អន្តរជាតិ
អារ៉ាប៊ី សាអូឌីត បិទវែបសាយអាសអាភាសជាង៦សែនក្នុងរយៈពេល២ឆ្នាំ
× អាជ្ញាធរអារ៉ាប៊ី សាអូឌីត បានបិទវែបសាយអាសអាភាសជាង៦សែន នារយៈពេល២ឆ្នាំចុងក្រោយនេះ។ នេះបើតាមការផ្សាយរបស់សារព័ត៌មាន Arab News។
លោក Faiyz Al-Otaibi អ្នកនាំពាក្យគណៈកម្មាធិការទំនាក់ទំនង និងបច្ចេកវិទ្យាព័ត៌មាន (CITC) របស់ប្រទេសអារ៉ាប៊ី សាអូឌីត បានបញ្ជាក់ថា វែបសាយអាសអាភាសជាង៦សែន ត្រូវបានអាជ្ញាធរបិទចោល នារយៈពេល២ឆ្នាំចុងក្រោយនេះ ហើយលោកបានព្រមានថា អ្នកប្រព្រឹត្តល្មើសទាំងនោះ ប្រឈមជាប់ពន្ធនាគារ៥ឆ្នាំ និងរងការពិន័យចំនួន៣លានរីយ៉ាល់ (ប្រមាណ៧៥០០០ដុល្លារអាមេរិក)។
អាជ្ញាធរអារ៉ាប៊ី សាអូឌីត បានគូសបញ្ជាក់ថា អ៊ីនធ័រណិត បានក្លាយជាផ្នែកមួយនៃសេវាកម្មដែលត្រូវមានទំនួលខុសត្រូវខ្ពស់ប្រចាំថ្ងៃ ជាពិសេសការគាំពារកុមារ និងយុវជនផ្សេងៗ។ អ្នកស្រី Nora bint Abdullah bin Idwan សមាជិកនៃសភាប្រឹក្សាយោបល់របស់អារ៉ាប៊ីសាអូឌីត បានបញ្ជាក់ថា យុវជនជាច្រើនបានក្លាយជាជនរងគ្រោះដោយសារវែបសាយអាសអាភាស។
អ្នកស្រីបានអះអាងថា៖ «តាមការសិក្សា ៨០ភាគរយនៃយុវជន ដែលបានមើលវែបសាយអាសអាភាសគឺមានអាយុចន្លោះពី១៥ ទៅ១៧ឆ្នាំ។ ៣៤ភាគរយ បានចូលទៅកាន់វែបសាយទាំងនេះ ដោយចៃដន្យ ។ យើងត្រូវតែមានវិធានការដើម្បីទប់ទល់នឹងបញ្ហាដែលប្រឈមចំពោះផ្នែកចិត្តសាស្ត្រ និងសង្គម»៕
© រក្សាសិទ្ធិដោយ thmeythmey.com