បក្សប្រឆាំងនៅតែដេញដោលរឿងតម្លៃកសិផលធ្លាក់ចុះ ដោយត្រៀមកោះហៅលោក វេង សាខុន

ជាតិ

បក្សប្រឆាំងនៅតែដេញដោលរឿងតម្លៃកសិផលធ្លាក់ចុះ ដោយត្រៀមកោះហៅលោក វេង សាខុន

02, Nov 2016 , 9:59 pm

រូបភាព

លោក-វេង-សាខុន-នៅខាងឆ្វេង-ឯលោក-ប៉ុល-ហំម-នៅខាងស្តាំ

ដោយ:

គណៈកម្មការទី ៣ នៃរដ្ឋសភា នឹងដាក់លិខិតកោះអញ្ជើញរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មកឆ្លើយបំភ្លឺជុំវិញការធ្លាក់ចុះតម្លៃកសិផលរបស់កសិករកន្លងមក។ អ្នកនាំពាក្យក្រសួងកសិកម្ម នៅមិនទាន់ហ៊ានអត្ថាប្បាយបែបណាឡើយ ដើម្បីឆ្លើយតបនឹងគម្រោងកោះហៅរបស់គណៈកម្មការនេះ។

បញ្ហាធ្លាក់ចុះតម្លៃកសិកផលរបស់កសិករ នៅតែជាប្រធានបទសំខាន់ ដែលគណបក្សសង្គ្រោះជាតិ ត្រូវជួបដេញដោលជាមួយមន្ត្រីរដ្ឋាភិបាលអំពីដំណោះស្រាយបញ្ហានេះ។ នៅអំឡុងខែវិច្ឆិកានេះ គណៈកម្មការទី ៣ នៃរដ្ឋសភា ដែលមានលោក ប៉ុល ហំម តំណាងរាស្ត្រគណបក្សសង្គ្រោះជាតិ ជាប្រធាន នឹងដាក់លិខិតកោះអញ្ជើញលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ មកបំភ្លឺ។

ផែនការរបស់លោក ប៉ុល ហំម ប្រធានគណៈកម្មការ ផែនការ វិនិយោគ កសិកម្ម អភិវឌ្ឍន៍ ជនបទ នៃរដ្ឋសភាខាងលើ ត្រូវបានប្រកាសដោយលោក យឹម សុវណ្ណ អ្នកនាំពាក្យគណបក្សសង្គ្រោះជាតិ នៅក្នុងសន្និសីទកាសែតនៅទីស្នាក់ការកណ្តាលបក្ស បន្ទាប់ពីកិច្ចប្រជុំរបស់គណៈកម្មាធិការអចិន្ត្រៃយ៍របស់គណបក្សប្រឆាំង កាលពីល្ងាចថ្ងៃអង្គារទី ០១ ខែវិច្ឆិកា។ លោក យឹម សុវណ្ណ បានបញ្ជាក់យ៉ាងនេះថា ៖«កសិករយើងកំពុងប្រឈមនឹងការលំបាកដោយសារតម្លៃកសិផលចុះថោក។ យើងទាមទារឲ្យមានដំណោះស្រាយ,យើងទាមទារឲ្យរដ្ឋាភិបាលមានវិធានការជាក់ស្តែង ដើម្បីឲ្យកសិកររួចផុតពីការលំបាក ឲ្យកសិផលមានទីផ្សារ និងផលិតទៅចំណេញ។ យើងនឹងសួរនាំរដ្ឋមន្ត្រីកសិកម្ម ថាតើមានដំណោះស្រាយយ៉ាងដូចម្តេចហើយ»?

ស្ទើររៀងរាល់ឆ្នាំ កសិករខ្មែរ តែងតែត្អូញត្អែរពីភាពលំបាករបស់ពួកគេ ដោយសារតម្លៃកសិផលលក់បានថោក។ កាលពីខែកញ្ញាកន្លងទៅ ប្រជាកសិករមួយចំនួននៅខេត្តបាត់ដំបង បាននាំគា្នតវ៉ា ដោយចាក់ស្រូវចោលនៅតាមផ្លូវសាធារណ ដោយសារតែតម្លៃស្រូវធ្លាក់ចុះខ្លាំង ដែលធ្វើឲ្យពួកគេខាតបង់ច្រើន ហើយមានអ្នកខ្លះវក់វីនឹងបំណុលធនាគារផងដែរ។

ទាក់ទងនឹងគម្រោងកោះហៅរបស់លោក ប៉ុល ហំម រឿងបញ្ហាតម្លៃកសិផលកសិករនេះ លោក ឡោ រស្មី អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ មិនអត្ថាធិប្បាយនោះទេ ព្រោះលោកយល់ថា ខុសបែបបទរដ្ឋបាល ដោយលោករុញឲ្យទៅសួរលោក ឡេង ប៉េងឡុង អ្នកនាំពាក្យរដ្ឋសភាវិញ។ លោក រស្មី ប្រាប់សារព័ត៌មានថ្មីៗ យ៉ាងខ្លីបែបនេះថា៖« សូមលោកទៅសួរអ្នកនាំពាក្យរដ្ឋសភាវិញទៅ ទើបត្រឹមត្រូវតាមបែបបទរដ្ឋបាល»។ តែយ៉ាងណាក្តី ក្រោយពីមានការតវ៉ារបស់ប្រជាកសិករមួយចំនួន ដោយសារតម្លៃស្រូវចុះថោកខ្លាំងពេក កាលពីដើមខែកញ្ញា រដ្ឋាភិបាលបានសម្រេចបញ្ចេញកញ្ចប់ថវិកាចំនួន ២០លានដុល្លារ និងទុនចំនួន ៧ លានដុល្លារទៀតពីធនាគារអភិវឌ្ឍន៍ជនបទ ដើម្បីជាកម្ចីដល់ក្រុមហ៊ុនរោងម៉ាស៊ីនកិនស្រូវ ក្នុងការប្រមូលទិញស្រូវពីកសិករ។

ជុំវិញវិធានការដើម្បីកុំឲ្យកសិផលខ្មែរធ្លាក់តម្លៃរាល់ឆ្នាំនេះ នៅក្នុងបទសម្ភាសន៍មួយ ជាមួយសារព័ត៌មានថ្មីៗ កាលពីពេលកន្លងទៅ លោក សុង សារ៉ន ម្ចាស់រោងម៉ាស៊ីនកិនស្រូវ និងជាអគ្គនាយកក្រុមហ៊ុន អេមរុ រ៉ាយ បានលើកឡើងថា បញ្ហាផលិតផលកសិកម្មរបស់កសិករធ្លាក់ចុះកន្លងមក បណ្តាលមកពីកង្វះខាតយន្តការ ឬវិធានការច្បាស់លាស់របស់រដ្ឋ និងកង្វះការយល់ដឹងផ្នែកទីផ្សាររបស់កសិករខ្លះដែរ។ លោកថា រដ្ឋាភិបាល ត្រូវមានវិធានការ ឬផែនការដោះស្រាយបញ្ហាទុកជាមុន ជាជាងចាំបញ្ហារបស់កសិករកើតឡើងហើយ ទើបនាំគ្នាដោះស្រាយ។

លោក សារ៉ន បានផ្តល់យោបល់ថា រដ្ឋាភិបាល ត្រូវសហការជាមួយស្ថាប័នពាក់ព័ន្ធ ដើម្បីពន្យល់កសិករឲ្យយល់ពីតម្រូវការទីផ្សារជាមុនសិន មុននឹងពួកគេសម្រេចចិត្តដាំដំណាំកសិផលណាមួយ។ ម្យ៉ាងទៀតរដ្ឋ អាចឲ្យកសិករខ្ចីលុយពីធនាគារដោយការប្រាក់ទាបបំផុត ឬគ្មានការប្រាក់តែម្តង ហើយរដ្ឋត្រូវត្រៀមបម្រុងថវិកា ដើម្បីទិញពីកសិផលពីកសិករស្តុបទុក នៅពេលដែលតម្លៃកសិផលធ្លាក់ថ្លៃខ្លាំង។ អ្នកជំនាញខាងលើប្រាប់វិធានការបែបនេះហើយ ក៏រិះគន់ចំពោះស្ថាប័នដែលទទួលខុសត្រូវពិតប្រាកដចំពោះបញ្ហាដំណាំកសិផលកសិករផងដែរ។ លោកថា រដ្ឋាភិបាល គួរមានស្ថាប័នណាមួយឲ្យច្បាស់លាស់ ដើម្បីទទួលបន្ទុកបញ្ហានេះ ជាជាងដាក់ក្រសួងច្រើនពេកឲ្យធ្វើការងារនេះ ហើយរកអ្នកទទួលខុសត្រូវពិតប្រាកកមិនឃើញ៕