បើទោះបីជាមនុស្សមួយចំនួនឈានដល់ការប្រារព្ធខួបកំណើត១សតវត្សរ៍របស់ខ្លួនក៏ដោយ ប៉ុន្តែការសិក្សាមួយរបស់សាកលវិទ្យាល័យ Albert Einstein College of Medicine ហើយត្រូវបានផ្សព្វផ្សាយកាលពីពេលថ្មីៗនេះនៅលើទស្សនាវដ្តីវិទ្យាសាស្ត្រ Nature បង្ហាញថា ឱកាសរបស់មនុស្សដែលអាចរស់ដល់អាយុលើស១២៥ឆ្នាំ នឹងមិនមាននោះឡើយ។
អាយុកាលរបស់មនុស្សមានការកើនឡើងជាលំដាប់ចាប់តាំងពីសតវត្សរ៍ទី១៩មក ដោយសារតែមនុស្សយល់ដឹងច្រើនពីរបបអាហារ ការប្រើប្រាស់ថ្នាំពេទ្យ និងសេវាសុខភាពសាធារណៈ។ ប៉ុន្តែទោះបីជាយ៉ាងណាក៏ដោយ ការសិក្សារបស់ក្រុមអ្នកវិទ្យាសាស្ត្រនៃសាកលវិទ្យាល័យ Albert Einstein College of Medicine នៅសហរដ្ឋអាមេរិក ហើយត្រូវបានបោះពុម្ពផ្សាយដោយទស្សនាវដ្តីអង់គ្លេស Nature បង្ហាញថា ការឈានដល់អាយុ១២៥ឆ្នាំ គឺជាអាយុកាលដ៏វែងបំផុតរបស់មនុស្សជាតិ។
លោក Jan Vijg អ្នកដឹកនាំការស្រាវជ្រាវ បានអះអាងថា៖ «លទ្ធផលនៃការស្រាវជ្រាវរបស់យើង គឺរកឃើញអាយុអតិបរិមារបស់មនុស្ស ដែលអាចវែងបំផុតគឺ១២៥ឆ្នាំ»។ លោកបានបញ្ជាក់ថា ការសិក្សាត្រូវធ្វើឡើងលើមនុស្សនៅក្នុងប្រទេសជាង៤០ ។
មកដល់ពេលនេះ ស្ត្រីជនជាតិបារាំង Jeanne Calment ដែលបានទទួលមរណភាពនៅឆ្នាំ១៩៩៧ នៅតែជាមនុស្សដែលរស់យូរជាងគេនៅលើពិភពលោក ដោយបានឈានដល់អាយុ១២២ឆ្នាំ។
ការសិក្សាជាពិសេសលើមនុស្សនៅប្រទេសបារាំង ជប៉ុន អង់គ្លេស និងសហរដ្ឋអាមេរិក បានឲ្យឃើញថា មនុស្សមានអាយុវែងច្រើន គឺស្ថិតនៅចន្លោះពីឆ្នាំ១៩៧០ ដល់ឆ្នាំ១៩៩០ ហើយបានធ្លាក់ចុះចាប់ពីឆ្នាំ១៩៩៥មក។
អាយុកាលរបស់មនុស្សបានថយចុះ ០.៣៨ឆ្នាំ ជារៀងរាល់ឆ្នាំ ចន្លោះពីឆ្នាំ១៩៩៥ ដល់ឆ្នាំ២០០៦ ហើយបើគិតចាប់តាំងពីមរណភាពរបស់លោកយាយ Jeanne Calment គេសង្កេតឃើញថា អាយុកាលរបស់មនុស្សអាចឡើងដល់ត្រឹម១១៥ឆ្នាំ។
លោក Brandon Milholland ដែលជាអ្នកស្រាវជ្រាវម្នាក់ផងដែរនោះ បានអះអាងថា អាយុកាលវែងបំផុតរបស់មនុស្សអាចឡើងដល់១២៥ឆ្នាំ ប៉ុន្តែវាមានករណីមិនដល់មួយនាក់ផងក្នុងចំណោមមនុស្ស១ម៉ឺននាក់។
ក្រុមអ្នកវិទ្យាសាស្ត្រនៅសាកលវិទ្យាល័យ Albert Einstein College of Medicine បានលើកឡើងផងដែរថា កំនើននៃអាយុកាលមនុស្សត្រូវរារាំងដោយកត្តាមួយចំនួនដូចជាជំងឺរាតត្បាត ជំងឺឆ្លង និងកត្តាធម្មជាតិមួយចំនួន។
កាលពីខែឧសភា ឆ្នាំ២០១៦ សៀវភៅ Guinness Book of World Records បានចុះឈ្មោះលោកយាយជនជាតិអ៊ីតាលី Emma Martina ជាមនុស្សដែលមានអាយុវែងជាងគេលើពិភពលោក ហើយត្រូវបានគេជឿថា ជាមនុស្សតែម្នាក់គត់ដែលកើតនៅសតវត្សរ៍ទី១៩ ហើយកំពុងរស់រានមានជីវិត៕