អ្នកនាំពាក្យមិនច្បាស់ថា ប្រធានស្តីទី នឹងទៅចូលរួមបុណ្យសព លោក ប៉ែន សុវណ្ណ

ជាតិ

អ្នកនាំពាក្យមិនច្បាស់ថា ប្រធានស្តីទី នឹងទៅចូលរួមបុណ្យសព លោក ប៉ែន សុវណ្ណ

30, Oct 2016 , 11:43 am

រូបភាព

ប្រធានស្តីទី CNRP បានទៅសួរសុខទុក្ខ លោក ប៉ែន សុវណ្ណ នៅខេត្តតាកែវ កាលពីថ្ងៃទី២៥ កក្កដា ២០១៥ កន្លងមក

ដោយ: ម៉ៅ សុផា

ភ្នំពេញ៖ សមាជិកនៃគណៈកម្មាធិការអចិន្ត្រៃយ៍របស់គណបក្សសង្គ្រោះជាតិ នឹងចូលរួមគោរពវិញ្ញាណក្ខន្ធលោក ប៉ែន សុវណ្ណ ដែលបានទទួលមរណភាព នៅម៉ោង៧និង១៥នាទីយប់ កាលពីថ្ងៃទី២៩ ខែតុលា ឆ្នាំ២០១៦។ នេះបើតាមសេចក្តីជូនដំណឹងរបស់គណបក្សសង្គ្រោះជាតិ ដែលបានផ្សព្វផ្សាយ នៅមុននេះបន្តិច។

លោក យឹម សុវណ្ណ អ្នកនាំពាក្យរបស់គណបក្សសង្គ្រោះជាតិ មិនអាចបញ្ជាក់បានទេថា ឯកឧត្តម កឹម សុខា នឹងទៅចូលរួមគោរពវិញ្ញាណក្ខន្ធលោក ប៉ែន សុវណ្ណ ឬយ៉ាងណា។ លោក គ្រាន់តែអះអាងថា ថ្នាក់ដឹកនាំនិងសមាជិកក្នុងគណៈកម្មាធិការនានារបស់គណបក្ស នឹងទៅខេត្តតាកែវ ដើម្បីចូលរួមគោរពវិញ្ញាណក្ខន្ធលោក ប៉ែន សុវណ្ណ។

អ្នកនាំពាក្យបក្សប្រឆាំងរូបនេះ បានប្រាប់សារព័ត៌មានថ្មីៗយ៉ាងខ្លីថា៖«ខ្ញុំមិនទាន់ច្បាស់ដែរ ថាគាត់ (ឯកឧត្តម កឹម សុខា) ទៅឬមិនទៅ»។

នៅក្នុងរចនាសម្ព័ន្ធនៃគណៈកម្មាធិការអចិន្ត្រៃយ៍របស់គណបក្សសង្គ្រោះជាតិ ឯកឧត្តម សម រង្ស៊ី គឺជាប្រធាន ចំណែកឯ ឯកឧត្តម កឹម សុខា គឺជាអនុប្រធាន។

យោងតាមសេចក្តីជូនដឹងខាងលើ សមាជិកនៃគណៈកម្មាធិការនានា ដែលនឹងចូលរួមគោរពវិញ្ញាណក្ខន្ធលោក ប៉ែន សុវណ្ណ រួមមាន គណៈកម្មាធិការអចិន្ត្រៃយ៍ គណៈកម្មាធិការនាយក គណៈកម្មាធិការវិន័យ និងគណៈកម្មាធិការប្រតិបត្តិ។ ក្រៅពីគណៈកម្មាធិការថ្នាក់ជាតិទាំងនេះ នៅមានគណៈកម្មាធិការនិងក្រុមការងារថ្នាក់ក្រោមជាតិទាំង២៥រាជធានី-ខេត្តរបស់បក្សប្រឆាំង ក៏នឹងទៅចូលរួមផងដែរ។

ជាមួយគ្នាផងដែរ ប្រធានស្តីទីគណបក្សប្រឆាំង បានបង្កើតគណៈកម្មការរៀបចំបុណ្យ ដោយមាន លោក ប៉ុល ហំម ជាប្រធាន លោក ឃី វណ្ណដេត លោក នុត រំដួល លោក ហូរ វ៉ាន់ និងលោក ម៉ៅ មុនីវណ្ណ ជាអនុប្រធាន។

សូមបញ្ជាក់ថា លោក ប៉ែន សុវណ្ណ គឺជាតំណាងរាស្ត្រគណបក្សសង្គ្រោះជាតិ និងជាអតីតនាយករដ្ឋមន្ត្រី ក្នុងសម័យសាធារណរដ្ឋប្រជាមានិតកម្ពុជា។ លោក បានទទួលមរណភាព ក្នុងជន្មាយុ៨០ឆ្នាំ ដោយរោគាពាធ៕