អន្តរជាតិ
អ្នករាំម្នាក់ដែលមានស្នាមដៅបដិសេធ Photoshop ព្រោះចង់រក្សាមុខធម្មជាតិ
×![]()
ដោយ: ធីតា
កាណាដា៖ Cassandra Naud ដែលមានកំណើតនៅក្រុង Alberta ប្រទេសកាណាដា មានស្នាមដៅក្រោមភ្នែកឆ្វេងតាំងពីកំណើត។ ថ្វីត្បិតកាលពីតូច ឪពុកម្តាយរបស់អ្នករាំអាជីពរូបនេះ ធ្លាប់បានចំណាយលុយដើម្បីធ្វើការវះកាត់ក៏ដោយ ប៉ុន្តែវាមិនមែនជាបំណងប្រាថ្នារបស់នាងនោះឡើយ។ ក្រៅពីបដិសេធការកែសម្ផស្ស Naud ក៏បានសំណូមពរមិនឲ្យមានការប្រើ Photoshop លើរូបរបស់ខ្លួនផងដែរ។
«ស្នាមដៅពីកំណើតនៅលើផ្ទៃមុខរបស់ខ្លួន គឺផ្នែកមួយដ៏សំខាន់នៃបុគ្គលិកលក្ខណៈរបស់ខ្ញុំ។ វាជាចំណុចដ៏សំខាន់ និងត្រូវចងចាំបំផុតសម្រាប់ខ្ញុំ»។ Cassanda Naud អាយុ២៣ឆ្នាំ បានពន្យល់យ៉ាងដូច្នេះក្នុងគេហទំព័រ Bored Panda។
កញ្ញា Naud បានបញ្ជាក់ថា នាងតែងតែទទួលបានការផ្តល់យោបល់ឲ្យមានការកែសម្ផស្ស ប៉ុន្តែនាងបដិសេធ ហើយឪពុកម្តាយសុខចិត្តធ្វើតាមការសម្រេចចិត្តរបស់នាង។ Naud បានអះអាងថា នាងមិនចង់ធ្វើអ្វីឲ្យខុសពីធម្មជាតិនោះឡើយ ដូចជាការកែសម្ឆស្ស រួមទាំងការប្រើកម្មវិធី Photoshop ទៅលើរូបនានារបស់នាង មុនពេលផ្សព្វផ្សាយ ឬបង្ហោះនៅលើអ៊ីនធ័រណែត។
នាងបានលើកឡើងថា៖ «ពេលវេលានឹងផ្លាស់ប្តូរ ដូច្នេះមិនគួរមានការព្រួយបារម្ភអ្វីនោះឡើយ។ កុំឲ្យស្លាកស្នាមបញ្ឈប់សកម្មភាពអ្នក តែអ្នកត្រូវតែមានមោទកភាពចំពោះអ្វីដែលយើងមាន»។
បើតាមការផ្សាយរបស់ Mail Online នាង Naud ក៏ទទួលបានស្នេហាដ៏កក់ក្តៅផងដែរ ដោយអ្នករាំអាជីពជនជាតិកាណាដារូបនេះ មានមិត្តប្រុសដ៏យល់ចិត្តឈ្មោះ Patrick Cook បន្ទាប់ពីពួកគេបានជួបគ្នាដំបូងនាពិធីមួយនៅក្នុងឡូសអែនជឺលែស សហរដ្ឋអាមេរិក៕
Tag:
ប្លែកៗ
សម្ផស្ស
© រក្សាសិទ្ធិដោយ thmeythmey.com
