អន្តរជាតិ
Netanyahu អួតថា យន្តហោះ F-35 អ៊ីស្រាអែលទើបទិញ នឹងជួយឲ្យទ័ពអ៊ីស្រាអែលកាន់តែខ្លាំង
× នាយករដ្ឋមន្ត្រីអ៊ីស្រាអែល Benjamin Netanyahu បានអួតអាងថា អ៊ីស្រាអែលកាន់តែមានកម្លាំងយោធាខ្លាំង និងមានសមត្ថភាពខ្ពស់អាចវាយប្រហារលើសត្រូវ។ លោកបានលើកឡើងដូច្នេះក្នុងពេលដែលលោកចូលរួមក្នុងពិធីទទួលយន្តហោះ F-35 ក្រុមដំបូងដែលទើបបញ្ជូនមកដល់អ៊ីស្រាអែលនៅថ្ងៃចន្ទទី ១២ ធ្នូនេះ។
អ៊ីស្រាអែលក្លាយជារដ្ឋដំបូងបំផុតបន្ទាប់ពីអាមេរិកដែលមានយន្តហោះចម្បាំង F-35 ប្រើប្រាស់ ក្រោយពេលយន្តហោះចម្បាំងស៊េរីទំនើបជំនាន់ទី៥ក្រុមដំបូងត្រូវគេបញ្ជូនទៅអ៊ីស្រាអែលថ្ងៃចន្ទទី ១២ធ្នូនេះ។ ហើយមេដឹកនាំអ៊ីស្រាអែល អួតអាងថា សព្វាវុធថ្មីនេះនឹងជួយពង្រឹងសមត្ថភាពកងទ័ពអ៊ីស្រាអែលក្នុងការប្រយុទ្ធប្រឆាំងសត្រូវនិងការពារសន្តិសុខ។
«កងទ័ពរបស់យើងឥឡូវនេះកាន់តែខ្លាំងក្លានិងមានសមត្ថភាពខ្ពស់ជាងមុន» នេះជាការលើកឡើងរបស់នាយករដ្ឋមន្ត្រីអ៊ីស្រាអែលលោក Benjamin Netanyahu ដែលស្រង់សម្តីដោយទីភ្នាក់ងារព័ត៌មាន Reuters ក្នុងពេលលោកស្ថិតនៅមូលដ្ឋាន ទ័ពអាកាស Nevatim ។
គេឃើញមានវត្តមានរដ្ឋមន្ត្រីការពារជាតិអាមេរិកលោក Ashton Carter ផងដែរក្នុងកម្មវិធីទទួលយន្តហោះចម្បាំងបំបាំងកាយក្រុមដំបូងនេះដែរ។
អ្នកជំនាញមួយចំនួនបានអះអាងថា យន្តហោះ F-35 នេះនឹងបង្កភាពងាយស្រួលដល់កងទ័ពអ៊ីស្រាអែលក្នុងការបំពេញប្រតិបត្តិការនានាដែលនៅតំបន់ Gaza និងប្រឆាំងរាល់ការដឹកជញ្ជូនអាវុធរបស់ក្រុមហេស្បូឡាទៅកាន់លីបង់ និងទៅកាន់ទឹកដីស៊ីរី។
យន្តហោះចម្បាំងថ្មីនេះក្លាយជាប្រភេទយន្តហោះចម្បាំងចុងក្រោយដែលមានសមត្ថភាពខ្ពស់ដោយវាអាចបំបាំងកាយផុតពីរ៉ាដា,អាចហោះបានល្បឿនបំផុត និងអាចមានសមត្ថភាពប្រយុទ្ធខ្ពស់ផង។
កាលពីខែមុន លោក Benjamin Netanyahu បានអះអាងថា ការនាំចូលយន្តហោះចម្បាំង F-35ជាគោលនយោបាយពង្រឹងសន្តិសុខ និងសមត្ថភាពការពារជាតិដើម្បីទប់ទល់រាល់ការគំរាមកំហែងពីក្រៅ។
តែគេដឹងច្បាស់ថា អ៊ីស្រាអែលព្យាយាមពង្រឹងសមត្ថភាពរបស់ខ្លួនដើម្បីទប់ទល់ការគំរាមកំហែងពីសំណាក់អ៊ីរ៉ង់។ ចាប់ពីពេលដែលមហាអំណាចប្រាំ បូកមួយចុះកិច្ចព្រមព្រៀងជាមួយអ៊ីរ៉ង់កាលពីខែកក្កដាឆ្នាំមុន អ៊ីស្រាអែលបន្តរិះគន់កិច្ចព្រមព្រៀង និងចាត់ទុកថា វាជាកំហុសឆ្គងប្រវត្តិសាស្ត្រមួយ។ ហើយអ៊ីស្រាអែលព្រមានម្តងជាពីរដងប្រើប្រាស់កម្លាំងយោធាជាលក្ខណៈឯកតោភាគីដើម្បីប្រឆាំងអ៊ីរ៉ង់បើសិនជាចាំបាច់នោះដើម្បីទប់ស្កាត់កុំឲ្យអ៊ីរ៉ង់ផលិតអាវុធនុយក្លេអ៊ែរបាននោះ។
សូមបញ្ជាក់បន្តិចថា អ៊ីស្រាអែលបានបញ្ជាទិញយន្តហោះចម្បាំង F-35 នេះ ចំនួន ១៧ គ្រឿងបន្ថែមពីអាមេរិកកាលពីខែវិច្ឆិកា។ ហើយការទិញបន្ថែមយន្តហោះចម្បាំង ១៧គ្រឿងនេះ នឹងធ្វើឲ្យកងទ័ពជើងអាកាសអ៊ីស្រាអែលមានយន្តហោះប្រភេទនេះសរុបចំនួន ៥០គ្រឿងដោយមួយគ្រឿងៗមានតម្លៃ ១០០លានដុល្លារអាមេរិក៕
© រក្សាសិទ្ធិដោយ thmeythmey.com