ពាក់កណ្តាលម៉ារ៉ាតុននៅឋានសួគ៌បូកគោទទួលបានការទាក់ទាញជាងឆ្នាំមុន

កីឡាជាតិ

ជាតិ

ពាក់កណ្តាលម៉ារ៉ាតុននៅឋានសួគ៌បូកគោទទួលបានការទាក់ទាញជាងឆ្នាំមុន

25, Oct 2016 , 9:21 am

រូបភាព

ដោយ:

ព្រឹត្តិការណ៍រត់ប្រណាំងពាក់កណ្តាលម៉ារ៉ាតុនលើកទី៣នៅលើកំពូលភ្នំបូកគោ ដែលធ្វើឡើងដើម្បីមនុស្សធម៌ជួយមន្ទីរពេទ្យគន្ធបុប្ផាឆ្នាំនេះទទួលបានការទាក់ទាញខ្លាំងជាងឆ្នាំមុន ដោយឆ្នាំនេះមានអត្តពលិកប្រមាណជាជាង១ពាន់នាក់ចូលរួម។ អត្តពលិកមកពីប្រទេសផ្សេងៗគ្នាទាំងនេះត្រូវប្រកួតលើវិញ្ញាសាពាក់កណ្តាលម៉ារ៉ាតុន, ១០គីឡូម៉ែត្រ, ៥គីឡូម៉ែត្រ និង៣គីឡូម៉ែត្រ។

បើយោងតាមលោក កែវ សិដ្ឋ ប្រធានផ្នែកលក់ផ្នែកលក់ប្រចាំសណ្ឋាគារសុខាការប្រកួតពាក់កណ្តាលម៉ារ៉ាតុនឆ្នាំនេះមានអត្តពលិកចូលរួមប្រកួតទាំងអស់ចំនួនជាង១ពាន់នាក់ ខណៈឆ្នាំមុនមានត្រឹមតែជាង៨០០នាក់ប៉ុណ្ណោះ។អត្តពលិកទាំងនេះត្រូវប្រកួតលើវិញ្ញាសាពាក់កណ្តាលម៉ារ៉ាតុន, ១០គីឡូម៉ែត្រ, ៥គីឡូម៉ែត្រ និង៣គីឡូម៉ែត្រ។

លោកបានឲ្យដឹងទៀតថា ព្រឹត្តិការណ៍រត់ប្រណាំងដើម្បីមនុស្សធម៌មួយនេះកាលពីឆ្នាំមុនបានជួយដល់មន្ទីរពេទ្យគន្ធបុប្ផាចំនួន៤ពាន់ដុល្លារ ខណៈឆ្នាំនេះលោករំពឹងថា នឹងអាចជួយមន្ទីរពេទ្យគន្ធបុប្ផាច្រើន ឬស្មើកាលពីឆ្នាំមុន។ លោកបានបញ្ជាក់ទៀតថា សណ្ឋារគារសុខា មានគម្រោងរៀបចំការរត់ប្រណាំងបែបមនុស្សធម៌នេះឲ្យលើសពីមួយក្នុង១ឆ្នាំ។

ឆ្លងកាត់ការប្រកួតយ៉ាងស្វិតស្វាញអស់រយៈពេល១ថ្ងៃការប្រកួតនេះបានបញ្ចប់យ៉ាងជោគជ័យ និងរកឃើញម្ចាស់ជើងឯកប្រចាំវិញ្ញាសានីមួយៗ។ ក្នុងនោះវិញ្ញាសាពាក់កណ្តាលម៉ារ៉តុនផ្នែកបុរសម្ចាស់ជើងឯកបានទៅកីឡាករ ម៉ា វីរ៉ូ មកពីសាកលវិទ្យាល័យអាស៊ីអឺរ៉ុប ឬឯលេខ២បានទៅកីឡាករ Brendon Thoma និងលេខ៣បានទៅ Brang Yuhana។

ផ្នែកនារីម្ចាស់ជើងឯកបានទៅកីឡាការិនីJill Hamill ខណៈលេខ២ Lois Jean wood ward និងលេខ៣ Alli Phillips។ វិញ្ញាសា១០គីឡូម៉ែត្រផ្នែកបុរសម្ចាស់ជើងឯកបានទៅកីឡាករ គៀង សាម៉ន ឬឯលេខ២បានទៅ Neil Burns និងលេខ៣បានទៅកីឡាករ ហ្វុង យ៉ាន ជនជាតិបារាំងសញ្ជាតិខែ្មរ។ ផ្នែកនារីកីឡាការិនី ហេង ម៉ីជូ ទទួលបានចំណាត់ថ្នាក់លេខ១ ឬឯ Tara Whelan បានលេខ២ និងលេខ៣បានទៅ គង់ សូភីធីតា។

វិញ្ញាសា៥គីឡូម៉ែត្រផ្នែកបុរសម្ចាស់ជើងឯកបានទៅកីឡាករ ពៅ ហុក ឬឯលេខ២ ចាន់ សៀវខុង និងលេខ៣បានទៅកីឡាករ ឆេង មករា។ ចំណែកវិញ្ញាសា៣គីឡូម៉ែត្រម្ចាស់ជើងឯកបានទៅកីឡាករ លី អាសៀត លេខ២ យូប រ៉ាំលី និងលេខ៣ ថៃ សុគន្ធ៕