បទយកការណ៍ / បទសម្ភាសន៍
សង្គមជាតិ
លោក ប៊ូ សារឿន៖«ក្តីប្រាថ្នារបស់ខ្ញុំទទួលបាននៅជាតិនេះហើយ មិនមែនជាតិក្រោយទេ»(ភាគ២)
× ភ្នំពេញ៖ ក្រោយពីតស៊ូអស់រយៈពេលជាង៤០ឆ្នាំ លោក ប៊ូ សារឿន បានក្លាយជាមន្ត្រីព័ត៌មាននៃស្ថាប័នធនាគារពិភពលោកប្រចាំនៅក្នុងប្រទេសកម្ពុជា។ ហើយថ្មីៗនេះ លោកទើបទទួលបានសញ្ញាបត្រជាន់ខ្ពស់អនុបណ្ឌិតផ្នែកទំនាក់ទំនងអន្តរជាតិក្នុងវ័យ៥២ឆ្នាំនៅឆ្នាំ២០១៧នេះពីសកលវិទ្យាល័យបញ្ញាសាស្ត្រនៅក្នុងប្រទេសកម្ពុជា។ កើតនៅក្នុងត្រកូលក្រីក្រ ឪពុកម្តាយគ្មានចំណេះដឹង លោក សារឿន ឲ្យតម្លៃលើការសិក្សាខ្លាំងបំផុត។ ការសិក្សាធ្វើឲ្យលោកអាចចាកចេញពីរណ្តៅនៃភាពក្រីក្រ។ ដើម្បីជ្រាបព័ត៌មានលម្អិតសូមអញ្ជើញស្តាប់បទសម្ភាសន៍រវាងលោក គី សុខលីម អ្នកសារព័ត៌មានអេឡិចត្រូនិកថ្មីៗ និងលោក ប៊ូ សារឿន មន្ត្រីព័ត៌មាននៃស្ថាប័នធនាគារពិភពលោកដូចតទៅ៖
សំឡេងសម្ភាសន៍
លោក ប៊ូ សារឿន ត្រូវតែធ្វើឲ្យខុសពីស្ថានភាពអតីតកាលនៃគ្រួសាររបស់លោកដែលធ្លាប់ក្រីក្រ ហើយឪពុកម្តាយគ្មានចំណេះដឹង។ ស្ថិតនៅក្នុងអាយុ៥២ឆ្នាំ មន្ត្រីព័ត៌មាននៃស្ថាប័នធនាគារពិភពលបានបំពេញបំណងដោយទទួលបានសញ្ញាបត្រជាន់ខ្ពស់អនុបណ្ឌិតផ្នែកទំនាក់ទំនងអន្តរជាតិពីសកលវិទ្យាល័យបញ្ញាសាស្ត្រនៅឆ្នាំ២០១៧នេះ។ នេះ គឺជាអ្វីដែលលោកមិនដែលគិតថាទទួលបាននៅក្នុងជីវិតនេះទេ។ បើជាតិក្រោយប្រហែលជាអាច…
លោកបានបង្ហាញអារម្មណ៍របស់លោកនៅតាមបណ្តាញសង្គមហ្វេសប៊ុកយ៉ាងដូច្នេះថា៖«ក្តីប្រាថ្នារបស់ខ្ញុំបានទទួលក្នុងជាតិនេះ! My wish comes within this life—not next
ពិតណាស់ ការទទួលបានបរិញ្ញាបត្រគឺជាក្តីរំភើបមួយ។ សម្រាប់ខ្ញុំវាពិតអស្ចារ្យបំផុត។ មិត្តៗភាគច្រើនបានដឹងពីប្រវត្តិខ្លះៗរបស់ខ្ញុំ។ កាលពីពាក់កណ្តាលទសត្សរ៍ទី៨០ ខ្ញុំគ្មានជំរកស្នាក់នៅ ហើយរស់ពឹងលើរបររើសអេតចាយ រត់កងឌុបមួយរយៈ។ កាលនោះក្តីប្រាថ្នារបស់ខ្ញុំគឺមានតែសម្រាប់ជាតិខាងមុខ។ ខ្ញុំបានបន់ស្រន់ថា ប្រសិនបើខ្ញុំមានសំណាងបានកើតម្តងទៀត សូមឲ្យកើតក្នុងត្រកូលអ្នកមានជីវភាពធូរធាបន្តិចដែលអាចផ្តល់ឲ្យខ្ញុំបានរៀនសូត្រខ្ពងខ្ពស់។ ខ្ញុំជឿលើការអប់រំ។ ប៉ុន្តែពេលនេះខ្ញុំបានទទួលវាហើយ គឺទទួលក្នុងជាតិនេះ។ មានកត្តាច្រើនដែលខ្ញុំអាចធ្វើបាន។ ទី១៖ ខ្ញុំមិនបានបោះបង់ចោលក្តីសង្ឃឹមសម្រាប់ជាតិនេះ បើទោះបីជាមានបន្តិចបន្តួចក្តី។ ទី២៖ មិនបោះបង់ចោលឱកាសដែលមករកខ្ញុំ ហើយក៏មិនដេកចាំឱកាសរត់មករកខ្ញុំដែរ និងទី៣៖ ព្យាយាម ព្យាយាម និងព្យាយាម»។
លោក ប៊ូ សារឿន ជឿជាក់លើការសិក្សា១០០%ដែលនាំឲ្យជីវិតប្រែប្រួល។ សម្រាប់លោក សារឿន ការសិក្សាអាចធ្វើឲ្យបុគ្គលងើបចេញពីរណ្តៅនៃភាពក្រីក្រ។ «កៅអីដែលខ្ញុំកំពុងអង្គុយនេះ(ការិយាល័យធនាគារពិភពលោក) គឺបានមកដោយសារការសិក្សា។ ខ្ញុំស្រឡាញ់ការសិក្សាណាស់»។ នេះ គឺជាថ្លែងប្រាប់របស់លោក សារឿន ដែលកំពុងអង្គុយនៅក្នុងការិយាល័យរបស់លោកនៅទីក្រុងភ្នំពេញ។
ដោយស្រឡាញ់ការសិក្សាខ្លាំងពេកនោះ លោក សារឿន បានបន្តទៀតថា៖«ការសិក្សាមិនធ្វើឲ្យយើងរលត់ទេ តែធ្វើឲ្យយើងកាន់តែភ្លឺ។ ខ្ញុំជឿជាក់លើការសិក្សាខ្លាំងមែនទែន»។
ទោះបីជាលោកទទួលបានសញ្ញាបត្រខ្ពស់ ការងារល្អ គ្រួសារល្អ លោកនៅតែមិនហ៊ាននិយាយថា ជីវិតលោកជោគជ័យឡើយ។ អ្វីដែលលោកហ៊ានពោលប្រាប់អ្នកសារព័ត៌មានគឺត្រឹមតែឃ្លាថា៖«ខ្ញុំបានបំពេញក្តីប្រាថ្នារបស់ខ្ញុំនៅជាតិនេះហើយ(សញ្ញាបត្រជាន់ខ្ពស់)»៕
© រក្សាសិទ្ធិដោយ thmeythmey.com