-​ផ្ទោង​ផ្ទក់​ចាប់​ខ្វល់​ត្រូវ​ខ្យល់​ពី​ជើង​

​កត្តិក​ស្រុក​យើង​ស្រូវ​ស្រែ​លេងខ្លួន​

​ស្នូរ​ស្គរ​ឆៃយ៉ាំ​ផ្តាំ​ប្រាប់​នឹមនួន​

​ឲ្យ​ពៅ​ត្រៀមខ្លួន​ទៅលេង​អុំទូក​។​

 

-​លើក​មុន​ទូក​យើង​ធ្លាប់​ឈ្នះ​ភ្លឹក​ភ្លូក​

​អូន​ឈរ​ក្បាលទូក​រេ​រាំ​បញ្ជា​

​កីឡាករ​ខ្លាំង​ចិត្ត​តាំង​គ្រប់គ្នា​

​មិន​ថយ​រួញរា​ប្តេជ្ញា​យកឈ្នះ​។​
 

-​ទូក​-​ង​មាន​ជ័យស្រី​ស្រស់​តេជះ​

​យើង​រួមគ្នា​ឈ្នះ​លេខ​១​ជាថ្មី​

​ឈ្នះ​ឆ្នាំនេះ​ទៀត​នោះ​ភូមិ​យើង​ល្បី​

​ប្រឹង​ទាំងប្រុស​ស្រី​កុំបី​ឲ្យ​ភ្លាត់​។​
 

-​ហាត់​សម​ឲ្យ​ខ្លាំង​ត្រៀម​ច្បាំង​ឲ្យ​ស្ទាត់​

​បារមី​ក្នុង​វត្ត​ចាំ​ជួយ​ផងដែរ​

​គេ​មិនអាច​ផ្តួល​យើង​បើ​ពូកែ​

​ទូក​ស្និទ្ធស្នាល​ស្នេហ៍​ទូក​ថែ​កេរ​ឪ​៕