អន្តរជាតិ
ហេតុអ្វីនយោបាយការទូត «ឆ្កែ»របស់លោក អាបេ មិនអាចទាក់ចិត្តលោក ពូទីន?
× រុស្ស៊ីបដិសេធទទួលយកសត្វឆ្កែជាអំណោយរបស់ជប៉ុន ជាបរាជ័យនយោបាយការទូតរបស់រដ្ឋាភិបាលលោក ស៊ីនហ្សូ អាបេ ក្នុងការពង្រឹងចំណងការទូតជាមួយប្រទេសជិតខាងខ្លួននេះ។ លោក វ្ល៉ាឌីមៀ ពូទីន បដិសេធទទួលយកអំណោយនេះជាការរំលឹក រដ្ឋាភិបាលជប៉ុន ថាកុំរំពឹងខ្លាំងពេកចំពោះការដោះស្រាយជម្លោះដែនកោះ Kurils និងបង្កើតកិច្ចព្រមព្រៀងសន្តិភាពរួមគ្នានោះ។
សូមស្ដាប់ព័ត៌មានលម្អិត៖
នយោបាយការទូតសត្វឆ្កែ (Dog Diplomacy) របស់រដ្ឋាភិបាលក្រុងតូក្យូដែលបង្កើតឡើងដើម្បីចែរចូវប្រមុខរដ្ឋរុស្ស៊ីនោះមិនបានទទួលជោគជ័យនោះឡើយ ព្រោះលោក វ្ល៉ាឌីមៀ ពូទីន បដិសេធទទួលយកអំណោយការទូតនេះកាលពីចុងសប្តាហ៍នេះ។
ដើមឡើយ រដ្ឋាភិបាលលោក ស៊ីនហ្សូ អាបេ មានគម្រោង ជូនឆ្កែឈ្មោល Akita ជាកាដូសម្រាប់លោក ពូទីន មុនលោកមកបំពេញទស្សនកិច្ចចាប់ថ្ងៃ១៥ ដល់ថ្ងៃ ១៦ ធ្នូនេះ ។ ជប៉ុន ចង់ឲ្យឆ្កែ Akita ទៅមេដឹកនាំរុស្សី ដើម្បីធ្វើជាដៃគូជាមួយឆ្កែញី Yume ដែលជប៉ុនបានផ្តល់ជាកាដូឲ្យលោក ពូទីន កាលពីឆ្នាំ២០១២។ ប៉ុន្តែចុងក្រោយ រដ្ឋាភិបាលរុស្ស៊ីបានសម្រេចបដិសេធទទួលអំណោយនេះទៅវិញ ហើយគ្មានការអះអាងពីហេតុផលនៃការបដិសេធអំណោយការទូតនេះឡើយ។
តាមពិតទៅ ថ្វីបើលោក វ្ល៉ាឌីមៀ ពូទីន ជាអ្នកចូលចិត្តសត្វក៏ដោយ លោកមិនចង់ឲ្យជប៉ុនរំពឹងខ្ពស់ពេកចំពោះការស្តារនិងរឹតបន្តឹងចំណងការទូតទ្វេភាគី ក៏ដូចជាដោះស្រាយជម្លោះកោះរួមគ្នាក្នុងពេលលោកទៅបំពេញទស្សនកិច្ចនៅជប៉ុនដែរ។
ជាធម្មតា ការទទួលយកកាដូការទូតជាសត្វឆ្កែពីរដ្ឋាភិបាលជប៉ុនជានិមិត្តសញ្ញាសំខាន់មួយដែលបង្ហាញ ឲ្យឃើញពីភាពស្និទ្ធសា្នលរវាងប្រទេសទាំងពីរជាពិសេសទំនាក់ទំនងរវាងមេដឹកនាំជប៉ុននិងប្រមុខរដ្ឋរុស្ស៊ីលោក វ្ល៉ាឌីមៀ ពូទីន តែម្តង។ ហើយនិយាយឲ្យអស់ទៅ ភាគីដែលផ្តល់អំណោយការទូតបែបនេះច្បាស់ជា រំពឹងចង់បានអ្វីម្យ៉ាងពីភាគីម្ខាងទៀតដែរ។
ដូច្នេះហើយ ដើម្បីកុំឲ្យជប៉ុនមានសង្ឃឹមច្រើនចំពោះការឈានទៅធ្វើសម្បទានពីរុស្ស៊ីដើម្បី ដោះស្រាយបញ្ហាជម្លោះកោះ និងឈានទៅបង្កើតកិច្ចព្រមព្រៀងសន្តិភាពរួមគ្នានោះ លោក ពូទីន ចាំបាច់ត្រូវបដិសេធអំណោយនេះ។ ការធ្វើសម្បទានទៅជប៉ុនជុំវិញការដោះស្រាយបញ្ហាជម្លោះកោះជារឿងគួរឲ្យប្រុងប្រយ័ត្នបំផុតសម្រាប់រុស្ស៊ី ហើយវាក៏ជាអ្វីដែលលោក ពូទីន មិនចង់ធ្វើដែរ។
ទាក់ទងជម្លោះដែនកោះរវាងជប៉ុននិងរុស្ស៊ីនេះដែរ កាលពីចុងសប្តាហ៍នេះ ប្រមុខការទូតរុស្ស៊ីលោក Sergei Lavrov បានផ្ញើសារទៅរដ្ឋាភិបាលជប៉ុនថា ជប៉ុនមិនគួរមានក្តីសង្ឃឹមខ្លាំងចំពោះការវិវត្តនៃទំនាក់ទំនងការទូតនិងឈានទៅចុះ សន្ធិសញ្ញាសន្តិភាពរួមគ្នាព្រោះភាគីនៅមានចំនុចខុសគ្នាច្រើន។
សូមរម្លឹកបន្តិចដែរថា ជម្លោះកោះរវាងជប៉ុននិងរុស្ស៊ីជាជម្លោះកោះចំនួន៤ នៅភាគខាងត្បូងប្រជុំកោះ គូរីល (Kurils) ដែលវាកើតឡើងយូរអង្វែងមកហើយ។ នៅឆ្នាំ ១៩៤៩ រុស្ស៊ីបានដណ្តើមយកកោះដែលជប៉ុនកាន់កាប់ ដែលនេះជាសម្អាងមួយថាខ្លួនបានកាប់កាន់ជាក់ស្តែង។ តែ២ឆ្នាំក្រោយមក កិច្ចព្រមព្រៀងសន្តិភាព San Francisco ត្រូវបានគេបង្កើតឡើង ហើយវាត្រូវបានចុះហត្ថលេខាដោយមេដឹកនាំជប៉ុន និងបណ្តាប្រទេសសម្ព័ន្ធមិត្ត ដោយជប៉ុនសម្រេចបោះបង់សិទ្ធិទាមទារកាន់កាប់លើកោះ គូរីល ។ តែយ៉ាងណាសូវៀតមិនបានចូលរួមក្នុងការចុះហត្ថលេខាលើកិច្ចព្រមព្រៀងនេះឡើយ។ ដូច្នេះហើយទើបជប៉ុននៅរក្សាអះអាងថាកោះទាំងបួននៅតែស្ថិតក្នុងអធិបតេយ្យភាពរបស់ខ្លួនដដែល។
ក្រោយមកនៅក្នុងឆ្នាំ១៩៥៦ សូវៀត និងជប៉ុនបានចេញសេចក្តីថ្លែងការណ៍រួមមួយដើម្បីស្តារឡើងវិញទំនាក់ទំនងឡើងវិញ ដោយសូវៀតយល់ព្រមបោះបង់កោះពីរ គឺកោះ Shikotan និងកោះ Habomai ទៅអោយជប៉ុនបន្ទាប់ពីមានការចុះហត្ថលេខាលើសន្ធិសញ្ញាមួយជាផ្លូវការរួមគ្នា។ តែយ៉ាងណា ក្រោយរដ្ឋាភិបាលជប៉ុន នៅតែរក្សាសិទ្ធិទាមទារកោះទាំងបួន ហើយជាលទ្ធផលគ្មានសន្ធិសញ្ញាសន្តិភាពណាមួយត្រូវបានចុះដោយភាគីទាំងពីរឡើយចាប់តាំងពីពេលនោះមក។ មកទល់ពេលនេះ ជប៉ុនអះអាងថា បើយោងតាមច្បាប់អន្តរជាតិ កោះទាំងបួនដែលស្ថិតនៅភាគខាងត្បូងរបស់ប្រជុំកោះគូរីល គឺជាកោះដែលស្ថិតក្នុងដែនអធិបតេយ្យជប៉ុន។ ហើយដោយសារតែសម្បូរដោយធនធានធម្មជាតិមានប្រេង ឧស្ម័ន និងធនធានសមុទ្រផ្សេងទៀតផង ទើបបានជាគូភាគីបន្តទាមទារយករៀងៗខ្លួន។ ប៉ុន្តែរុស្ស៊ីចាប់ផ្តើមពង្រឹងទំនើបកម្មយោធានៅលើកោះដើម្បីពង្រឹងសិទ្ធិកាន់កាប់របស់ខ្លួនផងដែរក្នុងរយៈពេលប៉ុន្មានឆ្នាំចុងក្រោយ៕
© រក្សាសិទ្ធិដោយ thmeythmey.com