ជាតិ
សង្គមជាតិ
តុលាការសម្រេចឃាត់ខ្លួនអគ្គនាយករងអាជ្ញាធរអប្សរាករណីកាប់ដើមគ្រញូង
× សៀមរាប៖ នៅព្រឹកថ្ងៃទី៩ វិច្ឆិកានេះ តុលាការខេត្តសៀមរាប បានសម្រេចឃាត់ខ្លួនបុគ្គលិកអាជ្ញាធរជាតិអប្សរាចំនួន២រូប ករណីកាប់ដើមគ្រញូងនៅរមណីយដ្ឋានអង្គរ។ ក្នុងចំណោមបុគ្គលិក២រូបនោះ គឺមានលោក ឈរ ថាណាត អគ្គនាយករង ទទួលបន្ទុកនាយដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន នៃអាជ្ញាធរជាតិអប្សរាផងដែរ។
នៅម៉ោងប្រមាណ១០ព្រឹក ថ្ងៃទី៩ វិច្ឆិកានេះ តុលាការបានឃាត់ខ្លួនជនសង្ស័យ ២ រូប ដែលពាក់ព័ន្ធករណីកាប់ដើមគ្រញូង។ ជនសង្ស័យ ទាំង២ រូបនោះ គឺ លោក ឈរ ថាណាត មានតួនាទី ជាអគ្គនាយរងទទួលបន្ទុកនាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន និងលោក ចេវ ផល ប្រធានការិយាល័យទទួលបន្ទុកព្រៃឈើនៃអាជ្ញាធរជាតិអប្សរា។
លោក ភួង លីណា ប្រធានមន្ទីរបរិស្ថានខេត្តសៀមរាប បានប្រាប់សារព័ត៌មានថ្មីៗតាមទូរសព្ទនៅរសៀលនេះថា តុលាការកំពុងដំណើការការសាកសួរចម្លើយបន្ថែម។ យ៉ាងណាក៏ដោយ ករណីឃាត់ខ្លួននេះ ដោយសារបុគ្គលិករបស់អាជ្ញាធរជាតិអប្សរា បានកាប់ផ្តួលរំលំដើមគ្រញូងបន្ថែម ក្រោយជនល្មើសមិនស្គាល់អត្តសញ្ញាណលួចកាប់នៅយប់ថ្ងៃទី៤ វិច្ឆិកាកន្លងទៅ។
ពាក់ព័ន្ធនឹងដើមគ្រញូង ដែលត្រូវបានដឹកយកទៅរក្សាទុកនៅរដ្ឋបាលព្រៃឈើ ក្នុងនោះអាជ្ញាធរខេត្ត ក៏បានសម្រេចប្រគល់ជូនប្រជាពលរដ្ឋអ្នកភូមិនគរក្រៅវិញផងដែរ។ តាមការបញ្ជាក់របស់លោក លីណា ពិធីប្រគល់ដើមគ្រញូង នឹងធ្វើឡើងនៅម៉ោង២រសៀលនេះ ដោយត្រូវរក្សាទុកនៅវត្តដំរីសែនជ័យ ហៅវត្តថ្មី ដើម្បីឲ្យប្រជាពលរដ្ឋគោរពបូជាដូចពេលមុន។
នៅល្ងាចថ្ងៃទី៨ វិច្ឆិកាម្សិលមិញ លោក ឈរ ថាណាត បានសរសេរលិខិតសុំទោស ដោយព្រមទទួលកំហុសចំពោះការដែលលោកបញ្ជាឲ្យបុគ្គលិកកាប់រំលំដើមគ្រញូង ដោយមិនបានសុំគោលការណ៍ពីអគ្គនាយកអាជ្ញាធរជាតិអប្សរា។ លោក ឈរ ថាណាត បានបញ្ជាក់ក្នុងលិខិតនោះថា រាល់ផលលំបាក ការចោទប្រកាន់ និងការរិះគន់នានាមកលើអាជ្ញាធរជាតិអប្សរា និងថ្នាក់ដឹកនាំទាំងអស់ គឺជាកំហុសរបស់ខ្លួនលោកផ្ទាល់ ដោយមិនមានការពាក់ព័ន្ធ និងការទទួលខុសត្រូវរបស់ស្ថាប័នអប្សរាឡើយ។
គួររម្លឹកថា ដើមគ្រញូងយក្សមួយដើម ដែលមានមុខកាត់ ៨៥សង់ទីម៉ែត្រ និងបណ្តោយប្រមាណ ១៥ម៉ែត្រ ត្រូវបានជនល្មើសលួចកាប់ នៅយប់ថ្ងៃទី៤ វិច្ឆិកា ឆ្នាំ២០១៦ ។ នៅព្រឹកថ្ងៃទី៦ ខែវិច្ឆិកឆា ក៏មានការភ្ញាក់ផ្អើលខ្លាំង ដោយសារក្រុមមន្ត្រីនៃអាជ្ញាធរជាតិអប្សរា បានកាន់រណាចូលទៅកាត់បន្ថែម។ តាមការបញ្ជាក់របស់អាជ្ញាធរជាតិអប្សរា សកម្មភាពកាត់ផ្តួលរបស់គេ ដើម្បីបង្ការហានិភ័យ ដល់ប្រជាពលរដ្ឋក៏ដូចជាភ្ញៀវទេសចរ ដោយសារដើមគ្រញូងននោះ៕
Tag:
ដើមគ្រញូង
អាជ្ញាធរជាតិអប្សរា
© រក្សាសិទ្ធិដោយ thmeythmey.com