ជាតិ
សង្គមជាតិ
រាជរដ្ឋាភិបាលបង្កើតគណៈកម្មការទប់ស្កាត់ និងបង្ក្រាបបទល្មើសធនធានធម្មជាតិ
× រាជរដ្ឋាភិបាលកម្ពុជា បានសម្រេចបង្កើតគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ។ យោងតាមសេចក្តីសម្រេចចុះថ្ងៃទី៧ ធ្នូ ឆ្នាំ២០១៦ សមាសភាពគ្រប់គ្រងស្ថាប័ននេះមានចម្រុះមកពីកងរាជអាវុធហត្ថ ក្រសួងបរិស្ថាន និងក្រសួងកសិកម្ម រុក្ខាប្រមាញ់ និងនេសាទ។
សេចក្តីសម្រេចរបស់រាជរដ្ឋាភិបាល លោក សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស គឺជាប្រធាននៃគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ។ អនុប្រធាន គឺលោក ហ៊ូ សាគុណ អគ្គស្នងការរងនគរបាលជាតិ និងជាប្រធាននាយកដ្ឋានកណ្តាលនគរបាលព្រំដែន ចំណែកលោក ផៃ ប៊ុនឈឿន រដ្ឋលេខាធិការក្រសួងបរិស្ថាន និងលោក ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ជាសមាជិក។ ក្នុងនោះ អភិបាលនៃគណៈអភិបាលរាជធានី ខេត្តទាំង២៥ ក៏ជាសមាជិកក្នុងគណៈកម្មការដែលទើបនឹងបង្កើតថ្មីនេះផងដែរ។
ក្នុងប្រការនៃសេចក្តីសម្រេចខាងដើម គណៈកម្មការដែលទើបនឹងបង្កើតថ្មីនេះ មានតួនាទី និងភារកិច្ចមួយចំនួនដូចតទៅ។ គឺត្រូវចុះទប់ស្កាត់ និងបង្ក្រាបបទល្មើសធនធានធម្មជាតិ ដូចជាការកាប់ព្រៃឈើ ការដឹកឈើ និងការនាំចេញឈើខុសច្បាប់ ការចាប់សត្វព្រៃ និងការនាំចេញសត្វព្រៃខុសច្បាប់ ការកាប់ទន្ទ្រានយកដីរដ្ឋ ព្រមទាំងការរុករករ៉ែខុសច្បាប់នៅទូទាំងប្រទេស។ អង្កេត និងស្រាវជ្រាវរកអ្នកប្រព្រឹត្តិ និងអ្នកពាក់ព័ន្ធ និងសកម្មភាពនៃបទល្មើសធនធានធម្មជាតិ។ ចាប់ជនល្មើស និងវត្ថុតាង នៃបទល្មើស ហើយរៀបចំសំណុំរឿងបញ្ជូនទៅតុលាការ។ សហការជាមួយភាគី វៀតណាម ថៃ និងឡាវ ដើម្បីបង្ការទប់ស្កាត់ និងបង្ក្រាបបទល្មើសធនធានធម្មជាតិឲ្យមានប្រសិទ្ធិភាពក្នុងករណីចាំបាច់។ ធ្វើរបាយការណ៍អំពីលទ្ធផលការងារជូនរាជរដ្ឋាភិបាល និងចុងក្រោយ ត្រូវបំពេញភារកិច្ចផ្សេងទៀត ដែលរាជរដ្ឋាភិបាលប្រគល់ជូន។
ក្នុងសេចក្តីសម្រេចរបស់រាជរដ្ឋាភិបាលដដែលបានបញ្ជាក់ថា គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ មានសិទ្ធិបង្កើតក្រុមការងារប្រតិបត្តិការ ដែលមានសមាសភាពមកពីក្រសួង ស្ថាប័នពាក់ព័ន្ធ តាមការចាំបាច់ និងស្នើសុំកម្លាំងប្រដាប់អាវុធគ្រប់ប្រភេទចូលរួមប្រតិបត្តិការ។ គណៈកម្មការនេះក៏មានសិទ្ធិប្រើប្រាស់ត្រារបស់ទីបញ្ជាការកងរាជអាវុធហត្ថលើផ្ទៃប្រទេស អាចទទួលថវិកាសមស្របពីកញ្ចប់ថវិការពិសេសរបស់រាជរដ្ឋាភិបាល និងមានសិទ្ធិប្រើប្រាស់ឧទ្ធម្ភាគចក្ររបស់កងទ័ពអាកាសនៃកងយោធពលខេមរភូមិន្ទ ដើម្បីបំពេញបេសកកម្មការងារតាមការចាំបាច់ផងដែរ៕
Tag:
សៅ សុខា
ព្រៃឈើ
ធនធានធម្មជាតិ
© រក្សាសិទ្ធិដោយ thmeythmey.com