ជាតិ
យុវជនកម្ពុជាទទួលបានពានរង្វាន់ផ្នែកដោះស្រាយបញ្ហានិងការច្នៃប្រឌិតថ្មី
× សៀមរាប៖ យុវជនអាស៊ានចំនួន៣ក្រុម ត្រូវបានជ្រើសរើសដើម្បីទទួលជ័យលាភី ផ្នែកស្វែងរកដំណោះស្រាយបញ្ហាប្រឈម នៃគំនិតផ្តួចផ្តើមច្នៃប្រឌិតថ្មី។ ក្នុងចំណោមយុវជនឆ្នើមទាំង៣ក្រុមនោះ ក្រុមយុវជនកម្ពុជាដែលតំណាងឲ្យប្រទេសទាំងមូល ទទួលបានជ័យលាភីលេខ២។
ពិធីប្រគល់ពានរង្វាន់ជ័យលាភីយុវជនអាស៊ីអាគ្នេយ៍ ជាអ្នកដោះស្រាយបញ្ហាប្រឈមនៃការផ្តួចផ្តើមច្នៃប្រឌិតថ្មី ត្រូវបានធ្វើឡើងនៅរសៀលថ្ងៃទី២៨ តុលា ឆ្នាំ២០១៦ នៅខេត្តសៀមរាប។ ក្រោយពីចូលរួមប្រកួតប្រជែងដ៏ស្វឹកស្វាញប្រមាណ២០០ក្រុមរួចមក ក្រុមអ្នកវិទ្យាសាស្ត្រវ័យក្មេងកម្ពុជា ម៉ាឡេស៊ី និងឥណ្ឌូនេស៊ី ដែលត្រូវបានគណៈកម្មការ ជ្រើសរើសប្រគល់ពានរង្វាន់ដ៏កម្រមួយនេះ។
ទាក់ទងនឹងប្រធានសន្តិសុខស្បៀង និងចំណីអាហារ ក្រុមអ្នកវិទ្យាសាស្ត្រវ័យក្មេងមកពីវិទ្យាសា្ថនបច្ចេកវិទ្យាកម្ពុជា ហៅថា សាលាតិចណូ បានចំណាត់ថ្នាក់លេខ២ លេខ៣បានទៅលើម៉ាឡេស៊ី និងលេខ១ បានទៅក្រុមយុវជនឥណ្ឌូណេស៊ី។
កម្មវិធីប្រគល់ពានរង្វាន់ ដែលមានការចូលរួមពីរដ្ឋមន្ត្រីក្រសួងឧស្សាហកម្ម និងសិប្បកម្ម លោក ចម ប្រសិទ្ធ ក៏បានផ្តល់ពានរង្វាន់វិទ្យាសាស្ត្រអាស៊ាន-អាមេរិក ទៅដល់អ្នកវិទ្យាសាស្ត្រជាស្ត្រីផងដែរ។ លោកស្រីបណ្ឌិត Worgiit Setthapun មកពីប្រទេសថៃ ដែលបានច្នៃប្រឌិតលើផ្នែកថាមពលកកើតឡើងវិញ និងលោកស្រីបណ្ឌិត Sharifah Rafidah Wan Alwi មកពីប្រទេសម៉ាឡេស៊ី ទទួលបានពានរង្វាន់លើការច្នៃប្រឌិតផ្នែកជីវថាមពល។ ក្រៅពីនេះ គឺជាជ័យលាភីអាហារូបករណ៍ Da Vinci ដែលបានទៅលើយុវជនវ័យក្មេងពីររូប គឺយុវជពីប្រទេសប្រ៊ុយណេ និងយុវនារីមកពីប្រទេសភីលីពីន។
តំណាងក្រុមយុវជនកម្ពុជា កញ្ញា ឈឹម បញ្ចពណ៌ បានសម្តែងទឹកចិត្តសប្បាយរីករាយ ដែលបាននាំពានរង្វាន់ដល់ប្រទេសជាតិ។ កញ្ញាបញ្ជាក់ថា ឧបករណ៍ដែលក្រុមបានផលិត គឺឧបករណ៍ល្បើកថ្មី ដោយផ្តោតលើការធ្វើជ្រក់ត្រសក់ រួមទាំងការផលិត រូបមន្ត និងការវេចខ្ចប់ត្រឹមត្រូវ។ កញ្ញា បញ្ចពណ៌ អះអាងថា ការផលិតនេះ គឺដើម្បីធានាសុវត្ថិភាពបញ្ហាអនាម័យ ដល់ប្រជាពលរដ្ឋកម្ពុជា។ បញ្ចពណ៌ ដែលកំពុងបន្តថ្នាក់អនុបណ្ឌិតនៅប្រទេសបារាំង លើជំនាញ វិទ្យាសាស្ត្រ និងដំណើការវត្ថុធាតុដើមសម្រាប់ចំណីអាហារ និងបរិស្ថាន ស្នើឲ្យយុវជនខ្មែរចាប់អារម្មណ៍លើការរៀនជំនាញផ្នែកវិទ្យាសាស្ត្រឲ្យបានច្រើន និងប្រើវាដើម្បីអភិវឌ្ឍន៍ប្រទេសជាតិ។
គួររម្លឹកថា កម្មវិធីប្រកួតប្រជែងពានរង្វាន់អាស៊ាន-អាមេរិក ផ្នែកវិទ្យាសាស្ត្រ និងបច្ចេកវិទ្យា ត្រូវបានរៀបចំឡើងអំឡុង ខែមិនាកន្លងទៅ តាមរយៈកម្មវិធី Yseali (Young Southeast Asian Leaders Initiative) របស់សហរដ្ឋអាមេរិក។ ម្ចាស់ជ័យលាភីទាំងអស់ ក្រៅពីទទួលបានពានមួយហើយនោះ គឺនៅខែមីនា ឆ្នាំ២០១៧ខាងមុខនេះ ពួកគេនឹងធ្វើដំណើរទស្សនកិច្ចរយៈពេល៣សប្តាហ៍ នៅសហរដ្ឋអាមេរិក៕
© រក្សាសិទ្ធិដោយ thmeythmey.com