ដូណាល់ ត្រាំ អួតខ្លួនឯងថា «ខ្ញុំជាមនុស្សឆ្លាត»

អន្តរជាតិ

ដូណាល់ ត្រាំ អួតខ្លួនឯងថា «ខ្ញុំជាមនុស្សឆ្លាត»

12, Dec 2016 , 3:52 pm

រូបភាព

ដោយ: តន ចាន់រិទ្ធារ៉ា

ការអង្គុយស្ដាប់ការសង្ខេបព័ត៌មានចារកម្មប្រចាំថ្ងៃ ជាកាត្វកិច្ចរបស់ប្រធានាធិបតីអាមេរិកគ្រប់រូប។ ប៉ុន្តែសម្រាប់ប្រធានាធិបតីជាប់ឆ្នោត ដូណាល់ ត្រាំ វិញ វាមិនមែនជារឿងដែលលោកចូលចិត្តឡើយ។ លោក ចាត់ទុកព័ត៌មានទាំងនោះជារឿងដដែលៗ ហើយលោកក៏មិនចង់ស្ដាប់រាល់ថ្ងៃដែរ ព្រោះលោកជាមនុស្សឆ្លាត ប៉ុន្តែលោកនឹងអង្គុយស្ដាប់ការសង្ខេបព័ត៌មាន ប្រសិនបើស្ថានការណ៍ប្រែប្រួល។

លោក ដូណាល់ ត្រាំ នឹងស្បថចូលកាន់តំណែងប្រធានាធិបតីអាមេរិកនៅថ្ងៃទី២០ ខែមករាខាងមុខ។ មានការងារជាច្រើនដែលកំពុងរង់ចាំប្រធានាធិបតីជាប់ឆ្នោតរូបនេះដោយរួមទាំងការស្ដាប់របាយការណ៍ចារកម្មប្រចាំថ្ងៃផងដែរ។ យ៉ាងណាក្ដី លោក ដូណាល់ ត្រាំ បានបង្ហាញជំហរផ្លាស់ប្ដូរទម្លាប់នេះ ដ្បិតលោកមិនចង់ស្ដាប់ព័ត៌មានដដែលរៀងរាល់ថ្ងៃនោះឡើយ។

ប្រធានាធិបតីជាប់ឆ្នោតរូបនេះបានប្រាប់សារព័ត៌មាន Fox News ក្នុងបទសម្ភាសន៍មួយនៅថ្ងៃទី១១ ខែធ្នូ ថា លោក មិនត្រូវការការសង្ខេបព័តមានចារកម្មឡើយ ហើយលោកនឹងស្ដាប់ព័ត៌មានសំខាន់នៅពេលដែលសភាពការណ៍ផ្លាស់ប្ដូរប៉ុណ្ណោះ។ លោកបញ្ជាក់ថា៖ «ក្នុងករណីប្រែប្រួលខុសប្លែកពីធម្មតា ទូរសព្ទមកខ្ញុំភ្លាម។ ខ្ញុំមានពេលមួយនាទីដើម្បីស្ដាប់។»

មិនតែប៉ុណ្ណោះ ប្រធានាធិបតីដែលចេញមកពីអ្នកជំនួញរូបនេះ ថែមទាំងអួតសរសើរខ្លួនឯងទៀតផង។ លោកនិយាយថា លោក ដូចជាមនុស្សឆ្លាតម្នាក់ ដូច្នេះលោកមិនចាំបាច់អង្គុយស្ដាប់ការរាយការណ៍ព័ត៌មានដដែលរៀងរាល់ថ្ងៃក្នុងពេល៨ឆ្នាំបន្ទាប់ឡើយ។ មកទល់ពេលនេះ លោកទទួលការសង្ខេបព័ត៌មានចារកម្មដែលទាក់ទងសន្តិសុខជាតិទាំងមូលតែម្ដងប៉ុណ្ណោះក្នុងមួយសប្ដាហ៍៕