អន្តរជាតិ
រូបភាព៖ ប្រជាជនថៃយំសោកអោបព្រះឆាយាល័ក្ខណ៍ព្រះចៅភូមិបុល អាឌុលយ៉ាដេត (Xinhua)
×![]()
ការសោយទិរង្គតរបស់ព្រះចៅភូមិបុល អាឌុលយ៉ាដេត នឹងធ្វើឲ្យមានការផ្លាស់ប្តូរបរិបទនយោបាយថៃច្រើន។ រាជទាយាទដែលនឹងត្រូវគ្រងរាជ្យបន្តតំណែងមហាក្សត្រ ហាក់មិនសូវមានប្រជាប្រិយភាពទេក្នុងសង្គមថៃ ហើយវាប្រាកដណាស់ថា ស្ថាប័នរាជ្យបល្ល័ង្កនឹងធ្លាក់ចុះឥទ្ធិពល។ ពាក់ព័ន្ធបញ្ហានេះអ្នក វិភាគកម្ពុជាលោក បណ្ឌិត ដេត សុខឧត្តម សាកលវិទ្យាធិការរងនៃសាកលវិទ្យាល័យហ្សាម៉ាន់កម្ពុជាប្រមើលឃើញថា លទ្ធភាពនៃការផ្ទុះឡើងនៃវិបត្តិនយោបាយថៃកើនឡើងខ្លាំង ក្រោយការបាត់បង់មហាក្សត្រអង្គនេះ។
ខាងក្រោមនេះជាបទសម្ភាសន៍រវាងលោក សៅ ផលនិស្ស័យ និពន្ធនាយករងទទួលបន្ទុកព័ត៌មានអន្តរជាតិ និងលោក បណ្ឌិត ដេត សុខឧត្តម សាកលវិទ្យាធិការរងនៃសាកលវិទ្យាល័យហ្សាម៉ាន់កម្ពុជាពាក់ព័ន្ធបញ្ហានយោបាយថៃក្រោយការសោយទិវង្គតរបស់ព្រះចៅ ភូមិបុល អាឌុលយ៉ាដេត៖
ស្តាប់សំឡេង
ស្តាប់សំឡេង
ព្រះចៅភូមិបុល អាឌុលយ៉ាដេត ឡើងសោយរាជ្យជាផ្លូវការនៅឆ្នាំ ១៩៥០ ហើយវីរៈភាពរបស់ ព្រះអង្គ បានធ្វើឲ្យទ្រង់ក្លាយជាក្សត្រដែលទទួលបានការគាំទ្រនិងគោរពស្រឡាញ់ខ្លាំងពីសំណាក់ពលរដ្ឋថៃគ្រប់ស្រទាប់វណ្ណៈ។ ការសោយទិវង្គតរបស់ក្សត្រអង្គនេះបានធ្វើឲ្យមានការព្រួយបារម្ភចំពោះការប្រែប្រួលដែលមិននឹកស្មាននៃនយោបាយថៃ។
អ្នកវិភាគកម្ពុជាលោក បណ្ឌិត ដេត សុខឧត្តម សាកលវិទ្យាធិការរងនៃសាកលវិទ្យាល័យហ្សាម៉ាន់កម្ពុជា បានលើកឡើងថា បញ្ហានយោបាយអាចនឹងកើតឡើងនៅក្នុងប្រទេសថៃក្នុងរយៈពេលវែង ក្រោយការសោយទិវង្គតរបស់ព្រះចៅ ភូមិបុល អាឌុលយ៉ាដេត។
លោកពន្យល់ថា ក្រុមយោធាអាចនឹងព្យាយាមកាត់បន្ថយការពឹងពាក់លើស្ថាប័នព្រះមហាក្សត្រ ហើយងាកទៅប្រើប្រាស់ស្ថាប័នតុលាការដើម្បីកៀបសង្កត់រាល់អ្នកប្រឆាំងខ្លួនជាដើម។ កាលណាបើមានការកៀបសង្កត់ខ្លាំង វានឹងបណ្តាលឲ្យមានការប៉ះទង្គិចគ្នា។ ពីមុន ពេលក្រុមយោធាប្រើប្រាស់អំណាចកៀបសង្កត់ប្រជាជនថៃមួយចំនួន គេមិនប្រឆាំងដោយសារតែគេគិតថា ព្រះមហាក្សត្រអាចនៅពីក្រោយ។ ប៉ុន្តែពេលនេះ ក្រុមយោធាអស់លេសដោយសារគ្មានព្រះមហាក្សត្រ ភូមិបុល អាឌុលយ៉ាដេត ទៀតទេ។ ដូច្នេះលទ្ធភាពនៃការរើបម្រះរបស់ប្រជាជនថៃជាពិសេសអ្នកគាំទ្រលោក ថាក់ស៊ីន ស៊ីណាវ៉ាត្រា កើនឡើងច្រើនជាងមុន។ ហើយ ការវិលទៅរកជម្លោះនយោបាយកើនឡើងខ្លាំង ហើយវានឹងអាចកើតមានឡើងនៅពេលខាងមុខក្នុងរយៈពេលវែង៕
© រក្សាសិទ្ធិដោយ thmeythmey.com
