អន្តរជាតិ
ឆ្លៀតពេលទ័ពស៊ីរីវាយ Aleppo ក្រុមរដ្ឋឥស្លាមដណ្ដើមក្រុង Palmyra មកវិញ ទីក្រុងបុរាណ Palmyra ដែលត្រូវបំផ្លាញដោយក្រុមរដ្ឋឥស្លាម (រូបភាព Xinhua)
× ទីក្រុងបុរាណ Palmyra របស់ស៊ីរី បានធ្លាក់ក្រោមការគ្រប់គ្រងរបស់ក្រុមជ្រុលនិយមរដ្ឋឥស្លាមជាលើកទីពីរ ក្រោយសកម្មជនក្រុមនេះវាយសម្រុកដណ្ដើមគ្រប់គ្រងអស់ពេលជាច្រើនថ្ងៃមក។ កងទ័ពស៊ីរី បានដកថយទៅកាន់ភាគខាងត្បូងក្រុង Palmyra ដើម្បីប្រមូលកម្លាំងត្រៀមវាយបកវិញ។
ឆ្លៀតពេលដែលកងទ័ពស៊ីរីកំពុងញាប់ដៃសម្រុកវាយក្រុង Aleppo សកម្មជនក្រុមរដ្ឋឥស្លាមជាច្រើនពាន់នាក់ បានវាយដណ្ដើមទីក្រុងបុរាណ Palmyra ម្ដងទៀត បន្ទាប់ពីបាត់បង់ទីក្រុងនេះក្នុងខែមីនាកន្លងទៅ។ នៅមុននេះ ទ័ពអាកាសរុស្សី ក៏វាយប្រហារលើប្រតិបត្តិការរបស់រដ្ឋឥស្លាម ដោយបានសម្លាប់សកម្មជនក្រុមនេះអស់ជាច្រើននាក់។ តែចុងក្រោយ ក្រុមជ្រុលនិយមនេះ នៅតែអាចដណ្ដើមទីក្រុង Palmyra បានដដែលនៅថ្ងៃទី១១ ខែធ្នូ។
សារព័ត៌មាន Al Jazeera ផ្សាយថា ក្រុមរដ្ឋឥស្លាម បានដកយកកម្លាំងប្រយុទ្ធជាច្រើនពីមូលដ្ឋានរឹងមាំនៅ Raqqa និង Deir Az-zor ដើម្បីប្រយុទ្ធនៅ Palmyra ។ សកម្មជនរដ្ខឥស្លាមច្រើនជាងបួនពាន់នាក់ បានប្រតិបត្តិការជាច្រើនមុខព្រួញ ក្នុងការវាយដណ្ដើមនេះ ដោយមានការគាំទ្រពីកម្លាំងរថក្រោះផងដែរ។ ក្រុមរដ្ឋឥស្លាម ធ្លាប់គ្រប់គ្រងទីក្រុងនេះលើកទីមួយកាលពីខែឧសភា ឆ្នាំ២០១៥ មកទល់ខែមីនា ឆ្នាំនេះ។
អភិបាលខេត្ត Homs លោក Talal Barazi បានបញ្ជាក់ពីជ័យជម្នះរបស់ក្រុមរដ្ឋឥស្លាម ហើយកងទ័ពរដ្ឋាភិបាល ក៏បានដកទ័ពចេញពីក្រុងនេះដែរ។ ប៉ុន្តែអភិបាលខេត្តរូបនេះក៏អះអាងដែរថា កងទ័ពស៊ីរី នឹងប្រើប្រាស់គ្រប់មធ្យោបាយទាំងអស់ដើម្បីដណ្ដើមទីក្រុងនេះមកវិញ។ ជាមួយគ្នានេះ រដ្ឋាភិបាលស៊ីរី ក៏បានបញ្ជូនទ័ពជំនួយមកកាន់ទីក្រុងនេះដែរ ដោយបានដកទ័ពខ្លះពីសមរភូមិ Aleppo ។
ក្រោមការគ្រប់គ្រងដំបូងរបស់ក្រុមរដ្ឋឥស្លាម ទីក្រុងបុរាណ Palmyra ត្រូវបានបំផ្លិចបំផ្លាញយ៉ាងខ្លាំងរួមទាំងសម្បត្តិបេតិកភណ្ឌ UNESCO ។ សំណង់បុរាណមួយចំនួននៅទីនោះ ត្រូវបានកម្ទេច ដែលសកម្មភាពនោះត្រូវបាន UNESCO ចាត់ទុកជាឧក្រិដ្ឋកម្មសង្គ្រាម។ លើសពីនោះ Palmyra ក៏ក្លាយជាវាលពិឃាតសម្រាប់ក្រុមរដ្ឋឥស្លាមសម្លាប់មនុស្សជាសាធារណៈផងដែរ។
ទីក្រុងបុរាណនេះ ក៏ជាទីតាំងយុទ្ធសាស្ត្រសំខាន់មួយដែរ ព្រោះមានទីតាំងក្បែរតំបន់អណ្ដូងប្រេង។ ក្រុមរដ្ឋឥស្លាម អាចបូមយកប្រេងទាំងនោះ ដើម្បីបំពេញប្រភពហិរញ្ញវត្ថុដែលត្រូវការខ្លាំង។ ម្យ៉ាងទៀត ក្រុមជ្រុលនិយមនេះ ទំនងជាលួចលក់យកវត្ថុបុរាណក្នុងទីក្រុង Palmyra ដើម្បីផ្គត់ផ្គង់ហោប៉ៅរបស់ខ្លួនទៀតផង ខណៈដែលទីតាំងដែលធ្លាប់គ្រប់គ្រងជាច្រើន ត្រូវបាត់បង់ជាបន្តបន្ទាប់នោះ៕
Tag:
ស៊ីរី
Aleppo
Palmyra
ក្រុមរដ្ឋឥស្លាម
© រក្សាសិទ្ធិដោយ thmeythmey.com