ជាតិ
សង្គមជាតិ
លោក ប៉ា សុជាតិវង្ស ដាស់តឿនស៊ីនទ្រីថានឹងពិចារណាកិច្ចសន្យា បើការប្រមូលសំរាមនៅតែមានបញ្ហា
× លោក ប៉ា សុជាតិវង្ស បានដាស់តឿនក្រុមហ៊ុនស៊ីនថា អាជ្ញាធរត្រូវពិចារណាលើការបន្ត ឬបញ្ចប់កិច្ចសន្យា បើការប្រមូលសំរាម នៅតែពុំមានលក្ខណៈល្អប្រសើរ។ ជាការឆ្លើយតប ប្រធានក្រុមហ៊ុនស៊ីនទ្រី អះអាងថាបានត្រៀមខ្លួនរួចជាស្រេចទាំងកម្លាំងមនុស្ស និងគ្រឿងចក្រ ដើម្បីឱ្យការប្រមូលសំរាមនៅភ្នំពេញប្រសើរ ខណៈឆ្លៀតត្អូញត្អែរថាការពង្រីកវិសាលភាពប្រមូលសំរាមនេះមានការលំបាក និងស្មុគស្មាញ។
លោក ប៉ា សុជាតិវង្ស អភិបាលក្រុងភ្នំពេញ បានក្រើនរំលឹកទៅដល់ក្រុមហ៊ុនស៊ីនទ្រី ថាអាជ្ញាធរត្រូវពិចារណាឡើងវិញថាតើ ត្រូវបន្តកិច្ចសហការជាមួយក្រុមហ៊ុនស៊ិនទ្រីតទៅទៀត ឬត្រូវលុបកិច្ចសន្យានេះចោល ប្រសិនការប្រមូលសំរាមនៅតែពុំមានលក្ខណៈល្អប្រសើរ ឬសកម្មភាពនៅដដែល។ នេះបើតាមទីភ្នាក់ងារសារព័ត៌មានកម្ពុជា(AKP) ដែលបានប្រសាសន៍របស់អភិក្រុងរូបនេះ នៅក្នុងពិធីចុះហត្ថលេខាលើកិច្ចព្រមព្រៀង ស្តីពីកម្មវិធីសម្អាត ប្រមូល និងដឹកជញ្ជូនសំរាម រវាងក្រុមហ៊ុនស៊ិនទ្រី និងខណ្ឌជាយក្រុងចំនួន៤ គឺខណ្ឌដង្កោ ជ្រោយចង្វារ ច្បារអំពៅ និងខណ្ឌព្រែកព្នៅ កាលពីរសៀលថ្ងៃទី៧ ខែធ្នូ។
បើតាម AKP លោក ប៉ា សុជាតិវង្ស បានបញ្ជាក់បន្តទៀតថា ចាប់ពីពេលនេះតទៅ ក្រុមហ៊ុនស៊ិនទ្រីមិនត្រូវយកលេស ឬធ្វើឱ្យតែរួចពីដៃ ធ្វើឱ្យមានគំនរសំរាមនៅរាយប៉ាយដោយកន្លែងនៅទូទាំងរាជធានីភ្នំពេញបន្ដទៀតឡើយ ដោយសារតែក្រុមហ៊ុនបានចុះកិច្ចព្រមព្រៀងធ្វើប្រតិបត្តិការប្រមូល និងដឹកជញ្ជូនសំរាម គ្រប់ខណ្ឌទាំង១២រួចរាល់អស់ហើយ។
ឆ្លើយតបនឹងការដាស់តឿននេះ លោក សេង សាវី ប្រធានក្រុមហ៊ុនស៊ិនទ្រី បានលើកឡើងថា ក្រុមហ៊ុនបានត្រៀមខ្លួនរួចជាស្រេចហើយ ទាំងកម្លាំងមនុស្ស និងគ្រឿងចក្រ ដើម្បីឱ្យប្រតិបត្តិការប្រមូលសំរាមនៅទូទាំងរាជធានីភ្នំពេញ កាន់តែមានការវិវឌ្ឍល្អប្រសើរ ខណៈឆ្លៀតត្អូញត្អែរថាការពង្រីកវិសាល ភាពប្រមូលសំរាមនេះមានការលំបាក និងស្មុគស្មាញ។ នេះបើតាម AKP ដដែល។
សាលារាជធានីភ្នំពេញ បានទម្លាក់ភារកិច្ចគ្រប់គ្រងសំរាមទៅឲ្យថ្នាក់ខណ្ឌគ្រប់គ្រងវិញ ប្រមាណ ១ ឆ្នាំមកហើយ ពោលគឺផ្ទេរពីការបង់ថ្លៃសេវាប្រមូលសំរាមនៅអគ្គិសនីកម្ពជា មកបង់នៅតាមខណ្ឌវិញដែរ ដើម្បីបង្កើនការទទួលខុសត្រូវរឿងសំរាមឲ្យបានកាន់តែល្អ។ ការទម្លាក់ភារកិច្ចឲ្យខណ្ឌជាអ្នកទទួលខុសត្រូវវិញនេះ ដោយសារតែខណ្ឌនៅកៀកនឹងប្រជាពលរដ្ឋ ដឹងពីស្ថានភាពទុកដាក់សំរាម និងងាយស្រួលក្នុងការដោះស្រាយបញ្ហា។
បើយោងតាមការស្រាវជ្រាវរបស់អង្គការចៃកា(JICA) ភ្នំពេញមានសំរាមជិត២ពាន់តោន ក្នុងមួយថ្ងៃៗ និងត្រូវដឹកទៅចាក់ក្នុងទីលានសំរាមខណ្ឌដង្កោ។ តាមគម្រោង រណ្តៅសំរាមនៅបឹងជើងឯង ខណ្ឌដង្កោ ត្រូវគេរំពឹងថា អាចដាក់សំរាមពេញនាឆ្នាំ២០៣៣ ប៉ុន្តែ JICA រកឃើញថា សំរាមនឹងពេញរណ្ដៅនៅឆ្នាំ២០២០ ពោលគឺសំរាមបានកើនឡើងលឿនលើសការរំពឹងទុក១៣ឆ្នាំ៕
Tag:
ប៉ា សុជាតិវង្ស
ស៊ីនទ្រី
សំរាម
© រក្សាសិទ្ធិដោយ thmeythmey.com