កីឡាជាតិ
ជាតិ
កីឡាជាតិ៖ ក្រុមបាល់ទាត់ខេត្តសៀមរាបដណ្តើមបានមេដាយមាសផ្នែកបុរស និងមេដាយសំរឹទ្ធផ្នែកនារី
×
ក្រោយការប្រកួតប្រជែងអស់រយៈពេលជិត២សប្តាហ៍កន្លងមក ក្រុមបាល់ទាត់បុរសខេត្តសៀមរាបដណ្តើមបានមេដាយមាសពីព្រឹត្តិការណ៍កីឡាជាតិលើកទី១ ក្រោយប្រកួតឈ្នះក្រុមបាល់ទាត់រាជធានីភ្នំពេញ ៤-២ កាលល្ងាចថ្ងៃសុក្រ ក្នុងការប្រកួតវគ្គផ្តាច់ព្រ័ត្រ នៅពហុកីឡដ្ឋានជាតិអូឡាំពិក ខណៈក្រុមបាល់ទាត់នារីទទួលបានមេដាយសំរឹទ្ធ។
ក្រុមបាល់ទាត់បុរសមកពីខេត្តសៀមរាប បានប្រកួតយកឈ្នះក្រុមបាល់ទាត់រាជធានីភ្នំពេញ ក្នុងលទ្ធផល ៤ទល់២ ដើម្បីឈ្នះមេដាយមាសពីព្រឹត្តិការណ៍កីឡាជាតិលើកទី១។ ចំណែកមេដាយសំរឹទ្ធបានទៅខេត្តកំពង់ចាម ក្រោយប្រកួតឈ្នះខេត្តបាត់ដំបងក្នុងលទ្ធផល ៣ទល់១។
វិញ្ញាសាបាល់ទាត់បុរសសម្រាប់ព្រឹត្តិការណ៍កីឡាជាតិលើកទី១នេះ មាន ២៣ រាជធានី ខេត្តចូលរួម ដោយចែកចេញជា៦ពូល ក្នុងនោះពូល A មានខេត្ត ក្រចេះ មណ្ឌលគិរី ត្បូងឃ្មុំ និងរាជធានីភ្នំពេញ។ ពូល B មានខេត្តរតនគិរី កំពត កំពង់ឆ្នាំង និងសៀមរាប។ ពូល C មានតែ២ក្រុមប៉ុណ្ណោះ គឺ តាកែវ និងកំពង់ធំ។ ពូល D មានខេត្តប៉ៃលិន កំពង់ស្ពឺ កំពង់ចាម និងព្រៃវែង។ ពូល E មានខេត្តកែប ក្រសួងមហាផ្ទៃ ព្រះវិហារ និងក្រសួងការពារជាតិ។ ពូល F មានខេត្តកោះកុង ព្រះសីហនុ កណ្តាល និងឧត្តរមានជ័យ។
ចំណែកវិញ្ញាសាបាល់ទាត់នារីវិញ មេដាយមាសបានទៅខេត្តប៉ៃលិន បន្ទាប់ពីបំបាក់ ខេត្តកំពង់ស្ពឺក្នុងលទ្ធផល ៥-០ ខណៈមេដាយសំរឹទ្ធបានទៅខេត្តសៀមរាប។
វិញ្ញាសាបាល់ទាត់នារីនៃព្រឹត្តិការណ៍កីឡាជាតិលើកទី១ មាន១០ក្រុមចូលរួម ដោយចែកចេញជា២ពូល ក្នុងនោះពូល A មានខេត្តប៉ៃលិន សៀមរាប ព្រះវិហារ ត្បូងឃ្មុំ និងកំពង់ឆ្នាំង។ ពូល B មានខេត្ត ស្វាយរៀង កំពង់ស្ពឺ បាត់ដំបង ឧត្តរមានជ័យ និងកណ្តាល។
ក្រោយការប្រកួតជាងមួយសប្តាហ៍រួចមក ការប្រកួតកីឡាជាតិលើកទី១ បានបញ្ចប់ការប្រកួតគ្រប់វិញ្ញាសាអស់ហើយ ខណៈក្រុមកីឡាមកពីរាជធានីភ្នំពេញអាចរកមេដាយបានច្រើនជាងគេ ដែលតាមពីក្រោយដោយក្រសួងមហាផ្ទៃ និងក្រសួងការពារជាតិ។ ដោយមានកីឡាចំនួន ១៥ប្រភេទ ត្រូវជា១៨៩ វិញ្ញាសា និងមានកីឡាករ កីឡាការនីចូលរួមប្រមាណ ២៦៣៧នាក់។
ព្រឹត្តិការណ៍កីឡាជាប្រវត្តិសាស្ត្រនេះ មានក្រុមកីឡាករ កីឡាការនីចូលរួមទាំង ២៤រាជធានីខេត្ត ដោយមាន១៥ប្រភេទកីឡា ត្រូវជា១៨៩ វិញ្ញាសា និងមានកីឡាករ កីឡាការិនីចូលរួមប្រមាណ ២៦៣៧នាក់ ដែលប្រារព្ធធ្វើឡើងនៅពហុកីឡដ្ឋានជាតិអូឡាំពិក និងខេត្តកំពង់ចាម៕
© រក្សាសិទ្ធិដោយ thmeythmey.com