ម្ចាស់ខ្សែក្រវាត់ខ្មៅ៩ដាន់ សេង ប៊ុនសុង ចំណាយពេលស្ទើរមួយជីវិតដើម្បីសិក្សាពីក្បាច់គុន

កីឡាជាតិ

ជាតិ

ម្ចាស់ខ្សែក្រវាត់ខ្មៅ៩ដាន់ សេង ប៊ុនសុង ចំណាយពេលស្ទើរមួយជីវិតដើម្បីសិក្សាពីក្បាច់គុន

14, Oct 2016 , 4:26 pm

រូបភាព

ដោយ:

ព្រឹទ្ធាចារ្យ សេង ប៊ុនសុង ម្ចាស់ខ្សែក្រវាត់ខ្មៅ៩ដាន់ និងជាគ្រូបង្វឹកកីឡាហាប់ គីដូនៅ សហរដ្ឋអាមេរិកបានចំណាយពេលវេលាស្ទើរពេញមួយជីវិត ក្នុងការប្រឡូក និងសិក្សា ស្វែងយល់ពីនិយមន័យ និងអត្ថន័យរបស់ក្បាច់គុន។ លោកមិនត្រឹមតែបានសិក្សា ស្រាវ ជ្រាវនៅប្រទេសកម្ពុជាប៉ុណ្ណោះទេ លើសពីនេះ លោក បានចេញទៅសិក្សាស្រាវជ្រាវ នៅ តាមបណ្តាប្រទេសជាច្រើនដូចជា ចិន ជប៉ុន កូរ៉េ និងសហរដ្ឋអាមេរិកថែមទៀតផង។

ព្រឹទ្ធាចារ្យកីឡា សេង ប៊ុនសុង ម្ចាស់ខ្សែក្រវាត់ខ្មៅ៩ដាន់កីឡាហាប់គីដូ ដោយសារចង់ ស្វែង យល់ពីអត្ថន័យ និងគុណតម្លៃ នៃក្បាច់គុនបានចំណាយពេលវេលាលើការសិក្សាស្រាវជ្រាវ ស្ទើរ ពេញមួយជីវិត។ លោកបានប្រឡូកក្នុងវិស័យកីឡា ព្រមទាំងសិក្សាស្រាវជ្រាវ នៅកម្ពុជា អស់រយៈពេលជាច្រើនឆ្នាំ។ ពេលនោះលោក គឺជាអ្នកប្រដាល់ សេរីដ៏ល្បីល្បាញម្នាក់ នៅទល់ដែន(កម្ពុជា-ថៃ) នាទស្សវត្សរ៍១៩៨០។

ដោយសារកត្តាចង់ចេះចង់ដឹង បានជំរុញឲ្យលោកព្រឹទ្ធាចារ្យកីឡារូបនេះ សម្រេចចិត្តចាក ចេញពីប្រទេសកម្ពុជា ទៅសិក្សាស្រាវជ្រាវក្បាច់គុននៅក្រៅប្រទេស ជាបន្តបន្ទាប់ទៅកាន់ប្រទេសកូរ៉េ ជប៉ុន ចិន និងសហរដ្ឋអាមេរិក។ ជាមួយគ្នានេះ លោកបានចំណាយពេលជិត២០ឆ្នាំសម្រាប់ការសិក្សាស្រាវជ្រាវនៅប្រទេកូរ៉េ ជប៉ុន និងចិន។

ក្រោយបញ្ចប់បេសកកម្មនៅក្នុងប្រទេសទាំងនោះ លោក បានវិលត្រឡប់មកកាន់ប្រទេសកម្ពុជា ដោយបានពាំនាំនូវបទពិសោធន៍ និងបច្ចេកទេសល្អៗមកចែករំលែកដល់បណ្តាគ្រូបង្វឹកជើងចាស់នៅកម្ពុជា។ មិនយូរប៉ុន្មាន លោក ក៏បានចាកចេញពីកម្ពុជាទៅសិក្សាស្រាវជ្រាវនៅសហរដ្ឋអាមេរិកបន្តទៀត។ គិតមកដល់បច្ចុប្បន្ន សេង ប៊ុនសុង រស់នៅសហរដ្ឋអាមេរិកអស់រយៈពេលជាង៣០ឆ្នាំទៅហើយ។

សហរដ្ឋអាមេរិកជាប្រទេសចុងក្រោយសម្រាប់ការសិក្សាស្រាវជ្រាវរបស់ម្ចាស់ខ្សែក្រវ៉ាត់ខ្មៅ៩ដាន់កីឡាហាប់គីដូរូបនេះ ហើយជាប្រទេសដែលលោកទទួលបានខ្សែក្រវ៉ាត់ខ្មៅនេះផងដែរ។ មិនត្រឹមតែប៉ុណ្ណោះសហរដ្ឋអាមេរិកបានក្លាយជាទីកន្លែងស្នាក់នៅ និងជាកន្លែងដែលលោកធ្វើគ្រូបង្វឹកនាពេលបច្ចុប្បន្ននេះ។

តាមរយៈការឡូកក្នុងវិស័យកីឡាអស់រយៈពេលជាច្រើនឆ្នាំមកនេះ លោកព្រឹទ្ធាចារ្យ សេង ប៊ុនសុង មិនត្រឹមតែជាអ្នកលេងក្បាច់គុនហាប់ដូប៉ុណ្ណោះទេ។ លើសពីនេះលោកបានប្រឡូកក្នុងវិស័យកីឡាជាច្រើនទៀតដូចជា កាយសម្ព័ន្ធ ប្រដាល់សេរី តេក្វាន់ដូ អៃគីដូ និងយូដូ ថែមទៀតផង។

ជាមួយគ្នានេះ លោកបានជំរុញឲ្យអ្នកហាត់ក្បាច់គុនទាំងអស់ត្រូវមានវិន័យ សេចក្តីថ្លៃថ្នូរ និងក្រមសីលធម៌ ជាពិសេសត្រូវចេះប្រើប្រាស់ក្បាច់គុនទាំងនោះឲ្យមានប្រយោជន៍ ព្រោះគ្រប់ក្បាច់គុនទាំងអស់មិនមានក្បាច់គុនណាមានលក្ខណៈល្អប្រសើរជាងក្បាច់ណានោះទេ គឺវាអាស្រ័យទៅលើអ្នកហ្វឹកហាត់ចេះប្រើប្រាស់វា។

ទោះបីបច្ចុប្បន្នលោក សេង ប៊ុនសុង មានអាយុឈានចូល៦៣ឆ្នាំក៏ដោយ ប៉ុន្តែលោកនៅតែបន្តអាជីពក្នុងវិស័យកីឡាដដែល ដោយបានលោកបើកសាលាបង្ហាត់ក្បាច់គុនកីឡាហាប់គីដូនៅសហរដ្ឋអាមេរិក ជាពិសេសលោកក៏ជាគ្រូបង្វឹកមួយរូបផងដែរ។ លើសពីនេះលោកបានសន្យាថា នឹងវិលត្រឡប់មកជួយអភិវឌ្ឍន៍កីឡាហាប់គីដូកម្ពុជា ព្រមទាំងវិស័យកីឡាផ្សេងៗទៀតក្នុងរយៈពេល២ឆ្នាំខាងមុខនេះ៕