មេទ័ពហ្វីលីពីន ថា បើអាមេរិកបញ្ឈប់ផ្តល់ជំនួយ និងការគាំពារការពារជាតិ ហ្វីលីពីននៅតែរស់បាន

អន្តរជាតិ

មេទ័ពហ្វីលីពីន ថា បើអាមេរិកបញ្ឈប់ផ្តល់ជំនួយ និងការគាំពារការពារជាតិ ហ្វីលីពីននៅតែរស់បាន

11, Oct 2016 , 4:17 pm

រូបភាព

រដ្ឋមន្រ្តីការពារជាតិហ្វីលីពីន លោក Delfin Lorenzana (ឆ្វេង) និងលោកប្រធានាធិបតី Rodrigo Duterte

ដោយ:

ប្រមុខការពារជាតិហ្វីលីពីន បានថ្លែងការពារជំហររបស់លោកប្រធានាធិបតី Rodrigo Duterte លើទំនាក់ទំនងការពារជាតិរវាងហ្វីលីពីន និងអាមេរិក ដោយលោក បញ្ជាក់ថា ហ្វីលីពីន នៅតែអាចធានាពីសន្តិសុខរបស់ខ្លួនបាន ក្នុងករណីដែល អាមេរិក បញ្ចប់កិច្ចសហប្រតិបត្តិការលើជំនួយ និងការពារជាតិនោះ។ តែលោក អះអាងថា ជំហររបស់លោកប្រធានាធិបតីហ្វីលីពីនបច្ចុប្បន្ន មិនមានចេតនាក្នុងការលុបចោលកិច្ចសហប្រតិបត្តិការជាមួយនឹងអាមេរិកឡើយ។

ឆ្លើយតបនឹងសំណួររបស់សមាជិកព្រឹទ្ធសភានៅថ្ងៃទី១១ ខែតុលា នាឱកាសនៃការការពារសំណើថវិកាលើវិស័យការពារជាតិ ថាតើនឹងមានអ្វីកើតឡើង ប្រសិនសន្ធិសញ្ញាការពារជាតិរួមគ្នា(អាមេរិកនិងហ្វីលីពីន) ត្រូវបានមោឃភាពនោះ លោករដ្ឋមន្ត្រីការពារជាតិហ្វីលីពីន Delfin Lorenzana បានថ្លែងថា «ហ្វីលីពីន នៅតែអាចរស់បាន»។ នេះបើយោងតាមការចុះផ្សាយរបស់សារព័ត៌មាន inquirer.net។

លោករដ្ឋមន្ត្រី បន្តទៀតថាប្រសិន អាមេរិក ពិតជានឿយហត់នឹងការប្រើប្រាស់ពាក្យសម្តីរបស់លោកប្រធានាធិបតី ហើយមោឃភាពកិច្ចព្រមព្រៀងមែននោះ ហ្វីលីពីន អាចស្វែងរកការគាំទ្រពីសម្ព័ន្ធមិត្តផ្សេងទៀតដូចជាអូស្ត្រាលី ជប៉ុន និងកូរ៉េខាងត្បូងជាដើម។ តែលោក ក៏បញ្ជាក់ដែរថា ទំនាក់ទំនងរវាងអាមេរិក និងហ្វីលីពីន ស្ថិតនៅក្នុងស្ថានភាពធម្មតានៅឡើយនោះទេ ហើយ លោក Duterte ក៏មិនបានព្យាយាមបំផ្លាញចោលសន្ធិសញ្ញាការពារជាតិទ្វេភាគីនៃប្រទេសទាំងពីរផងដែរ។

ប្រមុខការពារជាតិរូបនោះ ក៏បានពន្យល់ដែរថា ប្រតិកម្មរបស់លោកប្រធានាធិបតីហ្វីលីពីនទៅកាន់អាមេរិកជាមួយនឹងពាក្យសម្តីអសុរោះ រួមជាមួយនឹងការព្រមានដើរចេញពីអាមេរិក គឺគ្រាន់តែ លោក Duterte មានអារម្មណ៍មិនល្អជាមួយអាមេរិកដែលមិនបានជួយលោកក្នុងប្រតិបត្តិការបង្ក្រាបគ្រឿងញៀន តែបែរជារិះគន់លោកទៅវិញ។

សូមជម្រាបផងដែរថា រយៈពេលចុងក្រោយនេះ លោកប្រធានាធិបតីហ្វីលីពីន បានប្រើប្រាស់ពាក្យសម្តីជេរប្រមាថប្រធានាធិបតីអាមេរិក លោក បារ៉ាក់ អូបាម៉ា និងរួមទាំងព្រមានចង់បញ្ចប់កិច្ចសហប្រតិបត្តិការការពារជាតិជាមួយនឹងអាមេរិកទៀតផង។ កិច្ចសហប្រតិបត្តិការយោធានោះ ត្រូវបានចុះហត្ថលេខាតាំងពីឆ្នាំ២០១៤ និងទើបតែចូលជាធរមាននៅដើមឆ្នាំ២០១៦នេះនោះទេ។

តាមរយៈកិច្ចសហប្រតិបត្តិការយោធាដែលផ្តួចផ្តើមឡើងដោយរដ្ឋបាលអតីតប្រធានាធិបតីហ្វីលីពីន អាមេរិក ទទួលបានមូលដ្ឋានយោធាអាកាសចំនួនប្រាំកន្លែងនៅក្នុងទឹកដីហ្វីលីពីន។ និយាយជារួមក្នុងរដ្ឋបាលអតីតប្រធានាធិបតីហ្វីលីពីន ប៊ែរនីណូ អាហ្គីណូ ទំនាក់ទំនងហ្វីលីពីន និងអាមេរិក បានមានភាពស្អិតល្មួតនឹងគ្នា។ ក្នុងនោះ អាមេរិក បានតួនាទីយ៉ាងសំខាន់ និងសកម្មក្នុងជ្រោមជ្រែងទាំងសន្តិសុខក្នុងស្រុក និងសន្តិសុខដែនសមុទ្រដែលហ្វីលីពីនប្រឈមជាមួយនឹងចិនយ៉ាងផុយស្រួយនៅក្នុងសមុទ្រចិនខាងត្បូង។

យ៉ាងណាក៏ដោយ បើទោះបីជាលោកប្រធានាធិបតីហ្វីលីពីន នៅតែបន្តរិះគន់ និងប្រើប្រាស់ពាក្យសម្តីខ្លាំងដាក់អាមេរិកក៏ដោយ អាមេរិក នៅមិនទាន់ដាក់ទម្ងន់ខ្លាំងឡើយ ពោលគឺអាមេរិក នៅតែអះអាងថា ទំនាក់ទ្វេភាគីនៃប្រទេសទាំងពីរដូចធម្មតានោះទេ។ នៅសប្តាហ៍មុននេះ លោក Josh EARNEST អ្នកនាំពាក្យសេតវិមាន ក៏បានបញ្ជាក់ដែរថា អាមេរិក នៅតែមានការតាំងចិត្តយ៉ាងមុតមាំលើសម្ព័ន្ធភាពដែលមានជាមួយនឹងហ្វីលីពីន៕