ពីនេះ ពីនោះ
ចំនួន«មួយកោដិ» ស្មើនឹង ១០លាន មិនមែនស្មើនឹង ១០០០លានទេ
× ភ្នំពេញ៖ ពាក្យថា«កោដិ» គឺជាខ្នាតរង្វាស់ចំនួនមួយដែលសាធារណជន មួយចំនួនលោកនៅមានការភ័ន្តច្រឡំ ដោយមិនប្រាកដថា មានចំនួនប៉ុន្មានឲ្យពិតប្រាកដ។ វចនានុក្រមខ្មែររបស់សម្ដេចព្រះសង្ឃរាជ ជួន ណាត បានកំណត់ដូចខាងក្រោម៖
ពាក្យ«កោដិ» ជា(បា. សំ) គឺជាខ្នាត់រង្វាស់ចំនួន មួយដែលមានចំនួនស្មើនឹង ១០លាន។ ដោយឡែកចំពោះពាក្យ«កោដិ»នេះ សាធារណជនមួយចំនួន លោកមានការច្រឡំថាស្មើនឹងពាក្យអង់គ្លេសថា «Billion» ដោយបកប្រែនេះថា មួយកោដិ។ ប៉ុន្តែតាមពិតពាក្យ «Billion» ជាភាសាអង់គ្លេសនេះ មានន័យស្មើនឹង ១០០កោដិ ឬស្មើនឹង ១០០០លាន។
ក្នុងការសរសេរពាក្យ«កោដិ» នេះផងដែរ សាធារណជន សូមកុំច្រឡំជាមួយពាក្យថា «កោត និង កោដ្ឋ»។ ព្រោះពាក្យ«កោត» ជាកិរិយាសព្ទ មានន័យថា ស្ញែង, ស្ញើចៈ គួរកោតគេដែរ។ ពាក្យនេះច្រើននិយាយនាំមុខពាក្យ ក្រែង, ញញើត, ខ្លាច, ខាមៈ កោតក្រែង, កោតញញើត, កោតខ្លាច, កោតខាម ជាដើម។ ចំណែកពាក្យ «កោដ្ឋ»ជានាម មានន័យថា ជង្រុក។ ម្យ៉ាងទៀត មានន័យថា ជារបស់សម្រាប់ដាក់សព, ដាក់ធាតុ។
សរុបមក ពាក្យ«កោដិ»ប្រើសំដៅដល់ ខ្នាតចំនួនស្មើនឹង ១០លាន, «កោត» ប្រើសំដៅ សេចក្ដីស្ញែង, ស្ញើច និង «កោដ្ឋ» ប្រើសំដៅ របស់ដាក់សព ឬ ដាក់ធាតុ។
ដកស្រង់ពីវចនានុក្រមខ្មែររបស់សម្ដេចព្រះសង្ឃរាជ ជួន ណាត
© រក្សាសិទ្ធិដោយ thmeythmey.com