ជាតិ
សង្គមជាតិ
រថយន្តដឹកកម្មករ៖ លោក ប៉ាវ ស៊ីណា ស្នើឲ្យអ្នកពាក់ព័ន្ធប្រជុំបន្ទាន់
×
កម្មករ កម្មការិនីសរុបចំនួន៣៨នាក់ បានរងរបួសធ្ងន់ និងស្រាល នៅក្នុងគ្រោះថ្នាក់ចរាចរណ៍ ២ ករណីផ្សេងគ្នា នៅក្នុងខេត្តស្វាយរៀង។ លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ បានស្នើឲ្យអ្នកពាក់ព័ន្ធបើកកិច្ចប្រជុំបន្ទាន់ ដើម្បីរកដំណោះស្រាយទប់ស្កាត់កុំឲ្យកើនមានគ្រោះថ្នាក់ចរាចរណ៍ចំពោះរថយន្តដឹកកម្មករតទៅទៀត។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ បានស្នើឲ្យក្រសួងការងារ និយោជក និងភាគីពាក់ព័ន្ធ ត្រូវបើកកិច្ចប្រជុំជាបន្ទាន់ ដើម្បីស្វែងរកវិធីសាស្ត្រដោះស្រាយ ក៏ដូចជាបង្កើតយន្តការថ្មីទៀត ដើម្បីទប់ស្កាត់ករណីគ្រោះថ្នាក់របស់ឡានដឹកកម្មករ។
លោក ប៉ាវ ស៊ីណា បានបង្ហោះវីដេអូឃ្លីបជាង២នាទី នៅថ្ងៃទី២ ខែវិច្ឆិកា បន្ទាប់ពីទទួលព័ត៌មានរងរបួសជិត៤០នាក់ របស់កម្មករ កម្មការិនី ក្នុងខេត្តស្វាយរៀង។
បើតាម លោក ប៉ាវ ស៊ីណា ប្រសិនបើអ្នកពាក់ព័ន្ធមិនស្វែងរកយន្តការថ្មីទេ ហេតុការណ៍នេះ នឹងនៅតែបន្តកើតឡើង ហើយវាអាចប៉ះពាល់ដល់ស្មារតីរបស់កម្មករ កម្មការិនីផ្សេងទៀត ដែលបានដឹងហេតុការណ៍នេះ។
សូមបញ្ជាក់ថា កម្មករ កម្មការិនីសរុបចំនួន៣៨នាក់ បានរងរបួសធ្ងន់ និងស្រាល ក្នុងគ្រោះថ្នាក់ចរាចរណ៍ ដែលកើតឡើង នៅថ្ងៃទី១ និងទី២ ខែវិច្ឆិកានេះ ក្នុងខេត្តស្វាយរៀង។ ក្នុងឧបទ្ទវហេតុគ្រោះថ្នាក់ចរាចរណ៍ រវាងរថយន្តដឹកកម្មករ និងរថយន្តកុងទីន័រ នៅថ្ងៃនេះ បណ្តាលឲ្យកម្មករ-កម្មការិនី ចំនួន២៦នាក់ បានរងរបួសធ្ងន់ និងស្រាល ខណៈថ្ងៃទី១ខែវិច្ឆិកា មានកម្មករ កម្មការិនីចំនួន១២នាក់របួស។ នេះតាមសេចក្តីប្រកាសព័ត៌មានរបស់ក្រសួងការងារ បណ្តុះបណ្តាលវិជ្ជាជីវៈ៕
Tag:
ប៉ាវ ស៊ីណា
រថយន្តដឹកកម្មករ
© រក្សាសិទ្ធិដោយ thmeythmey.com