ចិនរៀបចំឆ្នេរសមុទ្រសាន់យ៉ាទាក់ភ្នែកទេសចរសម្រាកលម្ហែ

សង្គមអន្តរជាតិ

អន្តរជាតិ

ចិនរៀបចំឆ្នេរសមុទ្រសាន់យ៉ាទាក់ភ្នែកទេសចរសម្រាកលម្ហែ

11, Dec 2016 , 8:00 pm

រូបភាព

ដោយ: ថ្មីៗ

ហៃណាន៖ ចិនបានរៀបចំឆ្នេរសមុទ្រទីក្រុងសាន់យ៉ា (Sanya) មានទំហំផ្ទៃដីជាង ១ម៉ឺនគីឡូម៉ែត្រ គួរឲ្យគយកន់។ ទីក្រុងដែលស្ថិតនៅចុងខាងត្បូង នៃខេត្តដែលមានទំហំផ្ទៃដីជាង ៣០ម៉ឺនគីឡូម៉ែត្រក្រឡានេះ មានហេដ្ឋារចនាសម្ព័ន្ធ អមដោយសួនច្បារខ្វាត់ខ្វែង ស្របតាមមាត់សមុទ្រចិនខាងត្បូង។

លោក A Hai មគ្គទេសក៍ទេសចរប្រចាំកោះហៃណាន បានឲ្យដឹងថា ទីក្រុងសានយ៉ា មានការអភិវឌ្ឍខ្លាំងចាប់តាំងពីទសវត្សរ៍ទី ៨០ ដោយសាររដ្ឋាភិបាលចិនបានកំណត់ទីក្រុងនេះ ជាគោលដៅទេសចរណ៍គ្មានផ្សែងជាប់មាត់សមុទ្រចិន។

សាន់យ៉ា មានហេដ្ឋារចនាសម្ព័ន្ធមិនខុសពីទីរួមខេត្តហៃណានដែលមានចម្ងាយជាង ២០០គីឡូម៉ែត្រឡើយ។ ចិនបានរៀបចំវិថីក្នុងទីក្រុងដែលមានអាកាសតំបន់ត្រូពិចនេះ ធំទូលាយចន្លោះពី ១០ម៉ែត្រ ទៅ ៦០ម៉ែត្រ អមដោយសម្រស់សួនរុក្ខាជាតិត្រឈឹងត្រឈៃ។

លើសពីនេះទៀត ចិនបានរៀបចំវិថីសម្រាប់យានយន្ត ជិះកង់ និងថ្មើរជើង រួមទាំង កន្លែង ហាត់ប្រាណតាមឆ្នេរខ្សាច់ក្នុងតំបន់ទីក្រុងនេះយ៉ាងរៀបរយគួរឲ្យលម្ហែអារម្មណ៍។ លើសពីនេះ ចិនបានបំពាក់ម៉ាស៊ីនថតសុវត្ថិភាពចរាចរតាមស្តុបចរាចរ និងតំបន់លម្ហែកាយតាមមាត់សមុទ្រផងដែរ ដើម្បីការពារសន្តិសុខសាធារណៈ។

តាមលោក A Hai ទេសចរចិនភាគខាងជើង តែងហោះមកលម្ហែកាយក្នុងតំបន់ដែលមានសេវាកម្មបដិសណ្ឋារកិច្ច ម្ហូបអាហារ និងកន្លែងស្នាក់នៅស្តង់ដារអន្តរជាតិជូនទេសចរ នារដូវត្រជាក់។

ទីក្រុងដែលធ្លាប់ទទួលធ្វើជាម្ចាស់ផ្ទះកីឡាអូឡាំពិក មានអគារខ្ពស់ៗ សឹ្កមស្កៃដូចភ្នំភាគច្រើន រីកដុះដាលតាមមាត់សមុទ្រ និងជើងភ្នំដែលរដ្ឋាភិបាល ចិនរៀបចំកំណត់ឲ្យវិស័យសាធារណៈ និងឯកជនអភិវឌ្ឍក្នុងរយៈកាលកំណត់ជាក់លាក់។

តាមមគ្គទេសក៍ទេសចរណ៍ដែលមានបទពិសោធន៍ជាង ៨ឆ្នាំរូបនេះ ជីវភាពពលរដ្ឋដែលភាគច្រើនជាកសិករ បានទទួលចំណូលពីវិស័យទេសចរណ៍គ្មានផ្សែង តាមរយៈការលក់សេវាកម្មទេសចរណ៍ជូនភ្ញៀវនៅហៃណាន ក្រោយពីរដ្ឋាភិបាលបានកំណត់ផែនការមេសម្រាប់ការអភិវឌ្ឍ កន្លងមក។

សូមទស្សនារូបភាពទីក្រុងសាន់យ៉ា៖