ឧទ្ធរណ៍រក្សាទោសឲ្យលោក នី ចរិយា ជាប់ពន្ធនាគារ ៦ខែ និងពិន័យថវិកា ៦លានរៀល

ជាតិ

សង្គមជាតិ

ឧទ្ធរណ៍រក្សាទោសឲ្យលោក នី ចរិយា ជាប់ពន្ធនាគារ ៦ខែ និងពិន័យថវិកា ៦លានរៀល

14, Dec 2016 , 5:40 pm

រូបភាព

ដោយ:

ភ្នំពេញ៖ សាលាឧទ្ធរណ៍បានចេញសាលដីកាតម្កល់ឲ្យលោក នី ចរិយា ជាប់ពន្ធនាគារ ៦ខែ និងពិន័យថវិកា ចំនួន៦លានរៀល ពីបទបរិហារបង្កាច់កេរ្តិ៍និងធ្វើអត្ថាធិប្បាយដើម្បីដាក់សម្ពាធលើយុត្តាធិការ ដដែល។ តែ មេធាវីគ្រោងបន្តប្តឹងជំទាស់នឹសាលដីកានេះទៀត។

សាលាឧទ្ធរណ៍មិនលើកលែងទោស លោក នី ចរិយា អគ្គលេខាធិការរងរបស់គណៈកម្មាធិការជាតិរៀបចំការបោះឆ្នោត នៅថ្ងៃទី១៤ ធ្នូនេះឡើយ។ លោក សំ សុគង់ មេធាវីការពារក្តី លោក នី ចរិយា ប្រាប់សារព័ត៌មានថ្មីៗ។

ការសម្រេចតម្កល់ដីកាលោក នី ចរិយា ឲ្យជាប់ពន្ធនាគារ និងពិន័យថវិកានៅថ្ងៃនេះ ពុំពាក់ព័ន្ធនឹងសំណុំរឿងកញ្ញា ខុម ចាន់តារ៉ាទី ហៅស្រីមុំ ដែលគេសង្ស័យថា មានរឿងអាស្រូវស្នេហាជាមួយនឹងឯកឧត្តម កឹម សុខា ឡើយ។

អតីតប្រធានផ្នែកស៊ើបអង្កេតរបស់សមាគមអាដហុករូបនេះ ជាប់ទោសពាក់ព័ន្ធនឹង ការបរិហារកេរ្តិ៍ជាសាធារណៈលើលោក សុខ កែវបណ្ឌិត ព្រះរាជអាជ្ញា និងលោក គី ឫទ្ធី ចៅក្រមស៊ើបសួរ នៃសាលាដំបូងខេត្តសៀមរាប កាលពីឆ្នាំ២០១៥ ។

កាលពីឆ្នាំ២០១៥ កន្លងទៅ ប្រជាពលរដ្ឋក្នុងខេត្តសៀមរាប មានជម្លោះដីធ្លី ជាមួយនឹងក្រុមហ៊ុនឯកជនមួយ។ បន្ទាប់ពីប្រជាពលរដ្ឋពីរនាក់ ត្រូវតុលាការខេត្តសៀមរាបឃាត់ខ្លួន លោក នី ចរិយា ដែលកាលនោះជាមន្ត្រីជាន់ខ្ពស់ NGO បានចេញមុខជួយពួកគេ រួមទាំងពលរដ្ឋដែលមានជម្លោះដីធ្លីផ្សេងទៀត។ លោក សំ សុគង់ រម្លឹកពីអង្គហេតុដែលនាំឲ្យលោក នី ចរិយា រងបទចោទ។

មេធាវីដែលការពារជនរងបទចោទព្រោះតែការចេញមុខតស៊ូមតិក្នុងរឿងក្តីរបស់ប្រជាពលរដ្ឋនេះ មិនសុខចិត្តនឹងការតម្កល់ដីកានេះឡើយ។ លោកអះអាងថា តុលាការមិនអាចសំអាងតែភស្តុតាងលើទំព័រសារព័ត៌មានមួយឡើយ។ លោកបញ្ជាក់ដូច្នេះថា៖«កូនក្តីខ្ញុំបានបដិសេធពុំបាន និយាយដូចសារព័ត៌មានផ្សាយនោះទេ។ ក្រុមមេធាវីនឹងពិភាក្សាជាមួយកូនក្តី នឹងដាក់បណ្តឹងជំទាស់បន្តឬយ៉ាងណា»?

កាលពីថ្ងៃទី២២ ខែកញ្ញា កន្លងទៅ សាលាដំបូងរាជធានីភ្នំពេញបានសម្រេចឲ្យ លោក នី ចរិយា ជាប់ពន្ធនាគារ ៦ខែ និងពិន័យជាថវិកាចំនួន៦លានរៀល ពីបទបរិហារបង្កាច់កេរ្តិ៍និងធ្វើអត្ថាធិប្បាយដើម្បីដាក់សម្ពាធលើយុត្តាធិការ។

ក្រៅពីករណីនេះ លោក នី ចរិយា បានរងបទចោទមួយទៀត គឺបទសមគំនិតក្នុងរឿងសូកប៉ាន់សាក្សី រួមទាំងមន្ត្រីអាដហុកទាំង៤រូបទៀត ហើយតុលាការបានបញ្ជូនខ្លួនពួកគេទៅឃុំបណ្តោះអាសន្ននៅពន្ធនាគារភ្នំពេញ កាលពីថ្ងៃទី២ ខែឧសភា ឆ្នាំ២០១៦ ពាក់ព័ន្ធនឹងរឿងក្តីក្តាំ ស្រីមុំ ជាមួយនឹងឯកឧត្តម កឹម សុខា ប្រធានស្តីទី គណបក្សសង្គ្រោះជាតិ។

យ៉ាងណា សម្តេច ស ខេង រដ្ឋមន្ត្រីក្រសួងមហាផ្ទៃ បានបង្ហើបពីការដោះស្រាយករណីអ្នកទាំង៥រូបខាងលើ នៅបំណាច់ឆ្នាំនេះ ក្រោយឯកឧត្តម កឹម សុខា ដែលទើបត្រូវបានព្រះមហាក្សត្រលើកលែងទោសកាលពីថ្ងៃទី២ ធ្នូ បានពិភាក្សាករណីនេះជាមួយសម្តេច ហ៊ុន សែន និងរូបលោកផ្ទាល់ នៅក្នុងរដ្ឋសភា កន្លងទៅនេះ៕