែ​តាមផ្លូវ ត្រូវបាន​អាជ្ញាធរ​ខណ្ឌដូនពេញ​រារាំង ដែល​បង្ក​ការប៉ះទង្គិច​គ្នា​រហូត​មាន​អ្នករងរបួស​ផងដែរ៕
 




Tag:
 សង្គម​ស៊ីវិល
© រក្សាសិទ្ធិដោយ thmeythmey.com