ជាតិ
ឯកឧត្តម សម រង្ស៊ី អស់សំណើចនឹងតុលាការ ដែលយកភស្តុតាងពីហ្វេសប៊ុក ដើម្បីកាត់ទោសលោក
× ភ្នំពេញ៖ សាលាដំបូងរាជធានីភ្នំពេញ នឹងបើកសវនាការ កាត់ទោសឯកឧត្តម សម រង្ស៊ី ពាក់ព័ន្ធនឹងការបង្ហោះឯកសារពីបញ្ហាព្រំដែនកម្ពុជា-វៀតណាម លើបណ្តាញសង្គមហ្វេសប៊ុក។ ឯកឧត្តម សម រង្ស៊ី មិនភ័យព្រួយបន្តិចឡើយចំពោះការកាត់ទោសនេះ ហើយថែមទាំង ចំអកឲ្យតុលាការនៅកម្ពុជា ថាយកភស្តុតាងពីបណ្តាញសង្គមហ្វេសប៊ុក ធ្វើជាមូលដ្ឋានក្នុងការចោទប្រកាន់ទៅវិញ។
ឯកឧត្តម សម រង្ស៊ី ប្រធានគណបក្សសង្គ្រោះជាតិ បានបង្ហោះសារលើទំព័រហ្វេសប៊ុក រិះគន់ខ្លាំងៗ ទៅលើតុលាការ ដែលត្រៀមនឹងកាត់ទោសខ្លួន រួមទាំងជំនួសការចំនួន២នាក់ផ្សេងទៀត នៅថ្ងៃស្អែកនេះ។ ឯកឧត្តម សម រង្ស៊ី ដែលរំព័ទ្ធដោយរឿងក្តីនោះ បានចោទតុលាការក្នុងប្រទេសកម្ពុជា ថាស្ថិតនៅក្រោមការបង្គាប់របស់អ្នកនយោបាយ។
ឯកឧត្តម សម រង្ស៊ី នៅតែអះអាងដដែលថា សំណុំរឿងខាងលើ គឺជាបញ្ហានយោបាយ មិនមែនពាក់ព័ន្ធនឹងផ្លូវច្បាប់នោះទេ។ មេបក្សប្រឆាំង ដែលកំពុងតែរស់នៅឯបរទេសរូបនេះ បានសរសេរលើទំព័រហ្វេសប៊ុកដូច្នេះថា៖«រឿងនេះ ជារឿងនយោបាយសុទ្ធសាធ។ តុលាការអាយ៉ងនេះ ចាំតែធ្វើការចោទប្រកាន់តាមបញ្ជាអ្នកដឹកនាំនយោបាយ ដែលចង់កម្ចាត់គូប្រកួត។ […] គួរឲ្យអស់សំណើច ដែលតុលាការ ចោទប្រកាន់មកលើពួកយើងទាំង ៣ នាក់ (ឯកឧត្តមសម រង្ស៊ី និងជំនួយការទាំង២នាក់) ពីបទសមគំនិត»។
លោក សុខ ឥសាន អ្នកនាំពាក្យរបស់គណបក្សប្រជាជនកម្ពុជា នៅតែឆ្លើយតបក្នុងន័យដូចមុនថា ឯកឧត្តម សម រង្ស៊ី ព្យាយាមគេចវេសពីទោសកំហុស និងមិនព្រមទទួលយកការពិត ចំពោះអ្វីដែលខ្លួបានប្រព្រឹត្ត។ លោក សុខ ឥសាន បន្តទៀតថា តុលាការ នឹងមិនចាត់វិធានការនោះទេ ប្រសិនបើឯកឧត្តម សម រង្ស៊ី មិនបានប្រព្រឹត្តទោសកំហុស។
លោក និយាយត្រឡប់មកវិញថា ការចាត់វិធានការ ពីសំណាក់តុលាការបែបនេះ គឺដោយសារតែឯកឧត្តម សម រង្ស៊ី មានកំហុសពីបទសមគំនិតពិតមែន។ មន្ត្រីបក្សកាន់អំណាចខាងលើ បកស្រាយត្រង់ចំណុចនេះថា បើឯកឧត្តម សម រង្ស៊ី មិនអនុញ្ញាតឲ្យលោក ហុង សុខហួរ សមាជិកព្រឹទ្ធសភា បង្ហោះឯកសារពាក់ព័ន្ធនឹងបញ្ហាព្រំដែនកម្ពុជា-វៀតណាម លើទំព័រហ្វេសប៊ុករបស់ខ្លួប ក៏តុលាការ មិនចោទឯកឧត្តម សម រង្ស៊ី ពីបទសមគំនិត ដែរ។
លោក សុខ ឥសាន បញ្ជាក់ម្តងទៀតថា បក្សកាន់អំណាច មិនបានលូកដៃចូលទៅក្នុងប្រព័ន្ធតុលាការនោះទេ។ អ្នកនាំពាក្យបក្សកាន់អំណាចរូបនេះ សង្ក់តធ្ងន់ៗថា៖«បើគាត់ (ឯកឧត្តម សម រង្ស៊ី) គ្មានទោសអ្វីសោះ ហើយតុលាការ ទៅចាត់វិធានការ ទើបយើងអាចនិយាយថា បក្សប្រឆាំង រងការយាយីពីតុលាការ។ តែនេះគាត់ ធ្វើខុសមែន អ៊ីចឹងគាត់ត្រូវតែទទួលទោសដោយខ្លួនឯងហើយ គ្មាននរណាទទួលជំនួសទេ»។
សូមបញ្ជាក់ថា លោក ហុង សុខហួរ ដែលជាសមាជិកព្រឹទ្ធសភា បានយកឯកសារដែលពាក់ព័ន្ធនឹងបញ្ហាព្រំដែនកម្ពុជា-វៀតណាម ទៅបង្ហោះលើទំព័រហ្វេសប៊ុករបស់ឯកឧត្តម សម រង្ស៊ី កាលពីឆ្នាំ២០១៥។ ដោសារតែការបង្ហោះឯកសារនោះឯង តុលាការ ក៏បានកាត់ទោសលោក ហុង សុខហួរ ឲ្យជាប់ពន្ធនាគាររយៈពេល៧ឆ្នាំ ពីបទ «ក្លែងឯកសារសាធារណៈ ប្រើប្រាស់ឯកសារសាធារណៈក្លែងក្លាយ និងញុះញង់ឲ្យប្រព្រឹត្តបទឧក្រិដ្ឋ»។ ទាក់ទងនឹងការបង្ហោះឯកសារនេះដែរ តុលាការ បានចោទ ឯកឧត្តម សម រង្ស៊ី ពីបទ «សមគំនិតក្នុងអំពើ ក្លែងបន្លំឯកសាធារណៈ ប្រើប្រាស់ឯកសារសាធារណៈ និងញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម»៕
Tag:
សម រង្ស៊ី
តុលាការ
កាត់ទោស
© រក្សាសិទ្ធិដោយ thmeythmey.com