ជាតិ
សង្គមជាតិ
×![]()
ដោយ: ថ្មីៗ
ភ្នំពេញ៖ វិទ្យាស្ថានប៉ាស្ទ័រកម្ពុជា បានរកឃើញករណីពលរដ្ឋម្នាក់មានផ្ទុកជំងឺហ្ស៊ីកា ជាលើកដំបូង ក្នុងឆ្នាំ២០១៦។ នេះបើតាមសេចក្តីប្រកាសព័ត៌មានរួមគ្នារវាងក្រសួងសុខាភិបាល និងអង្គការសុខភាពពិភពលោក។
តាមសេចក្តីប្រកាសព័ត៌មានក្រសួងសុខាភិបាល ចុះថ្ងៃទី១៨ ខែវិច្ឆិកានេះ បុរសម្នាក់ដែលមានជំងឺ Zika មានវ័យ ៤៤ឆ្នាំ ជាពលរដ្ឋរស់នៅស្រុកកំពង់សៀម ខេត្តកំពង់ចាម។ យ៉ាងណា លោកបានជាសះស្បើយ ហើយលោកបានចេញពីមន្ទីរពេទ្យ នៅថ្ងៃនេះ បន្ទាប់ពីលោកបានចូលសម្រាកព្យាបាលនៅមន្ទីរពេទ្យខេត្តកំពង់ចាម តាំងពីថ្ងៃទី១៤ ខែតុលា ឆ្នាំ២០១៦មក។
តាមសេចក្តីប្រកាសដែលចេញក្រោយការរកឃើញរបស់វិទ្យាស្ថានប៉ាស្ទ័រកម្ពុជា រយៈពេល ៧ថ្ងៃ គិតចាប់តាំងពីឆ្នាំ២០០៧ មក កម្ពុជារកឃើញករណីជំងឺ Zika ចំនួន ៨ករណី។
តាមក្រសួងសុខាភិបាល វីរុសហ្សីកាឆ្លងមកមនុស្សតាមរយៈសត្វមូសខ្លាដែលមានផ្ទុកវីរុស ហ្ស៊ីកាខាំ ហើយវាបង្ហាញរោគសញ្ញាពី២ ទៅ៣ថ្ងៃ ក្រោយជំងឺត្រូវបានមូសខ្លាខាំ។ រោគសញ្ញាទាំងនោះ ដូចជា គ្រុនក្តៅ ឡើងកន្តួលក្រហមលើស្បែក ភ្នែកឡើងក្រហម ឈឺសាច់ដុំ ឈឺសន្លាក់ និងអស់កម្លាំង ជាដើម។ យ៉ាងណា រោគសញ្ញាទាំងនេះ អាចសះស្បើយរយៈពេលពី ២ ទៅ ៧ថ្ងៃ។
ករណីមានអ្នកមានជំងឺ Zikaនេះ ក្រសួងសុខាភិបាលណែនាំអ្នកជំងឺឲ្យពិសារទឹកឲ្យច្រើន និងព្យាបាលដោយប្រើថ្នាំបញ្ចុះកម្តៅ។ ប្រសិនរោគសញ្ញាធ្ងន់ធ្ងរ អ្នកជំងឺត្រូវពិគ្រោះជាមួយគ្រូពេទ្យ នៅតាមមន្ទីរព្យាបាល៕
Tag:
Zika
© រក្សាសិទ្ធិដោយ thmeythmey.com
