ជាតិ
សង្គមជាតិ
អាជ្ញាធរខេត្តសៀមរាបចុះកាត់ខ្សែកាបឆ្លងផ្លូវដើម្បីកែលម្អសោភ័ណភាព
× សៀមរាប៖ ក្រោយពីដាក់ឱសានវាទរួចមក អាជ្ញាធរខេត្តសៀមរាប បានចាប់ផ្តើមប្រតិបត្តិការចុះកាត់ខ្សែកាបរបស់ក្រុមហ៊ុនមួយចំនួន ដែលបានតខុសបច្ចេកទេស និងអាចបង្កហានិភ័យដល់ប្រជាពលរដ្ឋ។ ការចុះអនុវត្តន៍កាត់ខ្សែកាប ដែលមានសភាពប្រតេកប្រតាកពាសពេញផ្លូវនេះ គឺក្នុងបំណងរៀបចំសុវត្ថិភាព សណ្តាប់ធ្នាប់ សោភ័ណភាពទីក្រុងសៀមរាបឡើងវិញ ដែលកន្លងត្រូវបានគេមើលឃើញថា ខ្សែកាបទាំងនោះមានទាញទម្លាក់សម្រស់របស់ក្រុងសៀមរាបមួយផ្នែកធំ ដែលជាក្រុងទេសចរណ៍លេខមួយក្នុងប្រទេសកម្ពុជា។
អភិបាលរងខេត្តសៀមរាប លោក គឹម ឆៃហៀង បានប្រាប់ឲ្យដឹងថា អាជ្ញាធរខេត្តបានចុះកាត់ខ្សែកាបឆ្លងផ្លូវចំនួន៤ផ្លូវ រួមមានផ្លូវជាតិលេខ៦ ផ្លូវស៊ីវុត្ថា ផ្លូវ៧មករា និងផ្លូវ២ធ្នូ។ តាមការបញ្ជាក់របស់លោកអភិបាលរងខេត្ត នេះគ្រាន់តែជាដំណាក់កាលដំបូងតែប៉ុណ្ណោះ ហើយទៅថ្ងៃខាងមុខ ការរៀបចំនេះនឹងបន្តដល់គ្រប់ផ្លូវទាំងអស់ក្នុងខេត្តសៀមរាប។
លោក គឹម ឆៃហៀង បានពន្យល់ថា ការរៀបចំបង្គោលខ្សែកាបនេះ គឺដើម្បីរៀបចំក្រុងសៀមរាបឲ្យមានសណ្តាប់ធ្នាប់ សោភ័ណភាព និងមានរបៀបរៀបរយ ជាពិសេសដើម្បីការពារសុវត្ថិភាពដល់ប្រជាពលរដ្ឋនៅជិតនោះ។ លោកបញ្ជាក់ថា៖« ដើម្បីឲ្យក្រុងសៀមរាបមានសោភ័ណស្អាត យើងសម្រេចឲ្យក្រុមហ៊ុនខ្សែកាបនានាយកខ្សែចូលក្នុងលូ ឫបង្គប់ខ្សែក្រោមដី យើងធ្វើយ៉ាងណាឲ្យក្រុងសៀមរាបស័ក្តសមជាទីក្រុងស្អាតដែលទទួលចំណាត់ថ្នាក់រំដួល៣ទងពីរដ្ឋាភិបាល ហើយយើងក៏គ្រោងដាក់ស្នើជាបេក្ខភាពទីក្រុងស្អាតនៅអាស៊ីអាគ្នេយ៍ផងដែរ»។
ទាក់ទងនឹងការសម្រេចកាត់ខ្សែកាប ដែលអូសឆ្លងកាត់ផ្លូវសំខាន់ៗកន្លងមកនេះ តាមការលើកឡើងរបស់លោក គឹម ឆៃហៀង មានក្រុមហ៊ុនមួយចំនួនតដោយខ្វះបច្ចេកទេស ខ្លះក៏មានបច្ចេកទេសត្រឹមត្រូវ។ ការណ៍នេះបានធ្វើឲ្យការដឹកជញ្ជូនតាមយានយន្តមួយចំនួន អាចប៉ះពាល់ឲ្យខ្សែភ្លើងដាច់ ហើយមានការបារម្ភពីសុវត្ថិភាពប្រជាពលរដ្ឋដែលរស់នៅជិតនោះ។ យ៉ាងណាក៏ដោយ អភិបាលរងខេត្តសៀមរាប បានសម្តែងអារម្មណ៍សប្បាយរីករាយ ដោយសារមានកិច្ចសហការល្អពីក្រុមហ៊ុនខ្សែកាប ដែលកំពុងប្រតិបត្តិការក្នុងខេត្តទាំងមូល។ គោលការណ៍ចុះកាត់ខ្សែនេះ គ្រោងនឹងបញ្ចប់នៅរសៀលថ្ងៃទី១១ វិច្ឆិកានេះ ដើម្បីឲ្យទាន់កម្មវិធីបុណ្យអុំទូក ដែលនឹងចូលមកដល់នៅថ្ងៃទី១៣ វិច្ឆិកាខាងមុខនេះ។
គួរបញ្ជាក់ថា ការចុះកាត់ខ្សែកាបដែលអនុវត្តន៍ដោយអាជ្ញាធរខេត្ត បានចាប់ផ្តើមកាលពីថ្ងៃទី៣១ តុលាកន្លងទៅ ក្រោយជូនដំណឹង និងដាក់ឳសានវាទនៅថ្ងៃទី៣០ តុលា។ ការចុះកាត់នេះ មានពីរ គឺទីមួយ ក្រុមហ៊ុនកាត់ដោយខ្លួនឯង និងទីពីរ អាជ្ញាធរខេត្តចុះកាត់ ប៉ុន្តែតម្រូវឲ្យក្រុមហ៊ុនដឹកជញ្ជូនខ្សែដោយខ្លួនឯង៕
© រក្សាសិទ្ធិដោយ thmeythmey.com