ជាតិ
សង្គមជាតិ
ក្រសួងសាធារណការប្រតិកម្មនឹងអ្នករិះគន់រឿងផ្លូវនៅខេត្តសៀមរាប និងត្បូងឃ្មុំ
×![]()
ក្រសួងសាធារណការ និងដឹកជញ្ជូន នៅថ្ងៃទី១៦ ធ្នូនេះ បានចេញលិខិតមួយច្បាប់ ជុំវិញប្រតិកម្មពីសាធារណជនទៅនឹងគម្រោងធ្វើផ្លូវចំនួន២ខ្សែ គឺមួយនៅខេត្តត្បូងឃ្មុំ និងមួយទៀតនៅខេត្តសៀមរាប។
តាមការបញ្ជាក់របស់ក្រសួង ការស្ថាបនាផ្លូវនៅក្រុងសួង ខេត្តត្បូងឃ្មុំ មិនស្ថិតក្រោមការគ្រប់គ្រងរបស់ខ្លួនឡើយ ចំណែកនៅខេត្តសៀមរាបវិញ មន្ទីររបស់ខ្លួនបានធ្វើទៅតាមបច្ចេកទេសត្រឹមត្រូវ មិនដូចការចោទប្រកាន់របស់មហាជនថាធ្វើឲ្យតែបានៗនោះទេ។
ក្នុងសេចក្តីប្រកាសព័ត៌មាន លាយឡំនឹងសាររូបភាពមតិរិះគន់ពីអ្នកលេងបណ្តាញសង្គមហ្វេសប៊ុកជាច្រើនសន្លឹក ដែលចេញផ្សាយនៅរសៀលថ្ងៃទី១៦ ធ្នូ ឆ្នាំ២០១៦ ក្រសួងសាធារណការ និងដឹកជញ្ជូន បានពន្យល់ពីករណីធ្វើផ្លូវមួយខ្សែ ដែលស្ថិតនៅភូមិជ្រៃបិតមាស ក្រុងសួង ខេត្តត្បូងឃ្មុំ ដែលមហាជនចោទប្រកាន់ថាធ្វើខុសបច្ចេកទេសនោះ ក្រសួងបញ្ជាក់ថា គឺមិនស្ថិតក្រោមការគ្រប់គ្រងរបស់ខ្លួនឡើយ។
ចំណែកករណីនៅខេត្តសៀមរាបវិញ ក្រសួងបានពន្យល់ថា ផ្លូវវត្តចក ឫផ្លូវ ២៦៧ ស្ថិតនៅសង្កាត់ស្វាយដង្គំ គឺមានការចែកចាយតាមបណ្តាញសង្គម និងសារព័ត៌មាន ដោយភាន់ច្រឡំដាក់រូបផ្សេងពីទីតាំងខាងលើ។ ក្រសួងបញ្ជាក់ថា ផ្លូវវត្តចកដែលមន្ទីរសាធារណការស្ថាបនាជាង១០០ម៉ែត្រនោះ គឺបានចាក់កៅស៊ូត្រឹមត្រូវតាមលក្ខណៈបច្ចេកទេសលើស្រទាប់គ្រឹះ (ថ្មមិច) ដែលបមានពណ៌ក្រហមស្រដៀងនឹងដីក្រហម។
ក្រសួងសាធារណការរំពឹងថា សាធារណជនទាំងអស់នឹងទទួលបានព័ត៌មានត្រឹមត្រូវខាងលើ ដើម្បីជម្រះនូវការភាន់ច្រឡំ ក៏ដូចជាការចោទប្រកាន់នានាដោយគ្មានមូលដ្ឋានជាក់លាក់។ ក្រសួងក៏បានធ្វើការអំពាវនាវដល់សារព័ត៌មាន និងអ្នកចែករំលែកតាមបណ្តាញសង្គមទាំងអស់យ៉ាងដូច្នេះថា៖« ត្រូវទាក់ទងអ្នកជំនាញជាមុនសិន មុននឹងចុះផ្សាយបញ្ហានានា ដើម្បីបញ្ចៀសរាល់ការភាន់ច្រឡំពីសាធារណជន ឫធ្លាក់ចូលអន្ទាក់របស់អ្នកឆ្លៀតឳកាស កេងចំណេញផលប្រយោជន៍សារព័ត៌មាន ដែលអាចបង្កឲ្យមានបញ្ហាផ្សេងៗ»។
គួរបញ្ជាក់ថា កាលពីពេលថ្មីៗនេះ នៅលើបណ្តាញសង្គម ពិសេសប្រព័ន្ធហ្វេសប៊ុក មានការរិះគន់ចំពោះការស្ថាបនាផ្លូវចំនួន២កន្លែង ដោយពួកគេថា មិនបានគោរពទៅតាមបច្ចេកទេសត្រឹមត្រូវ។ អ្នករិះគន់ទាំងនោះបានបន្តចែករំលែករូបភាពសកម្មភាពកំពុងចាក់កៅស៊ូនៅលើដីក្រហមផ្ទាល់ ដោយពុំមានក្រាលគ្រួសពីលើ តាមបច្ចេកទេសត្រឹមត្រូវ៕
Tag:
ផ្លូវវត្តចក
ក្រសួងសាធារណការ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
